3 Cꞌajbel wuꞌne aju wojtzkible nimxix, tuꞌntzun t-xi nmaꞌne ka ax toc aju in tmaꞌn aju Binchal weye.

4 Cxel ncyuwsaꞌne teya; mlay txi nmaꞌne jun nicꞌaj yol; lu kine waꞌl twitza, akine jun xjal at nimxix nnable.

5 Ate Dios at nimxix tipumal ex at nimxix tnabl, ex mintiꞌ nneꞌl ticꞌun aju xjal mintiꞌ til.

6 Mlay cyaj ankꞌin ju xjal mya baꞌn tuꞌn, pero in xi tbinchaꞌn cyiꞌj ke meba xjal;

7 cucx in colin cyiꞌj ke xjal tzꞌaklxix ex in che oc tkꞌoꞌn te cawil junx cyucꞌil ke rey, ex nnoꞌc tkꞌoꞌn maꞌxix cyoclen.

8 Pero ka cꞌaloꞌn ke tuꞌn caden, ex ka in che cꞌixbisanjtz tuꞌn taꞌw,

9 in xi tmaꞌn Dios cye alcye il otok cybincha ex tzaꞌn tten otok jaw cyniman cyib.

10 In yolin Dios cyucꞌil tuꞌn tjikumanjtz tiꞌj cynabl ex in xi tmaꞌn cye tuꞌn tcyaj cykꞌoꞌn ju mya baꞌn.

11 Ka ma txi cyniman ex ka ma tzꞌocx cykꞌon cyib tjakꞌ tcawbil, che tzalajel ex oc che tel tuj txubtxaj tuj chꞌintl cyankꞌibl atx.

12 Pero ka mintiꞌ ma txi cyniman, che cymel ex mintiꞌx otok tzꞌel cynicꞌ tiꞌj.

13 In tzaj nimxix cykꞌoj aj il; masque presin ke, pero mintiꞌ in che kanin onbil.

14 Cuꞌxunx ke oc cycyim ex aju bajsbil te cychwinklal chꞌixbajilxix.

15 Aju xjal in cꞌixbisanjtz, in clet tuꞌn Dios tuj cꞌixbisabl; ex tuꞌnju taꞌw in tzaj, nneꞌl tnicꞌ tiꞌj Dios.

16 Ax icx teya oc cletela tuꞌn Dios cyuj ke xobajil, ctzajel tkꞌoꞌn nimxix teya, ctzokpetela tuꞌn, ex cbajel noj twi tmesa tuꞌn cyuꞌn ke chibj tbanilxix.

17 Atzun jaꞌlo tibaja ma japun baj t-sentens ju xjal mya baꞌn, ex mlay mayet tuꞌna ka ma tzꞌoca tuj xjel tiꞌj ex ka ma cub t-sentensa.

18 Cwentim tiba tuꞌn miꞌn ttzaj tcꞌmoꞌna cotzbaj mya tuj tumel ex tuꞌn miꞌn t-xi tkꞌon tiba tuꞌn tbinchanteya jun mya baꞌn nok tuꞌn tlaj nim pwak.

19 Oc ttzaj bis tiꞌja, mlay tzꞌajben tkꞌinumabla ex tipumala te onbil teya.

20 Miꞌn txi tachina tuꞌn ttzaj konicꞌan oc in che cub naj ke xjal tuj tnam.

21 Kꞌonca cwent tiꞌj tuꞌn miꞌn taj meltzꞌaja binchal mya baꞌn, porque tuꞌn jlu ma tzaj cꞌixcꞌoj tiꞌja.

22 Kꞌonc tcwenta tiꞌj tipumal Dios. Mi jun xnakꞌtzal in pon ic tzaꞌn te Dios;

23 mi aꞌl jun jacu kꞌmante te Dios alcye cbantel tuꞌn, ex mi aꞌl jun jacu tzꞌoc kꞌmante te ka mya tuj tumel aju otok tbincha.

24 Cycyakil xjal in jaw cynimsaꞌn aju takꞌunben Dios; ax icx teya tzulx tcꞌuꞌja tiꞌj tuꞌn tjaw tnimsaꞌna.

25 Cycyakil xjal jacu tzꞌoc cyqueꞌyin, masque najchak tzaj cyqueꞌyin.

26 Maꞌxix toclen Dios ex mlay tzꞌel knicꞌ tiꞌj; ax icx mlay bant kajlan tiꞌj tabkꞌiyil.

27 Tuꞌn Dios in tzaj tchmoꞌn junjun tzꞌuj aꞌ tuj jun tcubil, ex jurat nnoꞌc tuꞌn te jbal.

28 Nneꞌtz chitj jbal tuj muj ex in cub tilj twitz txꞌotxꞌ.

29 ¿Alcye jun nneꞌl tnicꞌ tiꞌj tzaꞌn tten in bet muj ex tzaꞌn tten in kꞌajt kꞌancyok twitz cyaꞌj?

30 Tuꞌn Dios in tzaj koptzꞌaj xleꞌlaj cyaꞌj tibaj mar, atzun t-xeꞌpun mar biꞌx in cyaj klolj tcyakil.

31 Ictzun tten in cawin Dios cyibaj cycyakil xjal ex in tkꞌoꞌn nimxix cywa.

32 Tuj tkꞌab Dios taꞌ kꞌancyok ex in pon tiꞌj jun tiꞌxti jatum taj Dios tuꞌn tpon.

33 Aju tkꞌajkꞌajel kꞌancyok in tkꞌoꞌn tkanil ka at tulel cykꞌikꞌ jbal, ex tuꞌnju tkꞌoj Dios in tzaj cykꞌikꞌ jbal.