Oc keꞌxix tcꞌuꞌj David tiꞌj Kman
Bitz tuꞌn David
4
Chin ttzakꞌwentza Nman Dios oc ncubsane twitza porque aya colol weye. Tej nyajlanjtze in colpaje tuꞌna, kꞌakꞌantz tcꞌuꞌja wiꞌje ex bintza nnaꞌj Diose.2 Akeye xjal nnoꞌc cykꞌon cyibe te maꞌ cyoclene, ¿jtojtzun cyaj cycoline tuꞌn wel cyicꞌune? ¿Jtoj ban tcyaj cycoline tuꞌn cycꞌujlanteye aju mintiꞌ tajben ex aju nicꞌaj yol?
3 Tzꞌelx cynicꞌe tiꞌj, tuꞌnxte Dios ma che jaw t-scꞌoꞌn keju in che niman te; chin tzajel tbiꞌn Kman oc ncubsane twitz.
4 Tzajx t-xobil cyiꞌje ex miꞌn che binchane il. Che ximane tiꞌj jlu tuj cyanmiye oc cyxiꞌye tal, ex miꞌn che kꞌajte;
5 cykꞌonxe chojbil tuj tumelxix ex keꞌc cycꞌuꞌje tiꞌj Kman.
6 Nimcu in che kꞌmante: ¿Alcye ctzajel yeꞌcunte aju baꞌn keye? Che chi. Nman Dios, ko tqueꞌyintza tucꞌil tzalajbil.
7 Ma tzaj tkꞌoꞌna mas tzalajbil tuj wanmiye cywitz keju in jaw cychmoꞌn nim triw ex taꞌl twitz uva.
8 Txubtxaj in chin cub coẍeꞌye ex in chin tane, tuꞌnju oꞌcx aya kꞌukbalte ncꞌuꞌje, Nman.