Aju tuꞌn tkeꞌxix kcꞌuꞌj tiꞌj Kman
Bitz tuꞌn David
11
Tiꞌj Kman kꞌukl we ncꞌuꞌj. ¿Tikuꞌntzun in cymaꞌne weye cyjaꞌ: T-xi oka tjakꞌ cꞌul, ic tzaꞌn ke chyuꞌj?2 Queꞌyinxa ke xjal mya baꞌn; nnoꞌcx cykꞌoꞌn ke plech tuj takꞌal xobl te, ex nneꞌl cyxkinin, ex tuj jun lugar tuj ewaj in xi cyxoꞌn cyiꞌj ke xjal tzꞌaklxix.
3 Ka ma cub xitj ju ley ex cawbil tuj jun tnam, ¿titzun cbantel tuꞌnju xjal tzꞌaklxix? Che chi xjal weye.
4 Ate Kman atzun taꞌ tuj tja xjan. Tuj cyaꞌj taꞌ tkꞌukbil jatum in cawin, ex toc twitz cyiꞌj cycyakil xjal, alcye in cybinchaꞌn.
5 Aju xjal tzꞌaklxix ex aju xjal mya baꞌn in che oc tkꞌoꞌn Kman tuj malbil, in che el ticꞌun keju oꞌcx in che ximan tiꞌj tuꞌn tcub jun xjal cyuꞌn.
6 Ctzajel tchitun Kman kꞌakꞌ tucꞌix azufre cyibaj ke xjal binchal mya baꞌn, ex ctzajel jun cykꞌikꞌ tuꞌn, tuꞌn tbaj tzꞌeꞌy tcyakil. Cbel cycastiw tuꞌn Kman.
7 Ate Kman tzꞌaklxix ex in tzalaj tiꞌj tuꞌn tbinchet aju tzꞌaklxix; cyjaꞌtzun aju xjal in bet tuj tumelxix cꞌoquel tqueꞌyin twitz Dios.