2 bintza aju ncubsbile aya Nreye ex Ndiose, porque twitza in chin cubsane.

3 Nman, primx in tzaj tbiꞌna tkꞌajkꞌajel nwiꞌye; cxel nmaꞌne ke ncubsbile teya ex chin ayole tiꞌj tzakꞌwebl tuꞌna.

4 Porque aya jun Dios mintiꞌ in tzalaja tiꞌj ju mya baꞌn; ke xjal mya baꞌn mlay che ankꞌin junx tucꞌila,

5 mlay che cub ten twitza ke xjal in jaw cyniman cyib. In che el ticꞌuna ke xjal binchal mya baꞌn,

6 in che naj ke xjal nicꞌal yol tuꞌna, ex in che el ticꞌuna ke xjal sbul ex ke byol xjal.

7 Atzun weye, nok tuꞌnju tcꞌujlalila maꞌxix, jacu chin pon lakꞌeye twitz tjaya; jacu chin cꞌulune twitza tuꞌn tcyakil nimbil, ex tuꞌn t-xi nqueꞌyine tumlal tjaya xjan.

8 Nman Dios, nok tuꞌn cylaj ke aj kꞌoj wiꞌje chin t-ẍakluma, porque tzꞌaklxixa, ex chin tiꞌnxe tuj be baꞌn.

9 Mintiꞌ in che yolin jun yol axix toc ex jumajx mya baꞌn aju at tuj cyanmi. Aju tuj cykul mer ic tzaꞌn jun pantyón catl, ex aju cytziꞌ puro nicꞌal yol.

10 Nman Dios, kꞌoncuya cycastiw ke xjal lu. Miꞌn txi tkꞌoꞌna ambil tuꞌn tbant aju mya baꞌn in cub cyximan. Icꞌun ela ke tuꞌnju nim il in cybinchaꞌn ex tuꞌnju ma jaw cyiꞌn cyib tiꞌja.

11 Cuchiwt tuꞌn cytzalaj cycyakil keju nnoꞌc keꞌ cycꞌuꞌj tiꞌja ex cucx tuꞌn cybitzan tucꞌil tzalajbil, porque aya colol cyiꞌj. Ex keju toc cycꞌuꞌj tiꞌja cuchiwt che tzalajx ke tuꞌna.

12 Nman Dios, in cub tcyꞌiwlaꞌna aju xjal tzꞌaklxix ex txolin tiꞌj tuꞌn t-xtalbila; ic tten t-xtalbila tiꞌj ic tzaꞌn jun makbil in ajben tuj kꞌoj.