2 Porque ic cyten ke jlu ic tzaꞌn ke balun; mya yajcu chin baj paẍuꞌne cyuꞌn ex mi aꞌl jun jacu tzaj colol wiꞌje.

3 Aya Nman Dios, ¿alcyetzun o nbinchaye cyxol ke jlu? ¿Atpetzun jun mya baꞌn o nbinchaye?

4 ¿Opetzun nbinchaye mya baꞌn tiꞌj jun wamiwoye te t-xel baꞌn otok tbincha weye? Nok oꞌcx o clet wuꞌne aju xjal nokx gan oc tkꞌon tib te aj kꞌoj wiꞌje.

5 Nokwit o nbinchaye ke jlu, tuj tumelxwitlo taꞌ tuꞌn cyoc lpeꞌ ke aj kꞌoj wiꞌje tuꞌn ntzyete cyuꞌn, ex tuꞌn ncub cyxoꞌn twitz txꞌotxꞌ, ex tuꞌn nbaj wabane cyuꞌn tuj kuk.

6 Weꞌctza tucꞌil tkꞌoja Nman. Weꞌcuya cywitz ke aj kꞌoj wiꞌje in che kꞌojl wen. Ttzaja Nman, binchantza wiꞌje ic tzaꞌn banimaj tuꞌna.

7 E toc cychmon cyib cycyakil nasyon twitza, ex atzun kꞌon cuba tkꞌukbila tuꞌn tcawina cyibaj.

8 Aya Nman, tuꞌna in che oc ke nasyon tuj xjel tiꞌj cybinchben; binchantza wiꞌje ic tzaꞌnx ntene tzꞌaklxix kine ex mintiꞌ wile.

9 Aya Dios tzꞌaklxix, in baj tqueꞌyina ke ximbetz ex aju in cynaꞌn xjal tuj cyanmi, kꞌmanxa cye xjal mya baꞌn tuꞌn miꞌn cybinchantl il, atzunte xjal baꞌn tmod cucx tenc tuꞌna waꞌlxix.

10 Aju colol weye ate Dios aju maꞌxix toclen, aju in che clet ke xjal baꞌn cymod tuꞌn.

11 Ate Dios jwes tzꞌaklxix, tcyakil maj at tkꞌoj cyiꞌj ke xjal mya baꞌn.

12 Katzun miꞌn ma tzꞌajtz tiꞌj tanmi xjal, cjawil tjakuꞌn Dios ttzi t-spad; ma tzꞌel t-xkinin takꞌal xobl tplech,

13 ma bant tten tuꞌn cyxi t-xoꞌn ke tplech in che cꞌant tuꞌn kꞌakꞌ, ex ma bant cyten ke tmacbil in che ajben tuj kꞌoj, akeju in che cyim xjal cyuꞌn.

14 Cyqueꞌyinxe aju xjal mya baꞌn; in cub ten ximal tiꞌj tuj tanmi tuꞌn tbinchante mya baꞌn, ex tujx tanmi in jatz jlet nicꞌaj yol.

15 Ma baj tbinchaꞌn jun jul matij t-xeꞌ ex tujx jul lu cxel tzꞌak.

16 Aju mya baꞌn in tbinchaꞌn xjal ex aju ttxꞌuꞌjil, tibajx che bel tzꞌak ke jlu.

17 Cjawil nnimsaꞌne Kman tuꞌnju tzꞌaklxixte; che xel nbitzane ke bitz tiꞌj tbi Kman aju maꞌxix toclen.