3 Porque o txi tmaꞌna te Dios cyjaꞌ: ¿Ti tajben weye tuꞌnju mintiꞌ ma nbinchaye il? Chitzuna.

4 Akine chin xel tzakꞌwente teya ex cye ke tamiwoya.

5 Queꞌyinxa twitz cyaꞌj ex queꞌyinxa, baka nikaꞌ tjax muj tibaja.

6 Ka ma binchana il, mintiꞌ jacu baj tiꞌj Dios tuꞌn; masque nimxix il ma bant tuꞌna, mintiꞌ jun mya baꞌn jacu tbinchaya tiꞌj.

7 Ex ka baꞌn in tbinchaꞌna, mintiꞌ jun in xi tkꞌoꞌna te tuꞌn jlu, mintiꞌ jun baꞌn in tbinchaꞌna te.

8 Aju tila in tbinchaꞌn mya baꞌn tiꞌj jun xjal ic tzaꞌnx aya, ex aju tbinchbena baꞌn in tbinchaꞌn baꞌn tiꞌj jun xjal ic tzaꞌnx aya.

9 Tuꞌn taꞌw yajbil in che schꞌin ke xjal, ex in che jyon tiꞌj alcye jun tuꞌn tclonte cye tuj cykꞌab keju at nimxix cyipun;

10 pero mintiꞌ in che jyon tiꞌj Dios aju binchante cye, aju in tzaj kꞌonte tzalajbil oc ttzaj xobajil,

11 aju in tzaj kꞌonte mas nim knabl twitz cye txcup ex ke chyuꞌj in che lipan twitz cyaꞌj.

12 In che schꞌin, pero mintiꞌ in che tzaj tzakꞌweꞌn tuꞌn Dios, porque mya baꞌn ke ex in jaw cyniman cyib.

13 Ate Dios aju at tipumal tuꞌn tbant tcyakil tuꞌn mintiꞌ in tzaj tbiꞌn cyyol keju mya ax toc che yolin.

14 Masque in tmaꞌna ka mintiꞌ in tila twitz Dios, pero ayona tiꞌj, porque in tqueꞌyin Dios aju in baj tiꞌja.

15 In tmaꞌna ka mintiꞌ in tzaj tkꞌoj Dios ex mlay tzaj tkꞌoꞌn castiw ex mintiꞌxix nnoꞌc tkꞌoꞌn cwent tiꞌj il.

16 Cyjaꞌtzun aya Job in tmaꞌna ke yol mintiꞌ cytxolil, nimxix in yolina ex mintiꞌ chꞌin tojtzkibla.