3 Bincham ttena ka ax toc tuꞌna, ex tzakꞌwentza ke nxjele lu:

4 ¿Jatum taꞌtoka tej tcub nkꞌoꞌne t-simyentil txꞌotxꞌ? Kꞌmantza weye ka baꞌn tuꞌna.

5 ¿Baꞌnpe tuꞌna alcye cub ximante nicꞌpun tuꞌn toc, ex alcyeju akꞌnal at nim tnabl binchante te?

6 ¿Titzun tcub tjakꞌ tkꞌukbil ex alcyetzun cub kꞌonte nintz abj te tzuybil te,

7 tej in che bitzantok cycyakil ke cheꞌw t-xe cyaꞌj junx cyucꞌil cycyakil ke anjel in che tzalaj tuj cyaꞌj?

8 Tej tjatz tilj mar tuj txꞌotxꞌ, ¿alcye oc kꞌonte tlamel tuꞌn tweꞌ?

9 Xi nkꞌoꞌne muj te txaybil te mar ex kꞌek muj tuꞌn tbaj bokꞌit tuj.

10 Cub nkꞌoꞌne jun techal jatum tuꞌn tweꞌ mar ex biꞌx oc nkꞌoꞌne tal tlamel.

11 Ex xi nmaꞌne te: Atzun tzul weꞌya tzalu ex oꞌcxtzun tzul weꞌya, mlay tzicꞌa tibaj ex atzun cpol baj pulin tipumala.

12 ¿Tuj tankꞌibla ope txi tmaꞌna jun maj tuꞌn ttzaj spicꞌeꞌ t-xe cyaꞌj ex tuꞌn tjawil kꞌij,

13 tuꞌntzun tpon baj spicꞌun tuj tcyakil twitz txꞌotxꞌ ex tuꞌntzun tbaj tchtoꞌna ke binchal mya baꞌn?

14 Kꞌanchaꞌlintzun tilbilal twitz txꞌotxꞌ ic tzaꞌn oc nnoꞌc tcꞌaꞌ jun xbalun.

15 In cub t-xcꞌayin Dios spicꞌun cye ke binchal mya baꞌn ex atzun in pon baj twiꞌylal tuꞌn cybinchante mya baꞌn.

16 ¿Ope txi aja queꞌyilte max t-xeꞌ nintz mar jatum in jatz jlet twi aꞌ? 17 ¿Ope tzaj yecꞌun teya aju tpwertil cynajbil cyimni kloljxix wen?

18 ¿Baꞌnpe tuꞌna nicꞌpun twitz txꞌotxꞌ? Kꞌmantza weye ka ax toc baꞌn tcyakil jlu tuꞌna.

19 ¿Jatum cꞌuꞌn spicꞌun ex klolj?

20 ¿Tzinpe in bant tuꞌna tuꞌn cyxi t-samaꞌna max t-xe cyaꞌj ex tuꞌn cyajtz meltzꞌaj tuꞌn cyul tuj cyja?

21 Baꞌnlo tuꞌna porque baka neꞌxi tabkꞌiyila; otoklo itzꞌja tej cybant jlu.

22 ¿Ope txi aja queꞌyilte jatum cꞌuꞌn ttxa cheꞌw wuꞌne ex sakbakun,

23 tuꞌntzun cytzaj nsamaꞌne tuj tkꞌijlalil yajbil ex tkꞌijlalil oc toc kꞌoj?

24 ¿Alcye be in xi tiꞌn tkan kꞌancyok oc tcub koptzꞌaj? ¿Alcye tumlal in baj t-sipan tib cykꞌikꞌ twitz txꞌotxꞌ, aju in tzaj tuj tjawitz kꞌij?

25 ¿Alcye in jakonte tbe jbal tuꞌn ttzaj nim? ¿Alcye in yecꞌunte tbe tkan kꞌancyok ex cykꞌikꞌ jbal,

26 tuꞌntzun ttzaj jbal tuj tzkij txꞌotxꞌ jatum mintiꞌ xjal najl tuj,

27 ex tuꞌn taꞌlin tiꞌj tzkij txꞌotxꞌ, tuꞌntzun ttzaj tpokꞌsaꞌn chaꞌx cꞌul?

28 ¿Atpe tman jbal ex atpe tman tkꞌab cheꞌw?

29 ¿Alcye ttxuꞌ tkꞌab cheꞌw ex alcye ttxuꞌ nintz yelo?

30 ¿Al uꞌn nnoꞌc aꞌ cyuw wen ic tzaꞌn abj, ex nnoꞌc tibaj nintz mar cyuw wen tuꞌn?

31 ¿Jacupe bant tuꞌna tuꞌn cyoc tcꞌaloꞌna jun cꞌloj cheꞌw Pléyades cybi tuꞌn cyten junx? ¿Jacupe bant tuꞌna tuꞌn cyel tpjuꞌna juntl cꞌloj cheꞌw, Orión cybi, tuꞌn tel cypaꞌn cyib?

32 ¿Apeya nneꞌtz kꞌinte ju cheꞌw jakol t-xe cyaꞌj oc tpon or tuꞌn tjawil? ¿Apeya ẍaklul cye jun cꞌloj cheꞌw Osa Mayor cybi ex juntl cꞌloj Osa Menor cybi?

33 ¿Loꞌnpe tuꞌna aju ley tcub cyibaj ke cheꞌw twitz cyaꞌj? ¿Apeya in kꞌonte ju ley lu twitz txꞌotxꞌ?

34 ¿Jacupe txi tmaꞌna te muj tuꞌn ttzaj nim jbal tibaja tuꞌn?

35 Ka ma txi tmaꞌna te tkan kꞌancyok tuꞌn t-xiꞌ tuj juntl part, ¿jacupe tzaj ttzakꞌweꞌn teya cyjaꞌ: Lu kine lu, alcye taja tuꞌn tbant wuꞌne, chipe?

36 ¿Alcye xi kꞌonte nabl tuj tanmi xjal? Alcye xi kꞌonte tojtzkibl?

37 ¿Alcye jun at nimxix tnabl tuꞌn tel tnicꞌ tiꞌj nicꞌpun muj at? ¿Alcye jun jacu tzꞌetz kꞌinte jbal tuj muj tuꞌntzun ttzaj tkꞌoꞌn jbal,

38 tuꞌn toc tkukil txꞌotxꞌ te xokꞌl ex tuꞌn cyoc kꞌeꞌt ke kꞌubin jun tiꞌj juntl?

39 ¿Apeya in tzaj jyonte cycanb ke ttxu balun tuꞌn cychyoꞌn ke tal tiꞌj ocxi cynoj,

40 oc in xi cyewan cyib tuj cyjul ex oc in che cub ten xkꞌukil tjakꞌ chcꞌul?

41 ¿Alcye in kꞌonte cywa joj oc in che jyon ke cyal tiꞌj cywa ex in che kꞌajt wen oc in che kanin cywa weye?