Akꞌbil chjonte te Dios tuꞌnju tzꞌaklxixte
Bitz tuꞌn David
9
Aya Nman, cjawil nnimsaꞌne tuꞌn tcyakil wanmiye, ex cxel nmaꞌne cye cycyakil xjal ke tbinchbena in che bant maꞌxix cyxilen.2 Aya Nman maꞌxix toclena, chin jawil schꞌine tuꞌn tzalajbil tiꞌja; che xel nbitzane ke bitz tiꞌj tbiya.
3 Ke aj kꞌoj wiꞌje in che el ok twitza; in che cub tzꞌak ex in che cyim.
4 Aya jwes tzꞌaklxix ma cub keꞌya tuj tkꞌukbila tuꞌn ttzaj tbinchaꞌna wiꞌje.
5 Ma cheꞌx tcawina ke mastl nasyon, ma che naj tuꞌna ke xjal binchal mya baꞌn. Ma naj cybi tuꞌna, tuꞌn miꞌn cytzaj naꞌntl.
6 Ma che cyim ke aj kꞌoj, ex cyucꞌix ke cytanmi ma che naj junx cyucꞌil; tuꞌna ma cub t-xituna ke jlu, ex mintiꞌ jun ma cyaj ten tuꞌn ttzaj naꞌn tiꞌj.
7 Cucx ctel Kman te rey te jumajx; ma tcyuwsa tkꞌukbil tuꞌn cyoc ke xjal tuj xjel tuꞌn.
8 Che oquel ke nasyon tuj xjel tuꞌn tuj tumelxix, ex cbel tkꞌoꞌn cysentens ke tnam tuj tumelxix.
9 In colin Kman cyiꞌj keju in che baj yajlaꞌn; in colin cyiꞌj tuj tkꞌijlalil yajbil cye.
10 Aya Nman, akeju ojtzkiꞌna cyuꞌn, kꞌukl cycꞌuꞌj tiꞌja ex mintiꞌ in che cyaj tcolina keju in che kanin onbil teya.
11 Che bitzane bitz te nimbil te Kman aju in cawin tuj tnam Sión; cykꞌmanxe cyuj ke tnam aju o tbincha.
12 Cucx in tzaj tnaꞌn Dios keju in che bisun ex mintiꞌ nnicꞌ tnaꞌl cyokꞌel tuꞌn; ex in cub tkꞌoꞌn cycastiw keju in che yajlan cye.
13 Aya Nman, kꞌakꞌantz tcꞌuꞌja wiꞌje, queꞌyintza, lu kine in chin yajlanjtze cyuꞌn keju in che icꞌun wiꞌje, chin tcloma te camic,
14 tuꞌntzun t-xi nmaꞌne cye xjal ttzi tpwertil tnam Jerusalén ka aya at toclena tuꞌn tjaw nimsaꞌna, ex in chin tzalaje porque tuꞌna ma chin clete.
15 Ke txkantl nasyon tuj cyex cycꞌobil in che cub tzꞌak; ex in cyaj kꞌeꞌt cykan tuj cꞌobil in cyaj cykꞌoꞌn tuj ewaj.
16 Ate Kman ma txi tyecꞌun tib tej xcub tkꞌoꞌn cysentens ke xjal mya baꞌn. Ma che cub tzꞌak ke xjal mya baꞌn tujx cybinchben.
17 Ke xjal mya baꞌn, ex keju mya ocslal tiꞌj Dios, ex keju nnicꞌ tnaꞌl Dios cyuꞌn, che pol baj tuj cynajbil cyimni.
18 Mya te jumajx cꞌicꞌel cynaꞌnjtz ke xjal meba, ex mya te jumajx miꞌn japun aju onbil in che ayon tiꞌj.
19 Weꞌctza Nman, miꞌn txi tkꞌoꞌna ambil cye xjal tuꞌn tcub tiꞌja cyuꞌn, kꞌon cuba cysentens ke txkantl nasyon.
20 Nman, tzajwit cyxobil tuꞌna. Tzꞌelwit cynicꞌ tnam xjal tiꞌj ka nok elajx jun xjal ke.