2 Baꞌnpe tuꞌna jteꞌ xjaw in japun cyuꞌn tuꞌn tcub cyal?

3 In che cub buneꞌ ex in cubtzun cyal.

4 Oc cychꞌiy ke cyal ex oc toc cyipun in cyaj cycolin cytxuꞌ ex mintiꞌtl in che ul meltzꞌaj.

5 ¿Alcye el tzokpinte te bur te tjakꞌ cꞌul? ¿Alcye o tzꞌel kitpunte te?

6 Akine inx yecꞌunte tnajbil tuj tzkij txꞌotxꞌ ex tuj chkꞌajlaj mintiꞌ awal in tzaj chꞌiy tuj.

7 Tcꞌiꞌ tiꞌj tkꞌajkꞌajel in jaw tuj tnam cyuꞌn xjal, ex mi tuꞌn t-xi tniman tkꞌajkꞌajel twiꞌ lajol chej.

8 In bet ticꞌ cywiꞌ tal witz in jyon twa, in jyon tiꞌj nok alcye txcaj chaꞌx cꞌul tuꞌn t-xi twaꞌn.

9 ¿Chipetzuna ka jacu tajbe tor te tjakꞌ cꞌul tuꞌn tajben teya ex tuꞌn tjawil tkꞌij tuj tpeꞌna?

10 ¿Jacupe cꞌalet yuw tiꞌj tkul tuꞌna ex tuꞌn toc tkꞌoꞌna jwers tiꞌj tuꞌn tchꞌoquin ex ka tuꞌn t-xi lpeꞌ tiꞌja tuꞌn tbaj parejit twitz txꞌotxꞌ?

11 ¿Jacupe tzꞌoc keꞌ tcꞌuꞌja tiꞌj tuꞌnju at nim tipun ex tuꞌn tcyaj tkꞌoꞌna tuꞌn tbinchante takꞌuna?

12 ¿Chipetzuna ka jacu tzꞌajben tuꞌna tuꞌn tjaw chmet twitz tawala ex tuꞌn toc tchmoꞌna twitz tawala jatum nneꞌl bajut?

13 Ex lu jun nintz chyuꞌj avestrúz tbi, in che yucch ke tkꞌab tucꞌil tzalajbil mer ic tzaꞌn tkꞌab garza,

14 in che cyaj tkꞌoꞌn ke tjos tjakꞌ ttxa tzꞌaꞌn tuꞌntzun cymekꞌt tuꞌn tcyakal kꞌij.

15 Misicyer in ximan tiꞌj ka tuꞌn cybaj pax ke tjos tjakꞌ tkan jun xjal ex ka tjakꞌ tkan jun jil.

16 Puro jawni cyiꞌj ke tal, mer ic tzaꞌn mya tal ke in che el tuj twitz, ex mintiꞌ in tzaj tbis tiꞌj ka mintiꞌ ma tzꞌel wen takꞌunben.

17 In bant jlu tuꞌn, tuꞌnju mintiꞌ xi nkꞌoꞌne tojtzkibl ex tnabl.

18 Pero oc in jaw weꞌ ex oc toc ten kelel, nnoꞌc ten tzꞌeꞌl cyiꞌj ke chej ex cyiꞌj keju cyjax cyibaj, porque mas cyuw ojkelan cywitz.

19 Baka aya o kꞌonte tipumal chej, ex ¿tuꞌnpetzuna oc tkꞌoꞌna ttzmal tkul puro mejor queꞌyin?

20 ¿Baka tuꞌna in bant ttꞌicpaj ic tzaꞌn ẍplon oc t-sjorin tuj ttxaꞌn puro xobajilxix?

21 In jaw t-scatin txꞌotxꞌ tuꞌn tipun tuj chkꞌajlaj ex mintiꞌ t-xobil tuꞌn t-xiꞌ ojkelan tuj kꞌoj.

22 In jaw tzeꞌn tiꞌj ju xobtzal ex mintiꞌ in tzaj tchi tiꞌj; mintiꞌ in tzaj baj tcꞌuꞌj twitz spad,

23 masque in swocꞌin aju tcubil tplech xjal tjax tibaj ex nneꞌl cyꞌech tiꞌj lans ex cyiꞌj ke lans chꞌin cykan.

24 Tuꞌnju in ojkelan wen, mintiꞌ tilwi tuj twitz tuꞌn tpon naj tuj juntl lugar ex oc tkꞌajt chun ya mlay cub weꞌ mastl.

25 Oc tbinte tkꞌajkꞌajel chun, in tzaj sjorin ttxaꞌn; in tnaꞌn naj t-xewil oc toc kꞌoj najchak wen, ex in tbiꞌn tkꞌajkꞌajel twi nejenel cye soldad ex ju sichꞌ in jaw.

26 ¿Apetzuna at nim tnabla tuꞌn t-xi t-xnakꞌtzaꞌna tuꞌn tbant tlipan ju kꞌanjan ex tuꞌn t-xi lipan tuj tnayaj kꞌij?

27 ¿Tuꞌnpetzuna xi tmaꞌna te tꞌiw tuꞌn tbinchante tkꞌuꞌ cywiꞌ nmak witz?

28 Aju tꞌiw najl tuj tcꞌuꞌj xak twitz pic ex in baj tbinchaꞌn jun colbil tib twiꞌ jun ttzꞌuꞌpil pic;

29 maxtzun ma jawni in tzaj tqueꞌyin tcanb.

30 Ke tal puro chicꞌ cywa in baj, ex jatum taꞌ jun cyimni, atzun taꞌ tꞌiw.