3 Axix toc aju chin yolile tiꞌj, cxel nmaꞌne aju axix toc baꞌn wuꞌne.

4 Ate T-xew Dios aju at tipumal tuꞌn tbant tcyakil tuꞌn, cub binchante weye ex tzaj tkꞌoꞌn nchwinklale.

5 Chin ttzakꞌwentza, ka jacu chin tzakꞌwete tuꞌna; bincham ttena tuꞌn tyolina wucꞌile.

6 Aya ex akine junx elni koꞌ tuj twitz Dios; ax icx weye tiꞌj txꞌotxꞌ in bante.

7 Cyjaꞌtzun miꞌn jaw xoba nwitze, porque mlay chin cawine cyuw tibaja.

8 O nbiye tej tmanteya ke yol lu, chiya:

9 Sakxix kine ex mintiꞌ wile, mintiꞌ npaltile ex mintiꞌ il o nbinchaye.

10 Atzunte Dios in jyon tumel alcye tuꞌn toc t-siꞌman wiꞌje ex in chin oc tkꞌoꞌn ic tzaꞌn aj kꞌoj tiꞌj;

11 ma che oc tcꞌaloꞌn ke nkane tuꞌn caden ex nnoꞌc tkꞌoꞌn tcwent tiꞌj tzaꞌn in chin bete, chitzuna.

12 Pero tcyakil aju in tcyuwsaꞌna mya tuj tumel, porque ate Dios mas maꞌ toclen cywitz xjal.

13 ¿Tikuꞌn nnoꞌc tmaꞌna tibaj twitz tuꞌnju mintiꞌ in che tzaj tzakꞌweꞌn ke tyola tuꞌn?

14 Ate Dios in yolin tuj nimcu tumel, atzun ke mintiꞌ nneꞌl knicꞌ tiꞌj.

15 At maj in yolin konicꞌan tuj jun witzicꞌ ex ka in tzaj tyecꞌun mer ic tzaꞌn tuj jun witzicꞌ oc in che tan xjal ex oc in tzyet cycꞌuꞌj tuꞌn watl.

16 Nnoꞌcx tjascꞌuꞌn Dios tuj cyẍcyin xjal, in che oc tmayoꞌn ex in tzaj cyxobil tuꞌn,

17 tuꞌntzun cyel tpaꞌn cyiꞌj cybinchben mya baꞌn ex tuꞌn miꞌn tjaw cyniman cyib.

18 Cyjaꞌtzun in che clet tuꞌn tuꞌn miꞌn cynaj, in che clet tuꞌn tuꞌn miꞌn cycyim.

19 At maj in cawin Dios cyiꞌj xjal, in tzaj tkꞌoꞌn yabil cyiꞌj tucꞌil nim taꞌw tuj tcyakil cyximlal.

20 Tcyakil cychiꞌ, icxpe aju mas cꞌocꞌjxix, nneꞌl ticꞌun cycꞌuꞌj.

21 Nnoꞌc tzkij cychibjal cyiꞌj ex in cyaj kꞌanchalin ke cybakil.

22 Ya chꞌix cycyim ex chꞌix cyxi kꞌiꞌn tuj mukbil.

23 Pero cyxol jun mil anjel, ka at jun nikayin taꞌ ttxlaj tuꞌn tyolin tiꞌj ex ka ma txi tmaꞌn te alcye tuꞌn tbinchante,

24 ka ma tzaj kꞌakꞌan tcꞌuꞌj tiꞌj ex ka ma txi tmaꞌn te Dios: Cloma ju xjal lu tuꞌn miꞌn tcyim porque ma cnet chojbil til wuꞌne, ka chi,

25 cꞌeleltzun yabil tiꞌj ex cꞌoquel juntl maj ic tzaꞌn tej cuꞌxunxtok.

26 Oc cubsal twitz Dios ex ctzajel biꞌn tuꞌn; ex tucꞌil nim tzalajbil cꞌoquel cyqueꞌyin cywitz tucꞌil Dios ex ccꞌmetel tuꞌn Dios juntl maj.

27 Cxeltzun tmaꞌn cye xjal: O chin binchane il, o nbinchaye aju mya tzꞌaklxix, pero mintiꞌ cub tkꞌoꞌn Dios ncastiwoye;

28 nokpe ma chin clete tuꞌn te camic ex cucx toc nqueꞌyine t-spicꞌumal kꞌij.

29 Atzunju in tbinchaꞌn Dios cyiꞌj xjal nimcu maj;

30 in che clet tuꞌn te camic ex in xi tkꞌoꞌn ambil tuꞌn cucx toc cyqueꞌyin t-spicꞌumal kꞌij.

31 Chin tbintza Job ex kꞌoꞌnc twiꞌya tiꞌj nyole; txulecuya acux in chin yoline.

32 Ka at jun tyola tuꞌn ttzaj tmaꞌna weye, chin ttzakꞌwentza; ka ax toc tyola, jacu txi nmaꞌne ka tuj tumel in yolina,

33 pero ka mintiꞌ tyola, txulecuya bilte nyole, ex akine chin xel xnakꞌtzante teya tuꞌn toc tnabla.