2 ¿Jacupe tzꞌex tkꞌoꞌna jun cyꞌjaj tuj ttxaꞌn ex ka tuꞌn tjaw tjacꞌuꞌna tjakꞌ ttziꞌ tuꞌn jun answel?

3 ¿Jacupetzun cubsan twitza tuꞌn ttzaj tzꞌeꞌy tcꞌuꞌja tiꞌj ex cheba tuꞌn ttzaj tmaꞌn teya?

4 ¿Baka jacu bant tuꞌna tuꞌn ttzaj ttziyan teya tuꞌn toc te tmajena te jumajx?

5 ¿Jacupe tzꞌoc tena sakchal tucꞌil ic tzaꞌn tucꞌil jun chyuꞌj? ¿Jacupe cꞌalet tuꞌna tuꞌn toc te cychak ke tal tmeꞌjela?

6 ¿Jacupe che lijensin ke tzyul cyiẍ tiꞌj? ¿Jacupe cub cykesin tuꞌn t-xi cycꞌayin?

7 ¿Jacupe txiꞌ tzꞌupl tplecha tuj ttzꞌumal ex jacupe txiꞌ tzꞌupl tlansa tuj twiꞌ?

8 Nokpe ka ma pon tkꞌoꞌna tkꞌaba tibaj, jurat cꞌoquel tzokpaj tiꞌja; mlay tzicꞌ tnaꞌl tuꞌna ex mlay tbinchaya juntl maj.

9 Nok oꞌcx ka ma tzꞌoc queꞌyin aju nintz txcup Leviatán tuꞌn jun xjal, jurat naj jacu cub numj xjal tuꞌn t-xobil.

10 Ka at jun ma tzꞌocx icꞌlen te, in tzaj naj tkꞌoj ex mi aꞌl jun jacu tnimari tib tucꞌil.

11 ¿Alcye jun xjal jacu clet ex miꞌn tzaꞌw ka ma tzꞌoc tzokpaj tiꞌj? Mi jun tuj enter twitz txꞌotxꞌ.

12 Mlay tzꞌel tiꞌj tuꞌn nyoline tiꞌj t-ximlal tbanilxix queꞌyin ex tiꞌj tipumal nimxix.

13 ¿Alcye jun jacu tzꞌel kꞌinte ttzꞌumal toc tiꞌj ex ka tuꞌn t-xoptzꞌaj ttzꞌumal aju in ajben te tcolbil tib?

14 ¿Alcye jun jacu tzꞌel jachinte tuj ttziꞌ tuꞌn cylaj ke twitz teꞌ txolin cyel ex xobajilxix che queꞌyin?

15 Aju ttzal tiꞌj mer ic tzaꞌn makbil txolin cyel tiꞌj ex cyuw ke wen ic tzaꞌn abj,

16 tlatzꞌin tib jun tiꞌj juntl; mi ju cykꞌikꞌ mlay tzꞌocx tuj;

17 cymojban cyib ex cykꞌeꞌtin cyib wen, mi aꞌl jun jacu tzꞌel paꞌnte cye.

18 Oc in tzaj kꞌajt tuj ttxaꞌn, mer ic tzaꞌn tkan kꞌancyok, ex ke tbakꞌ twitz in che koptzꞌaj wen ic tzaꞌn kꞌij oc tjawil te prim.

19 Mer ic tzaꞌn tkan kꞌakꞌ nneꞌtz tuj ttziꞌ, ex in che etz cꞌech tuj.

20 Nneꞌtz sib tuj ttxaꞌn, mer ic tzaꞌn jun cꞌil aꞌ in lokin tibaj kꞌakꞌ.

21 Biꞌx in cꞌant xkꞌaꞌl tuꞌn t-xew ex nneꞌtz tkan kꞌakꞌ tuj ttziꞌ.

22 Aju tkul puro cyuw wen, ex cycyakil xjal in tzaj cyxobil twitz ju txcup lu.

23 Ax icxpe tchibjal cyuw wen, mer ic tzaꞌn cꞌuxbil.

24 Puro cyuw tanmi, mer ic tzaꞌn jun abj ex ic tzaꞌn jun cyaꞌ.

25 Oc tjaw weꞌ txcup lu, biꞌx in che tzaj xob keju at nimxix cyipun ex in che el ok in che xob wen.

26 Oc takꞌpon tzokpiꞌn spad tiꞌj, ex ka lans ex ka plech ex ka lans chꞌin tkan, mintiꞌ chꞌin cyilwi.

27 Mer ic tzaꞌn chꞌim nneꞌl cꞌuxbil tuj twitz, ex mer ic tzaꞌn kꞌuꞌchin tzeꞌ nneꞌl kꞌan cꞌuxbil tuj twitz.

28 Oc t-xi xoꞌt plech tiꞌj mlay tzꞌel ok; oc t-xi xoꞌt abj tiꞌj, mer ic tzaꞌn chꞌim in xi xoꞌn tiꞌj nneꞌl tnaꞌn.

29 Oc takꞌpon tzokpiꞌn jun garrot maꞌ tcꞌitz tiꞌj, mer ic tzaꞌn jun ajlaj nneꞌl tuj twitz ex in jaw tzeꞌn tiꞌj tkꞌajkꞌajel lans chꞌin tkan oc t-xi xoꞌt tiꞌj.

30 Oc t-xi tjakun tib twitz txꞌotxꞌ, biꞌx in xi julix tuj txꞌotxꞌ, mer ic tzaꞌn texlen ttzi punt.

31 Biꞌx in jaw pulin nintz mar maꞌ t-xeꞌ tuꞌn, mer ic tzaꞌn jun cꞌil in pulin aꞌ tuj tibaj kꞌakꞌ, ex cyjaꞌtl nnoꞌc tuꞌn ic tzaꞌn jun cꞌil tcubil perjum in pulin tibaj kꞌakꞌ.

32 Oc in bet tuj aꞌ biꞌx in cyaj ticꞌlen puro sak, in koptzꞌaj ic tzaꞌn ttzmal wibaj puro sak wen.

33 Tuj enter twitz txꞌotxꞌ misicyer jun nchꞌisbene in pon ic tzaꞌn te, mintiꞌ chꞌin in xob.

34 Oc in cheꞌx tqueꞌyin cycyakil txkantl txcup jawni ke, mintiꞌ nneꞌl xob cyiꞌj, porque a rey cye, chi Dios baj tmaꞌn te Job.