2 Cybinxe tkꞌajkꞌajel twi Dios nneꞌtz tuj ttziꞌ; in jululun ic tzaꞌn kꞌancyok.

3 In xi tkoptzꞌiꞌn Dios xleꞌlaj cyaꞌj tuj tcyakil twitz cyaꞌj, in tzaj tuj jun pacꞌ ttxaꞌn txꞌotxꞌ tuꞌn tpon tuj juntl pacꞌ.

4 Jurat in binjtz tkꞌajkꞌajel twi Dios, jun tkꞌajkꞌajel twiꞌ maꞌxix toclen; ex oc tbinjtz tkꞌajkꞌajel kꞌancyok, cucx in che tzaj koptzꞌaj tkan kꞌancyok.

5 Oc tkꞌajt tkꞌajkꞌajel twi Dios, nimcu tbinchben maꞌxix cyxilen in che bant tuꞌn, ex in tbinchaꞌn tbinchben maꞌxix t-xilen mlay tzꞌel knicꞌ tiꞌj.

6 In tmaꞌn Dios tuꞌn tcub ttxa cheꞌw tibaj txꞌotxꞌ ex tuꞌnxte in tzaj nintz jbal.

7 Ex tuꞌn jbal in che cyaj ten xjal tuj cyja, tuꞌntzun tel cynicꞌ tiꞌj ka tuꞌn Dios jlu.

8 Ke txcup in che ocx tuj cyjul ex atzun in xi cyewan cyib.

9 Tuj tnayaj kꞌij in tzaj cykꞌikꞌ jbal ex tuj tbankꞌab kꞌij in tzaj taꞌw cheꞌw.

10 Tuꞌnju t-xew Dios in tzaj t-xupin, nnoꞌc aꞌ tuꞌn, te ttxa cheꞌw ex ke aꞌ maꞌxix in che tuxix tuꞌn.

11 Tuꞌn Dios at aꞌ tuj muj ex nneꞌtz tkan kꞌancyok tuj muj tuꞌn.

12 Tuj tcyakil twitz txꞌotxꞌ in lemtzꞌaj tkan kꞌancyok twitz cyaꞌj, tuꞌn tjapun tuꞌn alcyeju in tmaꞌn Dios.

13 Tcyakil jlu in ajben tuꞌn Dios tuꞌn ttzaj cycastiw xjal ex ka tuꞌn t-xi tyecꞌun t-xtalbil cye.

14 Chin tbintza Job, ximana tiꞌj tcyakil aju maꞌ t-xilen in bant tuꞌn Dios.

15 ¿Baꞌnpe tuꞌna tzaꞌn tten in cawin Dios tiꞌj tcyakil jlu, ex tzaꞌn tten in koptzꞌaj tkan kꞌancyok tuj muj?

16 ¿Baꞌnpe tuꞌna tzaꞌn tten ikan muj tuꞌn cykꞌikꞌ? A jlu jun techal tiꞌj tnabl Dios tzꞌaklxix.

17 ¿Baꞌnpe tuꞌna tzaꞌn tten in mekꞌt t-ximlala tuj t-xbaluna oc in xupin cykꞌikꞌ aju in tzaj tuj tnayaj kꞌij?

18 ¿Jacupe bant tuꞌn tonina tiꞌj Dios tuꞌn t-xi cylicꞌpuꞌna cyaꞌj, ex tuꞌn tcyaj ten mintiꞌ in yucch ic tzaꞌn jun espej cꞌuxbil?

19 Ko t-xnakꞌtzantza alcye baꞌn t-xi kmaꞌne te Dios, porque tuj klolj atoꞌye ex mintiꞌ baꞌn kuꞌne.

20 Weye mlay nnimari wibe tuꞌn nyoline tucꞌil Dios, porque a jlu jacu tzꞌajben te xitbil weye.

21 Mlay kil t-spicꞌumal kꞌij oc nnoꞌc klolj twitz tuꞌn muj, katzun ma tzꞌel xupin muj tuꞌn cykꞌikꞌ, atzunte cyaꞌj in cyaj kꞌanchaꞌl.

22 Mer ic tzaꞌn t-spicꞌumal kꞌan pwak in yecꞌunjtz tuj tbankꞌab kꞌij oc tbaj txolin tiꞌj Dios tuꞌnju nimxix tajwalil.

23 Mlay ko canun tiꞌj alcye t-ximbetz Dios aju at tipumal tuꞌn tbant tcyakil tuꞌn, porque ate cyuwxix ex tuj tjikumal tiꞌj in bant tuꞌn nok alcye taj. Tzꞌaklxix te Dios ex mintiꞌ in che baj tyajlaꞌn ke xjal nok cucx.

24 Cyjaꞌtzun in che xob xjal twitz Dios; misicyer cyxilen ke xjal at cynabl tuj twitz.