2 Ke xjal binchal mya baꞌn, akeju aj kꞌoj wiꞌje, baj cychmon cyib tuꞌn cyoc tzokpaj wiꞌje ex tuꞌn nnaje cyuꞌn, pero ax ke e jaw tolj ex e cub tzꞌak.

3 Masque baj cytxolban cyib txkan soldad wiꞌje, mlay tzaj baj ncꞌuꞌje; masque che oc ten kꞌojlel wiꞌje, pero cucx ckebil ncꞌuꞌje.

4 Oꞌcx jun in xi nkanine te Kman, junx waje te; atzun tuꞌn ntene tuj tja Kman tuj tcyakil kꞌij te wankꞌible, tuꞌntzun ncꞌulune te ex tuꞌn ntzalaje tiꞌj tuꞌnju tbanilxix te.

5 Oc ttzaj mya baꞌn wiꞌje, chin xel ewane tuꞌn Kman tuj t-xlecumal, chin oquex ewane tuꞌn tuj tja tuꞌn nclete; chin jawix kꞌoꞌne tuꞌn twiꞌ jun pic tuꞌn nclete.

6 Cyjaꞌtzun cbel cyiꞌj aj kꞌoj wuꞌne, akeju cytxolban cyib wiꞌje, ex cyjaꞌtzun cxel nkꞌoꞌne chojbil te Kman tuj tja; oc chin schꞌile tuꞌn tzalajbil; chin bitzale te Kman.

7 In chin kꞌajte tiꞌja Nman, chin tbintza. Kꞌakꞌantz tcꞌuꞌja wiꞌje, chin ttzakꞌwentza.

8 Aju wanmiye in tmaꞌn weye cyjaꞌ: Tzꞌoc tililx tuꞌna tuꞌn ttena tucꞌil Kman. Cyjaꞌtzun nnoꞌc tilil wuꞌne tuꞌn ntene tucꞌila Kman.

9 Miꞌn tzꞌel tewan tiba nwitze Nman, miꞌn tzaj tkꞌoja wiꞌje ex miꞌn chin el ticꞌuna; oꞌcxcu aya onil weye. Miꞌn chin cyaj tkꞌoꞌna njunalxe ex miꞌn chin cyaj tcolina, porque oꞌcx aya Ndiose ex clol weye.

10 Masque ma chin cyaj coline tuꞌn nmane ex tuꞌn ntxuꞌye, pero aya cꞌoquel cwentin weye Nman.

11 Nman, yecꞌuntza aju tbeya weye, chin t-ẍaklunxa tuj be jikun tiꞌj, tuꞌn cylaj ke aj kꞌoj wiꞌje.

12 Miꞌn chinx ttzokpiꞌna tuj cykꞌab aj kꞌoj, porque ma che oc ten xjal nicꞌal yol wiꞌje, ex oꞌcx in che ximan tiꞌj tuꞌn ncꞌixbisanjtze cyuꞌn.

13 Pero ma keꞌ ncꞌuꞌje tiꞌj tuꞌn ncꞌmonteye t-xtalbil Kman acux itzꞌx kine tzalu twitz txꞌotxꞌ.

14 Keꞌc tcꞌuꞌja tiꞌj Kman, tenx tipuna ex miꞌn baj tcꞌuꞌja. Ax toc keꞌc tcꞌuꞌja tiꞌj.