2 Ma tzaj tkꞌoꞌna ke tajbil; mintiꞌ ma cub txcꞌaꞌyina ke tkanbetz.

3 Ma tcꞌama tucꞌil nimcu cyꞌiwbil, ex ma jax tkꞌoꞌna jun coron kꞌan pwak tuj twiꞌ.

4 Xi tkanin tchwinklal teya, ex tzaj tkꞌoꞌna maꞌ tuj tchwinklal ex te jumajx.

5 Nok tuꞌnju onbil tuꞌna, maꞌxix ma tzꞌoc tipumal, ma txi tkꞌoꞌna nimbil te ex toclen maꞌxix.

6 Ma cub tcyꞌiwlaꞌna te jumajx; ma noj tuꞌn tzalajbil tuꞌnju aya at tucꞌil.

7 Aya rey, mlayx cub tzꞌaka tuꞌnju kꞌukl tcꞌuꞌja tiꞌj Kman; kꞌukl tcꞌuꞌja tiꞌj tcꞌujlalil Dios aju maꞌxix toclen.

8 Tuꞌn tipumala cbel cyiꞌj cycyakil aj kꞌoj tiꞌja; ex tuꞌn tbankꞌaba cbel cyiꞌj keju in che icꞌun teya;

9 biꞌx che oquex tkꞌoꞌna ke tuj jun jorni in cꞌant tuꞌn kꞌakꞌ oc tula tuꞌn tcub cysentens tuꞌna. Tuꞌn tkꞌoj Kman che bel tzꞌeꞌy tuꞌn kꞌakꞌ.

10 Che najel ke cycꞌwaꞌl ex ke cyiyjil tuꞌna, mi aꞌl jun cyjel ankꞌin cyxol xjal.

11 Masque cyaj tuꞌn cybinchante jun mya baꞌn tiꞌja ex ka tuꞌn tbaj cyximan jun tiꞌxti tiꞌja, pero mlay bant cyuꞌn.

12 Tuꞌna che cꞌelel ok oc t-xi tumlaꞌna plech cyiꞌj.

13 Cjawil knimsane tbiya Kman, tuꞌnju nim tipumala. Ko bitzale ex cxel kkꞌoꞌne chjonte teya tuꞌn tipumala maꞌxix.