2 Aya Nman Dios, in chin cubsane twitza kꞌijl ex konicꞌan, ex mintiꞌ in tzaj ttzakꞌweꞌna, mintiꞌ chꞌin ojlabl weye.

3 Pero aya xjan; kꞌukliya tuj tkꞌukbila tuꞌn tcawina ex tuꞌn tjaw nimsaꞌna cyuꞌn aj Israel.

4 Ke kxeꞌchele o keꞌ cycꞌuꞌj tiꞌja ex o che colpet tuꞌna;

5 xi cykanin onbil teya ex e tzokpet tuꞌna. O keꞌ cycꞌuꞌj tiꞌja ex tuꞌn jlu mintiꞌ cub cychꞌixwi.

6 Jaꞌlo mer ic tzaꞌn mya xjal kine, ma chin oque ic tzaꞌn jun tal ẍukꞌ, ma chin el icꞌune cyuꞌn xjal.

7 Keju in che queꞌyin weye in che xmayin wiꞌje, in xi cyyucun cywiꞌ te jun techal cyxmaybil,

8 ex in cymaꞌn: O keꞌ tcꞌuꞌj tiꞌj Kman, ¿tikuꞌntzun mintiꞌ ma tzul colol tiꞌj ka ax toc at tgan tiꞌj? Che chi.

9 Pero tuꞌna in ul itzꞌje tiꞌj ntxuꞌye, ex aya kꞌukbante ncꞌuꞌje tej ntene ttzi t-xuꞌc ntxuꞌye.

10 Tej naꞌnxtok wul itzꞌje cwentin kine tuꞌna, ex axa Ndiosa tej atinxtoke tuj talbil ntxuꞌye.

11 Miꞌn tzꞌel tpaꞌn tiba wiꞌje, porque chꞌix ttzaj jun bis wibaje ex mi aꞌl jun onil weye.

12 Ma baj cytxolban cyib ke aj kꞌoj wiꞌje, mer ic tzaꞌn ke tor puro jawni ateꞌ tuj txꞌotxꞌ Basán.

13 In che tzanun wiꞌje ic tzaꞌn ke balun puro txꞌuꞌj, ex in xi cycꞌabin tuj cytziꞌ tuꞌn cytzaj lipan wiꞌje.

14 Ma chin oque ic tzaꞌn aꞌ nneꞌl kojl, ex ma che kꞌulpaj ke nbakile. Aju wanmiye in cub ulj max wuje mer ic tzaꞌn xcab.

15 Puro tzkij tuj ntziꞌye, mer ic tzaꞌn xcꞌoꞌn, ex biꞌx ma tzꞌoc tlacꞌon tib wakꞌe twitz ncꞌoꞌne. Ma chin cuꞌx tkꞌoꞌna tuj cymukbil cyimni.

16 At jun cꞌloj xjal mya baꞌn ma baj cytxolban cyib wiꞌje, ic tzaꞌn txꞌyan tuꞌn cyoc tzokpaj wiꞌje. Ma baj cyxyuꞌn tiꞌj nkꞌabe ex tiꞌj nkane.

17 Kꞌanchaꞌlxix ke nbakile. Mintiꞌ nneꞌl cyiꞌn cywitz aj kꞌoj wiꞌje.

18 Ma jaw cyiꞌn swert tiꞌj nxbalune ex ma baj cysipan cyxolx.

19 Pero aya Nman kꞌol wipumale, miꞌn tzꞌel lakꞌeꞌya wiꞌje, tzaj naja onil weye.

20 Chin tcloma tuꞌn miꞌn ncyime tuꞌn spad, ex miꞌn txi tkꞌoꞌna ambil tuꞌn ncube cyuꞌn ke xjal mer txꞌyan ke.

21 Chin tcloma cye ke xjal mer balun ke, ex chin tcloma cye xjal mer at cycach ic tzaꞌn ke tor.

22 Cxel nmaꞌne tkanil tiꞌja cye wermaniye, ex cxel nkꞌoꞌne chjonte teya cyxol keju in cub cybuyin cyib.

23 Akeye baꞌn che niman te Kman, cykꞌonxe chjonte te; cycyakil keye tiyjil Jacob cynimsaꞌn jawe tbi, che cꞌulune cycyakile twitz, akeye tiyjil Israel.

24 Mintiꞌ in che el ticꞌun ke xjal meba, ex mintiꞌ nnicꞌ tnaꞌl tuꞌn aju yajbil cye, mintiꞌ nneꞌl tewan twitz cyiꞌj, ex in che tzaj tbiꞌn oc in cykanin onbil.

25 Oc tcub cybuyin cyib nim xjal etzan tuꞌna, cxel nkꞌoꞌne chjonte teya cywitz, tiꞌj ju ma tbinchaya, ex cywitz keju in che niman teya cjapunel wuꞌne aju o txi ntziyane teya.

26 Ke xjal meba oc che waꞌl ocxi tnoj cycꞌuꞌj, cxel cykꞌoꞌn chjonte te Kman keju in che jyon onbil tucꞌil, cucxwit che tzalaje.

27 Akeye xjal te tcyakil cꞌloj cyiyjile, ex te tcyakil tnam, ex cycyakil xjal ttxaꞌnpun txꞌotxꞌ, tzulx Kman tiꞌj cycꞌuꞌje ex cytzaje tucꞌil; che ẍmejecuye twitz.

28 Porque ate Kman aju rey ex a in cawin cyibaj ke nasyon.

29 Mocꞌec cywiꞌye ex che cꞌulune oꞌcx te, cycyakile akeye at nim cyeye, ex cycyakil keju che cymel, porque mlay che ankꞌin cyuꞌnx cyib.

30 Ke wiyjile che ul itzꞌj te tibajxi che cꞌulul te Kman ex mlay che kꞌajen tuꞌn cyyolin tiꞌj;

31 cxel cymaꞌn cye keju che ul itzꞌj te tibajxi tiꞌj takꞌunben Kman, ka ate Kman tzꞌaklxix.