Tzyet tyolin Eliú
32
Tej tcyil keju ox xinak cucx in tmaꞌn Job ka mintiꞌ til, xi cycolin tuꞌn cyyolin tucꞌil. 2 Attok jun xinak Eliú tbi, tcyꞌajal Baraquel aju aj Buz ex tiyjil Ram, tzaj tkꞌoj tiꞌj Job tej tbinte cucx in tmaꞌn Job ka tzꞌaklxixte, atzunte Dios mya tzꞌaklxix tuj twitz Job. 3 Ax icx tzaj tkꞌoj cyiꞌj keju ox tamiw Job, tuꞌnju mintiꞌ cnet tumel cyuꞌn tzaꞌn tten tuꞌn cytzakꞌwet tyol Job cyuꞌn, oꞌcx otok cyma ka at til Job. 4 Tuꞌnju mas cuꞌxuntok Eliú cywitz keju ox tamiw Job, cub tyoꞌn tej cybaj yolin. 5 Pero tej tqueꞌyinte ya mintiꞌtl bant ttzakꞌwet tyol Job cyuꞌn, tzajtzun tkꞌoj, 6 ex tzyettzun tyolin cyjaꞌ:Yolin Eliú tnejel maj
Tuꞌnju cuꞌxunx kine ex atzun cyeye tij xjal keye, cyjaꞌtzun in chin xobtoke tuꞌn t-xi nmaꞌne alcye weye nximbetz.
7 Cub nximane cyjaꞌ: E cyyolin keju at nim cyojtzkibl, e ttzaj cyyecꞌun tij xjal cynabl ma cycꞌam tuj nimcu abkꞌi.
8 Pero ax icx cycyakil xjal at cynabl, porque ate Kman aju at tipumal tuꞌn tbant tcyakil tuꞌn o tzaj tkꞌoꞌn cychwinklal tuꞌn tten cynabl.
9 Mya tuꞌnju nim tabkꞌiyil jun xjal at tnabl, ex mya tuꞌnju tij xjal nneꞌl tnicꞌ tiꞌj alcyeju tzꞌaklxix.
10 Cyjaꞌtzun ma txi nmaꞌne: Chin cybintze, ax icx weye at cabe nyole tuꞌn t-xi nmaꞌne.
11 Ma chin cub txuleꞌye bilte ex ma nbiye cyyole xi cymaꞌne. Ma nbiye tej in che jyontoke alcye yol tuꞌn t-xi cymaꞌne,
12 ax icx ma wile mi aꞌl jun cyeye ma cnet tumel tuꞌn tzaꞌn tten tuꞌn tbant ttzakꞌwet tyol Job.
13 Tuꞌntzun mi t-xi cymaꞌne ka at-xix cynable, ate Dios cxel tzakꞌwente tyol Job ex mya jun xjal.
14 Pero mintiꞌ jun yol ma tma Job wiꞌje, ex mya ax ke yol che xel ntzakꞌweꞌne te ic tzaꞌn cyeye ma txi cymaꞌne.
15 Aya Job, akeju ox xinak lu ma naj cynabl ex mintiꞌ in cnet yol cyuꞌn tuꞌn ttzakꞌwet tyola cyuꞌn.
16 ¿Baꞌnpe cucx tuꞌn wayontle, yaque ma txi cycolin tuꞌn cyyolin tuꞌnju mintiꞌ ma cnet tumel tuꞌn ttzakꞌweta cyuꞌn?
17 Ax icx weye chin yolile tiꞌj ju yol in che yolin tiꞌj ex cxel nmaꞌne aju baꞌn wuꞌne.
18 Nim yol at wucꞌile ex mlayx tzicꞌx wuꞌne tuꞌn miꞌn t-xi nmaꞌne.
19 Ic in tene ic tzaꞌn jun bols tzꞌuꞌm acꞌaj ex chꞌix tel tzakj tuꞌn taꞌl twitz uva mintiꞌ jatum tuꞌn tetz.
20 Oc chin yolile tuꞌntzun tjatz baj nyole ex cxel nkꞌoꞌne jun yol te tzakꞌwebl teya.
21 Mlay txi nmaꞌne jun yol mejorxix tponlen nok tuꞌn tcub nsbuꞌne jun xjal, parej chin yolile cyiꞌje.
22 Ax toc, mya nakꞌl kine tuꞌn tcub nsbune jun xjal tuꞌn mejor yol, porque ka ma nbinchaye icju, jacu cub ncastiwoye tuꞌn Dios aju chꞌisal weye.