40
Xi tmaꞌntl Kman te Job cyjaꞌ:2 Atzun teya, taja tuꞌn woque tuj xjel tuꞌna, akine aju at wipumale tuꞌn tbant tcyakil wuꞌne, ex ¿cucxpe cꞌoquel tzokpaja wiꞌje tuꞌn tyola? 3-4 Xitzun ttzakꞌweꞌn Job te Kman:
¿Ti baꞌn t-xi nmaꞌne? Ic tzaꞌn weye, baka maꞌ nxilene. Mas baꞌn tuꞌn mi nkꞌajte.
5 O chin yolinxe ex mintiꞌ mastl yol tuꞌn t-xi nmaꞌne.
Oc juntl maj Job tuj xjel tuꞌn Dios
6 Tzajtzun yolin Kman juntl maj tucꞌil Job tuj txkan cykꞌikꞌ jbal ex tma:
7 Yecꞌuntz tipumala weye jaꞌlo ex tzakꞌwentza ke nxjele lu:
8 ¿Tajpeya tuꞌn ttzaj tmaꞌna ka mya tzꞌaklxix kine ex ka at wile, atzun teya tuꞌn toc tkꞌon tiba te tzꞌaklxix?
9 ¿Maspetzun nim tipumala nwitze? ¿Jacupe kꞌajt kꞌancyok tuꞌna ic tzaꞌn in kꞌajt wuꞌne?
10 Ka ax toc tuꞌna at tipumala ic tzaꞌn weye, kꞌoꞌnc toclena te maꞌxix, kꞌoꞌnc tajwalila ex kꞌoꞌnc t-spicꞌumala, tuꞌntzun tjaw nimsaꞌna wen.
11 Queꞌyinxa keju in jaw cyniman cyib, tzajx nim ttxꞌuꞌjila cyiꞌj ex che tmansin cuba ke.
12 Ax toc baꞌn tuꞌn cynaj tuꞌna oc t-xi tqueꞌyina cyiꞌj, che betzꞌan baja ke binchal mya baꞌn nok jatum ateꞌ.
13 Che tmakun cuꞌxa cycyakil tuj txꞌotxꞌ ex lamoꞌn ocxa ke tuj presbil cye cyimni.
14 Katzun ma bant tcyakil jlu tuꞌna, atzun cꞌelel nnicꞌe tiꞌj ka tuꞌnx tipumala jacu bant tclonte tiba.
15 Ximana tiꞌj nintz txcup Behemot tbi, aju nchꞌisbene ic tzaꞌn aya. Baꞌn waꞌn cꞌul ic tzaꞌn wacẍ.
16 Puro cyuw tchibjal toc ttzal tiꞌj ex ju tchibjal toc tjakꞌ tcꞌuꞌj at nim tipun.
17 Puro cyuw tjeꞌ, mer ic tzaꞌn tzeꞌ wiꞌten, ex ke tbotxꞌil tcux, mojmoj cyten.
18 Ke tbakil mer ic tzaꞌn jun tubo kꞌan cꞌuxbil ttxꞌotxꞌil, ex mer ic tzaꞌn barret.
19 Atzun wakꞌunbene jlu mas maꞌ toclen; oꞌcx wuꞌne jacu cub tiꞌj, porque akine in binchante te.
20 Ke witz jatum in che sakchan ke txcup in tzaj cypokꞌsaꞌn cꞌul te twa.
21 Nnoꞌcx buneꞌ tjakꞌ t-xlecumal tzeꞌ ex nnoꞌcx tewan tib tjakꞌ tkan ajlaj tuj soban.
22 Ke tzeꞌ in cykꞌoꞌn xlecun tibaj ex atzun nnoꞌcx ten cyjakꞌ ke chjaj ateꞌ ttzi tkꞌab xak.
23 Ka ma chꞌiy nima mintiꞌ in xob, masque japun aꞌ tjakꞌ ttziꞌ, pero mintiꞌ in tzaj baj tcꞌuꞌj.
24 ¿Alcye jun jacu tzaj tzyunte te tuꞌn tjatz tiꞌn ke tbakꞌ twitz ex ka tuꞌn tex tkꞌoꞌn jun sakbak tuj ttxaꞌn?