3 Aju ẍcyinbaj baꞌn tuꞌn alcye t-xilen junjun yol, ic tzaꞌn kcꞌoꞌn in tnaꞌn ke tcꞌocꞌjal.

4 Icxtzun tten jlu, baꞌn tuꞌn kximan tiꞌj alcye yol tzꞌaklxix ex baꞌn tuꞌn tcub kximan tiꞌj alcye baꞌn tuj kwitz.

5 Chi Job in tcyuwsaꞌn cyjaꞌ: Mintiꞌ wile, pero tcꞌiꞌ Dios txi tbinchaꞌn wiꞌje.

6 Ka ma txi nmaꞌne at wile, chin nicꞌale yol; aju ẍil toc wiꞌje mintiꞌ in bant masque mintiꞌ o chin binchane il, chitzun.

7 Mi aꞌl juntl ic tzaꞌn te Job. Nim in xmayin tiꞌj Dios;

8 at tgan tuꞌn toc tjunin tib cyucꞌil ke xjal binchal mya baꞌn ex tuꞌn tbet cyucꞌil ke xjal mya baꞌn ke.

9 In tmaꞌn: Mintiꞌ chꞌin in tcambaꞌn ju xjal nnoꞌc tilil tuꞌn tuꞌn ttzalaj Dios tiꞌj.

10 Cyjaꞌtzun, akeye xjal at cynable chin cybintze. Ate Dios aju at tipumal tuꞌn tbant tcyakil tuꞌn mintiꞌ in tbinchaꞌn jun mya baꞌn ex ka aju mya tzꞌaklxix.

11 In tkꞌoꞌn Dios chojbil te teyle junjun xjal ic tzaꞌnx cybinchben; in cub tkꞌoꞌn cycastiw xjal ic tzaꞌnx cybinchben.

12 Ax toc ate Dios aju at tipumal tuꞌn tbant tcyakil tuꞌn mintiꞌ in tbinchaꞌn jun mya baꞌn, ex mintiꞌ in tbinchaꞌn aju mya tzꞌaklxix.

13 Mi aꞌl jun o tzꞌoc kꞌonte toclen tuꞌn tcawin tibaj tcyakil twitz txꞌotxꞌ.

14 Ka ma tzꞌel tiꞌn cyxew ke xjal, aju in kꞌonte cychwinklal,

15 cycyakil-lo che cymel ex che oquel juntl maj te kuk.

16 Ka at tnabla chin tbintza; kꞌoꞌnc twiꞌya tiꞌj nyole.

17 Nokwit nneꞌl ticꞌun Dios aju tzꞌaklxix, mlaywitlo bant tcawin. ¿Tzaꞌntzun tten in tmaꞌna ka mya baꞌn aju in tbinchaꞌn Dios?

18 ¿Nnoꞌcpe tmaꞌn tibaj cywitz ke rey ex ke xjal maꞌxix cyoclen: Ploj cymodiye, mya baꞌn keye?

19 Mintiꞌ nnoꞌc tqueꞌyin aju cyxilen ke cawil, mintiꞌ in che tzaj t-xtalin mas ke kꞌinun cywitz ke meba, porque tuꞌn Dios e cub binchaꞌn cycyakil.

20 Jurat naj in che cyim xjal tuj tmij akꞌbil, in che jaw tilj xjal ex in che cub naj; keju at nim cyipun in che naj, pero mya tuꞌn xjal in che cyim.

21 Toc twitz Dios tiꞌj tzaꞌn in che bet xjal ex toc twitz tiꞌj jatum in che bet.

22 Mintiꞌ jun klolj kxopinxix jatum jacu txi tewan tib jun xjal binchal mya baꞌn.

23 Mya il tiꞌj tuꞌn t-xi tmaꞌn Dios cye xjal jtoj tuꞌn cypon xtisil twitz.

24 Oc nneꞌl tiꞌn Dios cyoclen ke xjal maꞌ cyoclen, mya il tiꞌj tuꞌn tbaj t-xjelin alcye cybinchben, ex in xi tkꞌoꞌn cyoclen ke jlu cye txkantl.

25 Porque baꞌn tuꞌn Dios aju in cybinchaꞌn; octzun toc konicꞌan in che naj tuꞌn.

26 Tuj lugar jatum baꞌn tuꞌn cyqueꞌyin cycyakil tiꞌj in che baj tasyalin, ic tzaꞌn in che baj asyalin ke xjal mya baꞌn ke,

27 porque el cypaꞌn cyib tiꞌj ex mintiꞌ o cyajbe tuꞌn t-xi cyniman ke yol tuꞌn cybet tuj tumel.

28 E baj cyyajlaꞌn ke xjal meba, atzun ke meba e oc ten naꞌl Dios ex o che tzaj biꞌn tuꞌn Dios.

29 Pero ka mintiꞌ in tzaj ttzakꞌweꞌn Dios, ¿alcyetzun jacu kꞌmante ka mya baꞌn in tbinchaꞌn, ka mintiꞌ ma tzaj tkꞌoꞌn twiꞌ tiꞌj cyyol xjal? Toc twitz cyiꞌj ke tnam ex cyiꞌj ke xjal,

30 tuꞌntzun miꞌn tcawin tuj tnam jun xjal mya baꞌn ex sbul.

31 ¿Baka o txi tmaꞌna te Dios: Ma chin tzpete tiꞌj ex miꞌn chin binchane il juntl maj,

32 yecꞌuntza weye alcye ke npaltile mintiꞌ nneꞌl nnicꞌe tiꞌj, ka at mya baꞌn o bant wuꞌne, mlay nbinchaye juntl maj? Chiwta.

33 ¿Maj tajbila tuꞌn ttzaj tkꞌoꞌn Dios chojbil teya ic tzaꞌn tajbila ex masque otok tzꞌel ticꞌuna Dios? Axa cbel ximante ex mya a kine, kꞌmantza aju baꞌn tuꞌna.

34 Ke xjal secꞌ cynabl, akeju in che bin tiꞌj nyole, cyucꞌix ke xjal at cynabl, oc cymaꞌ weye cyjaꞌ:

35 In yolin Job tiꞌj aju mintiꞌ nneꞌl tnicꞌ tij; mintiꞌ cytxolil ke tyol.

36 Baꞌn tuꞌn toc Job tuj malbil, porque ke tzakꞌwebl in tzaj tmaꞌn, mer ic tzaꞌn ttzakꞌwebl jun xjal mya baꞌn.

37 Mya nok oꞌcx ma binchan Job il, ax icx miban bin; kwitzx nnoꞌc ten xmayil tiꞌj Dios ex cucx tyolin tiꞌj Dios.