2 Aju yol in tmaꞌn jun kꞌij, ax in yolin juntl kꞌij tiꞌj; ex aju yol in tmaꞌn jun konicꞌan, ax in yolin juntl konicꞌan tiꞌj, in che yolin tiꞌj tnabl Dios.

3 Masque mintiꞌ kꞌajkꞌaj ke yol ex mintiꞌ in binjtz jun tkꞌajkꞌajel wibaj,

4 pero aju tkanil in xiꞌ tuj tcyakil twitz txꞌotxꞌ ex max in pon baj cyyol ttxaꞌnpun txꞌotxꞌ, max jatum taꞌ tnajbil kꞌij.

5 Ic tten kꞌij ic tzaꞌn jun cuꞌxun at tipun tuꞌn tkelan, ex ic tzaꞌn jun chmilbaj nneꞌtz tuj tja cꞌitzke toclen mojeꞌ.

6 Nneꞌtz kꞌij tuj jun pacꞌ t-xe cyaꞌj ex in pon baj tuj juntl pacꞌ, mi aꞌl jun jacu tzꞌel ok twitz tcyakal.

7 Aju tley Kman Dios tzꞌaklxixte porque in tkꞌoꞌn acꞌaj kipumal; ke tmandamyent axix toc ke ex aju xjal mintiꞌ chꞌin baꞌn tuꞌn nnoꞌc tnabl cyuꞌn.

8 Ke t-xnakꞌtzbil Kman Dios tzꞌaklxix ke ex in cytzalajsaꞌn kanmi. Ke tmandamyent mya smoꞌn cyten ex in cyspicꞌbaꞌn tuj kwitz.

9 Aju tuꞌn kxob twitz Kman Dios ex tuꞌn kniman te, mintiꞌ tpaltil ex cucx ctel te jumajx. Ke tmandamyent axix toc ke, ex cycyakil tzꞌaklxix.

10 Mas tbanilxix ke twitz kꞌan pwak ex mas chiꞌ ke twitz taꞌl cab.

11 In cykꞌoꞌn nnable, akine tmajena; ka ma che japun wuꞌne, nim baꞌn in cybinchaꞌn weye.

12 ¿Alcye jun jacu tzꞌel tnicꞌ tiꞌj tpaltil? Nman, najsama aju npaltile mintiꞌ nneꞌl nnicꞌe tiꞌj.

13 Chin tcwentin oca tuꞌn mi tjaw nniman wibe, miꞌn takꞌa ambil tuꞌn tcub wiꞌje tuꞌn nnimbil wibe. Cyjaꞌtzun chin oquele te tzꞌaklxix ex mlay chin icꞌe tibaj tleya.

14 Baꞌnwt tzꞌela nyole ex nximbetze tuj twitza, aya Nman clol weye ex tzokpil weye.