2 Ke xjal mya baꞌn in jaw cyniman cyib, in baj cyyajlaꞌn ke meba xjal; pero ax che cyjel tzyuꞌn cyuꞌn ke cꞌobil cyuꞌnx otok cub cykꞌoꞌn.

3 Ke xjal mya baꞌn in jaw cyniman cyib tiꞌj cyex cyajbil; ex ke xjal in pon cycꞌuꞌj tiꞌj nimcu, icꞌun Kman cyuꞌn ex in che yolin mya baꞌn tiꞌj.

4 Ke xjal mya baꞌn in jaw cyniman cyib ex in cymaꞌn: Mintiꞌ Dios at. Mi aꞌl jun jacu tzaj kaninte tajlal kakꞌunben, che chi. Atzun jlu in cub cyximan.

5 Masque icju, cucx nneꞌl baꞌn aju in cybinchaꞌn. Mintiꞌ nneꞌl cynicꞌ cyiꞌj ke tleya. In che oc ten xmayil cyiꞌj ke aj kꞌoj cyiꞌj,

6 ex in cub cyximan: Mi aꞌl jun jacu xcyeꞌ kiꞌj tuꞌn kcub tzꞌak, ex mlayx tzaj jun tiꞌxti mya baꞌn kiꞌj, che chi.

7 Nojni tuj cytziꞌ xjal lu tuꞌn yasbil, tuꞌn nicꞌaj yol, ex tuꞌn cyyol in cub cyyajlaꞌn ke xjal. Nok tocx tuj cytziꞌ ke yol mya baꞌn tuꞌn cyyajlan cyiꞌj xjal.

8 In che cub ten xkꞌukil cyuj ke aldey, ex tuj ewaj in cub cybyoꞌn jun xjal mintiꞌ til. Mintiꞌ nneꞌl cyiꞌn cywitz cyiꞌj ke xjal mi aꞌl jun colol cyiꞌj;

9 ic cyten ic tzaꞌn jun balun tocx tuj tjul, max tuj cyewbil in che cub ten xkꞌukil cyiꞌj ke xjal meba, in che ayon tuꞌn cytzyet cyuꞌn ex oc in che tzyet cyuꞌn, in xi cyjawoꞌn.

10 In che cub jokeꞌ, nnoꞌc cyyutꞌin cyib, ex in cheꞌx tꞌicpaj tzyulte cye xjal mi aꞌl jun colol cyiꞌj.

11 Tuj cywitz xjal mya baꞌn, nnicꞌ tnaꞌnjtz tuꞌn Dios ex txayin twitz Dios tuꞌn xbalun ex misicyer jun in til.

12 Weꞌctza Nman, nukpinx tkꞌaba. Miꞌn tzicꞌ tnaꞌl tuꞌna ke xjal ateꞌ tuj bis.

13 Nman Dios, ¿tikuꞌn cꞌoquel xmayina cyuꞌn ke xjal mya baꞌn, akeju in che ximan tiꞌj ka miꞌn tzaj tkanin Dios tajlal cyakꞌunben?

14 Nman, ma tila aju cꞌixbisabl in cybinchaꞌn kiꞌje, ojtzkiꞌn tuꞌna tcyakil jlu ex cbel tkꞌoꞌna cycastiw ic tzaꞌnx cybinchben. Aju xjal mintiꞌ tipun tuꞌn tclonte tib in xi tokxenan tib teya; aya in onin cyiꞌj ke cꞌwaꞌl mintiꞌ cyman ex cytxuꞌ.

15 Kꞌiꞌmela cyipumal ke xjal mya baꞌn, kꞌoꞌnca ke tuj xjel tiꞌj tcyakil cybinchben mya baꞌn.

16 Ate Kman rey te jumajx; ke txkantl nasyon mya nimal Dios oc che elex lajoꞌn ke tuj txꞌotxꞌ etzan tuꞌn.

17 Nman, in tzaj tbiꞌna cynaꞌj Dios ke xjal mans, in xi tcyuwsaꞌna cycꞌuꞌj ex in che tzaj tbiꞌna ke.

18 Binchanxa cyiꞌj ke cꞌwaꞌl mintiꞌ cyman ex cytxuꞌ ex ke xjal in che baj yajlaꞌn, tuꞌntzun miꞌn cucx cyxobtzan xjal banin ke tiꞌj txꞌotxꞌ.