2 aya Ndiose, tiꞌja kꞌukl ncꞌuꞌje: miꞌn takꞌa ambil tuꞌn tcub nchꞌixwiye. Miꞌnwt chin oque te cytzebl ke aj kꞌoj wiꞌje.

3 Miꞌnxwit cub cychꞌixwi keju kꞌukl cycꞌuꞌj tiꞌja. Cubxwit cychꞌixwi keju nok elajx in jaw cyiꞌn cyib tiꞌja.

4 Nman, yecꞌuntza ke tbeya weye; ex chin t-ẍaklunxa cyuj ke;

5 chin t-ẍaklunxa tuꞌn tyola axix toc, ex chin t-xnakꞌtzama, porque aya Ndiose ex clol weye. Oꞌcx tiꞌja kꞌukl ncꞌuꞌje tcyakil kꞌij.

6 Nman, naꞌntza aju tcꞌujlalila ex ju t-xtalbila, akeju e tzaj tyecꞌuna keye atxix ojtxi,

7 miꞌn tzaj tnaꞌna ke wile ex mi ke mya baꞌn o nbinchaye tuj ncuꞌxumale. Nman, chin tnaꞌntza tuꞌnju tcꞌujlalila ex t-xtalbila maꞌxix.

8 Baꞌnte Kman ex tzꞌaklxix; cyjaꞌtzun in xi tyecꞌun be baꞌn cye xjal aj il,

9 in cheꞌx t-ẍakluꞌn ke mans tuj tbe; ex in cheꞌx t-xnakꞌtzaꞌn tiꞌj ju tzꞌaklxix.

10 Ate Dios axix toc tyol ex cucx at tcꞌujlalil cyiꞌj keju in japun cyuꞌn aju yol cyaj bant tiꞌj tuꞌn cyucꞌil, ex ke tmandamyent.

11 Tuꞌnju maꞌxix toclen tbiya Nman, najsama aju wile maꞌxix.

12 Aju xjal in niman te Kman, cxel yecꞌun te alcye be tuꞌn t-xi tiꞌn:

13 oc cꞌankꞌil tuj tzalajbil tuꞌn, ex cxel tkꞌoꞌn cyoclen ke tiyjil tuꞌn cyetzante aju txꞌotxꞌ.

14 Nnoꞌc Kman te cyamiw ke xjal in che niman te, ex in xi tmaꞌn cye aju yol cyaj bant tiꞌj tuꞌn.

15 Cucx in xi nqueꞌyine tiꞌj Kman, porque ate in clonte weye tuj tcyakil xobajil.

16 Chin tqueꞌyintza Nman, ex kꞌakꞌantz tcꞌuꞌja wiꞌje, porque njunale atine ex in chin bisune.

17 Nim in bisun wanmiye; chin tcloma tuj yajbil weye.

18 Queꞌyintza aju nbise ex ju yajbil weye ex najsama ke wile.

19 Queꞌyintza, ma che chmet nim aj kꞌoj wiꞌje; nimxix ma chin el cyicꞌun.

20 Chin tcwentin oca ex chin tcloma. Miꞌn takꞌa ambil tuꞌn tcub nchꞌixwiye, porque tiꞌja ma tzꞌoc nclon wibe.

21 Tzꞌajbenxwit te colbil weye aju nmodiye baꞌn ex tuꞌnju mintiꞌ wile, porque tiꞌja ma tzꞌoc keꞌ ncꞌuꞌje.

22 Nman Dios, cloma ke aj Israel tuj tcyakil yajbil cye.