2 Tuꞌna ctzajel tbinchaꞌna wiꞌje, porque baꞌn tuꞌna alcye aju tzꞌaklxix.

3 Aya in baj queꞌyinte ke nximbetze; nnuꞌl aja queꞌyil weye te konicꞌan; o chin oc tkꞌoꞌna tuj malbil ex mintiꞌ ma cnet jun mya baꞌn wiꞌje tuꞌna. Bajx txi nmaꞌne jun tiꞌxti mya tuj tumelxix,

4 ic tzaꞌn in cybinchaꞌn txkantl xjal; ma chin el lakꞌeꞌye tiꞌj cybe keju oꞌcx in che ximan tiꞌj tuꞌn tcub jun xjal cyuꞌn, ma nbinchaye ic tzaꞌnx in cymaꞌn ke tmandamyenta.

5 Cucx waꞌlxix kine tuj tbeya; bajx tzꞌel npaꞌn wibe tiꞌj.

6 Aya Dios, tiꞌja in jaw tkꞌajkꞌajel nwiꞌye, porque in chin tzaj ttzakꞌweꞌna; kꞌontz twiꞌya tiꞌj, ex bintza ke nyole.

7 Yecꞌuntza weye aju tcꞌujlalila tbanilxix, porque tuꞌna in che clet ke xjal, akeju in pon cyclon cyib tiꞌja tuꞌntzun miꞌn cynaj cyuꞌn ke aj kꞌoj cyiꞌj.

8 Chin tcwentin oca ic tzaꞌn t-santil ke tbakꞌ twitza; chin tcloma tjakꞌ t-xlecumal t-xicꞌa

9 cywitz ke xjal mya baꞌn in che oc tzokpaj wiꞌje, ex cywitz ke aj kꞌoj wiꞌje cytxolin cyib wiꞌje tuꞌn ncube cyuꞌn.

10 Akeju xjal lu cyuwxix cyanmi, in che yolin tucꞌil cynimbil cyib;

11 nikayin lepch ke wiꞌje ex in che ayon tiꞌj nok jnicꞌ or oc ncub tzꞌake cyuꞌn twitz txꞌotxꞌ.

12 Ic cyten ic tzaꞌn ke balun in che cub ten xkꞌukil tuꞌn ttzyet jun cycanb, ex ic tzaꞌn jun tal tman balun nnoꞌcx yutꞌeꞌ tuj tewbil.

13 Weꞌctza Nman, weꞌcuya cywitz ke jlu. Xon cuba ke twitz txꞌotxꞌ. Chin tcloma tuꞌn t-spadiya cywitz ke xjal mya baꞌn;

14 chin tcloma tuꞌnju tipumala cywitz ke xjal lu, Nman; lajoꞌn exa ke twitz txꞌotxꞌ lu, porque atzunju cyetzbil at tuj cychwinklal lu. Nok cucx queꞌyinxa ke, e tchmet nim cykꞌinumabl tuꞌntzun cywaꞌnxix ke cycꞌwaꞌl tiꞌj, ex tuꞌn t-sobryintl cye ke tal cychman.

15 Atzun weye, cꞌoquel nqueꞌyine twitza tuꞌnju tzꞌaklxix kine; oc chin jawil tzalaje oc toc nqueꞌyine twitza, oc tel nwatle.