2 Aya colol wiꞌje, aya jun lugar te colbil wibe ex tzokpilte weye. Aya Ndiose ic ttena te weye ic tzaꞌn jun pic in chin clete tuꞌn, ex ic tzaꞌn jun makbil in ajben tuj kꞌoj, ex tuꞌnju nim tipumala in chin clete, ic ttena ic tzaꞌn jun ewbil wibe maꞌ tjax.

3 Aya Nman, baꞌn tuꞌn tjaw nimset tbiya; oc in chin txocone tiꞌja in chin clete tuꞌna cywitz aj kꞌoj wiꞌje.

4 Tuj nwitze mer ic tzaꞌn otok baj nscun wibe tuj jun sakbak tuꞌn camic; o nnaꞌye t-xobil tej cyjaꞌtok nnaje tuꞌn tipumal txkan aꞌ.

5 Mer ic tzaꞌn otok chin cub xwacune tuꞌn sakbak tuꞌn ncyime; ex mer ic tzaꞌn otok chin tzyete tuꞌn tcꞌobil camic.

6 Tej in chin bisuntoke in oc tene txcolte Kman, xi nkanine onbil te Ndiose, ex in tzaj biꞌne tuꞌn max tuj tja; pon tkꞌajkꞌajel nwiꞌye tuj t-ẍcyin.

7 Tzajtzun jun nintz cyaknajnab ex e tzaj yucch cykꞌukbil ke witz; biꞌx e baj yucch tuꞌn ttxꞌuꞌjil Kman.

8 Etz sib tuj ttxaꞌn, atzun tuj ttziꞌ etz jun kꞌakꞌ in tzꞌeꞌy nimcu tuꞌn; ax icx nneꞌtz xkꞌaꞌl tuj ttziꞌ in cꞌant wen.

9 Jaket twitz cyaꞌj tuꞌn ex cuꞌtztzun. Attok txkan kꞌek muj tjakꞌ tkan.

10 Jax ten tibaj jun querubín ex tzaj lipan; tibaj cykꞌikꞌ tzaj lipan.

11 Cub tkꞌoꞌn kꞌek muj nojni tuꞌn aꞌ ex kloljxix queꞌyin; ic tenba tuꞌn ic tzaꞌn jun xbalun te makbil, ex atzun ocx tewan tib tuj.

12 Etz jun spicꞌun twitz in koptzꞌaj wen; tuj muj tzaj chitj sakbakun ex xkꞌaꞌl in cꞌant.

13 Ate Kman aju maꞌxix toclen, max tuj cyaꞌj o binjtz tkꞌajkꞌajel twiꞌ in julin wen tucꞌil sakbakun ex xkꞌaꞌl in cꞌant.

14 E tzaj t-xoꞌn ke tplech tucꞌix tkan kꞌancyok, atzun ke aj kꞌoj tiꞌj biꞌx e jeꞌl ok ex biꞌx baj cysputun cyib.

15 Biꞌx kꞌanchaꞌlin aju t-xeꞌpun mar, icx ke tkꞌukbil txꞌotxꞌ tuꞌnju tkꞌajkꞌajel twiꞌ Kman puro cyuw wen, ex tuꞌnju cyuwxix tzaj t-xupin.

16 Max tuj cyaꞌj tzaj tnukpiꞌn tkꞌab Dios wiꞌje, ex tuꞌn tkꞌab in jatze tuj nintz mar.

17 O chin clete tuꞌn tuj cykꞌab aj kꞌoj wiꞌje, akeju in el icꞌune cyuꞌn ex at mas cyipun nwitze.

18 E oc tzokpaj wiꞌje tej otok tzaj jun yajbil wiꞌje, pero ate Kman tzaj oninte weye:

19 In tzokpete tuꞌn tuꞌn ntene tuj jun chkꞌajlaj maꞌ twitz; in clete tuꞌn tuꞌnju at tcꞌujlalil wiꞌje.

20 Ma tzaj kꞌoꞌn chojbil weye tuꞌn Kman, tuꞌnju baꞌn nbinchbene twitz,

21 ex tuꞌnju cucx in bete tuj tbe ex mi jun maj ma tzꞌel npaꞌn wibe tiꞌj Dios.

22 Cucx in chin ximane cyiꞌj ke tmandamyent; mi jun maj ma tzꞌel wicꞌune ke tley.

23 Ma chin tene twitz mintiꞌ npaltile; ma tzꞌel npaꞌn wibe tiꞌj mya baꞌn.

24 Ma tzaj tkꞌoꞌn Kman chojbil weye tuꞌnju mintiꞌ npaltile twitz.

25 Aya Nman, tzꞌaklxixa tucꞌil ju xjal tzꞌaklxix, ex puro baꞌna tucꞌil ju xjal baꞌn tmod,

26 puro baꞌna tucꞌil ju xjal sak tuj tanmi, pero ax cyuwa tiꞌj ju xjal elni twitz tuꞌn t-sbun.

27 In che tcloꞌna ke xjal mans, atzun keju in jaw cyniman cyib, in che oc tkꞌoꞌna te mintiꞌ cyajben.

28 Aya Nman in tzaj kꞌonte spicꞌun weye, aya Ndiose, tuꞌna in tzaj tkꞌoꞌna spicꞌun tuj klolj jatum atine.

29 Tuꞌnju onin kine tuꞌna, chin oquel tzokpaje cyiꞌj ke aj kꞌoj wiꞌje, ex chin oquexe twi muro toc tiꞌjele cytanmi.

30 Aju tbe Dios puro tzꞌaklxix; aju yol in tzaj ttziyan baꞌn tuꞌn tkeꞌ kcꞌuꞌj tiꞌj; ate Dios colol cye cycyakil keju in keꞌ cycꞌuꞌj tiꞌj.

31 ¿Atpe juntl Dios? Mintiꞌ. Oꞌcx a Dios jacu ko clet tuꞌn.

32 Ate Dios in tzaj kꞌonte wipune, a onil weye tuꞌn ntene mintiꞌ npaltile,

33 a in tzaj kꞌonte tipumal nkane tuꞌn tbant nkelane ic tzaꞌn jun masat, ex a in jax kꞌinte weye twiꞌ jun lugar maꞌxix tjaw, jatum tuꞌn ntene segurxix,

34 a in tzaj kꞌonte xnakꞌtzbil weye tzaꞌn tten tuꞌn tbant nkꞌojine, ex a in tzaj kꞌonte wipune tuꞌn tliꞌpj tiꞌj xobl plech wuꞌne, aju kꞌan cꞌuxbil ttxꞌotxꞌil.

35 Aya colol wiꞌje ex in chin clete tuꞌna, tzyuꞌn kine tuꞌn tbankꞌaba; tuꞌnju t-xtalbila puro baꞌn ma tzꞌel weye.

36 Mya cyuw ma tzꞌeꞌla nbeye tuꞌna, ex bajx che ex jilj ke nkane.

37 Inx lpeꞌye cyiꞌj aj kꞌoj wiꞌje, ex e pon cnet ke wuꞌne, maxi in ajtze tejxi cycub baj wuꞌne.

38 Cub cyiꞌj wuꞌne ex e cub tzꞌak twitz txꞌotxꞌ. Mintiꞌtl e jaw weꞌ. E cub tzꞌak ke t-xe nkane.

39 Aya tzaj kꞌonte wipumale tuj kꞌoj; o tbinchaya tuꞌn cycub mocꞌeꞌ ke xjal nwitze, akeju aj kꞌoj wiꞌje,

40 ex nwitze e jeꞌl ok ke aj kꞌoj wiꞌje; cyjaꞌtzun e naj wuꞌne akeju in che el icꞌun weye.

41 E kanin onbil, pero misicyer jun onin cyiꞌj; e cubsan twitz Kman, pero mintiꞌ e tzaj ttzakꞌweꞌn.

42 Biꞌx e naj wuꞌne mer ic tzaꞌn kuk in xi tiꞌn cykꞌikꞌ. E baj nwabane mer ic tzaꞌn txꞌotxꞌ tuj cay.

43 Ma chin clete tuꞌna te jun tnam miban bin, ma chin oc tkꞌoꞌna te nejenel cyibaj ke nasyon, ke xjal mintiꞌ ojtzkiꞌn wuꞌne in che ajben weye.

44 Oc in chin yoline cye in chinx cyniman, ex in chin cub biꞌne cyuꞌn ke stranjer xjal.

45 Ke stranjer xjal in tzaj tchi cyiꞌj, ex in che luꞌlun oc cyetz tuj lugar te cycolbil cyib.

46 Itzꞌ te Kman. Nimanxwit aju colol wiꞌje. Jawxwit nimsaꞌn Dios aju clol weye.

47 Atzunju Dios ma kꞌonte t-xel cyiꞌj ke aj kꞌoj wiꞌje, ex ma che cyaj tkꞌoꞌn ke tnam tjakꞌ ncawbile.

48 Ate Kman ma clon weye cye ke aj kꞌoj wiꞌje, akeju jaw cyiꞌn cyib tuꞌn cykꞌojin wiꞌje. Aya Nman, ma chin clete tuꞌna tuj cykꞌab ke xjal jawni cywitz tuꞌn cykꞌojin.

49 Cyjaꞌtzun cjawil nnimsaꞌne tbiya cyxol ke nasyon, ex chin bitzale tuꞌn tjaw nimset tbiya.

50 In tkꞌoꞌna tipumal ju rey scꞌoꞌmaj tuꞌna tuꞌn tcub cyiꞌj ke aj kꞌoj tuꞌn; cucx in tbinchaꞌna xtalbil te David ex cye ke tiyjil.