In tzaj tbiꞌn Kman aju kcubsbil
Bitz tuꞌn David
28
Nman, aya colol weye, in chin cubsane twitza miꞌn nok chin tzaj tbiꞌna, chin ttzakꞌwentza. Porque ka miꞌn ma chin tzaj ttzakꞌweꞌna, ajun kine chin oquel tajlal cyucꞌil keju in che cyim.2 Bintza tkꞌajkꞌajel nwiꞌye oc t-xi nkanine onbil teya, oc cyjaw nkꞌoꞌne nkꞌabe twitz cyaꞌj tumlal tjaya xjan.
3 Miꞌn cub tkꞌoꞌna ncastiwoye junx cyucꞌil ke xjal mya baꞌn ex ke xjal binchal mya baꞌn, ex nok tuꞌn cytziꞌ in cymaꞌn ka at cycꞌujlalil, atzun tuj cyanmi nojni tuꞌn mya baꞌn.
4 Kꞌoncuya cycastiw ic tzaꞌnx ju cybinchben mya baꞌn, ex kꞌonxa chojbil cye ax ic tzaꞌnx ju mya baꞌn o cybincha.
5 Tuꞌnju mintiꞌ in xi cyniman tcyakilju o tbincha Kman, cyjaꞌtzun che najel tuꞌn, ex mlay che jaw weꞌtl juntl maj.
6 Nimanxwit te Kman tuꞌnju ma che tzaj tbiꞌn ke ncubsbile.
7 Ate Kman colol weye maꞌxix tipumal, oꞌcx tiꞌj kꞌukl ncꞌuꞌje, ate oninte weye. In tzalaj wanmiye; chin bitzale ex cxel nkꞌoꞌne chjonte te Kman.
8 Ate Kman kꞌolte tipumal tnam etzan tuꞌn, ex ate onil ex colol tiꞌj rey jaw t-scꞌoꞌn.
9 Cloma aju tnam etzan tuꞌna Nman, ex cyꞌiwlama keju o che jaw t-scꞌoꞌna. Tzꞌocxa ic tzaꞌn jun pastor, cwentin oca ke ex kꞌinxa ke tuj tkꞌaba te jumajx.