2 ¿Alcyetzun chojbil in tzaj tuj cyaꞌj cye xjal, tuꞌn Dios aju at tipumal tuꞌn tbant tcyakil tuꞌn?

3 ¿Myaꞌpetzun tibajx ju xjal binchal mya baꞌn ex ju xjal aj il in cub tzꞌak ju mya baꞌn?

4 ¿Mintiꞌpetzun in queꞌyin Dios tiꞌj ju in nbinchaꞌne, ex mintiꞌpetzun nnoꞌc tkꞌoꞌn cwent tiꞌj tzaꞌn in chin bete?

5 In nmaꞌne axix toc, mintiꞌ ma bant nnicꞌane yol, ex misicyer jun xjal ma tzꞌoc nnicꞌane tiꞌj tuꞌn tcub nsbuꞌne.

6 Baꞌn tuꞌn woque tuj balans tzꞌaklxix tuꞌn Dios ex atzun cꞌelel tnicꞌ wiꞌje ka mintiꞌ wile.

7 Ka ma tzꞌel npaꞌn wibe tiꞌj ju be axix toc, ka ma pon ncꞌuꞌje tiꞌj jun tiꞌxti ex ka ma tzꞌel cnet jun tiꞌxti tuj nkꞌabe mya weye,

8 e tnicꞌben juntl tiꞌj ju awal o cuꞌx wawaꞌne ex e tjatz baket aju awal o cuꞌx wawaꞌne.

9 Ka o txi nnimane tyol jun xuꞌj tuꞌn ncub tane tucꞌil, ex ka o chin cub tene xkꞌukil tiꞌj t-xuꞌjil nvesine tuꞌn tetz wiꞌne,

10 baꞌn tuꞌn toc nxuꞌjile te tmajen juntl ex baꞌn tuꞌn tcub tan juntl xinak tucꞌil.

11 Nokwit icju, puro chꞌixbajilwitlo nbinchbene, ex tuj tumelxlo tuꞌn tcub ncastiwoye.

12 Iclo tten aju nbinchbene lu ic tzaꞌn jun kꞌakꞌ in baj tzꞌeꞌy nimcu tuꞌn ex jaculo naj tcyakilju at weye tuꞌn.

13 Tej ttzaj cymaꞌn ke nmajene weye tiꞌj jun tiꞌxti mintiꞌ cub tuj cywitz, tcyakil maj xi nnimane aju cykanbetz.

14 ¿Alcyetzun juntl tumlal tuꞌn nyecꞌunte wibe twitz Dios? ¿Alcyetzun ntzakꞌweble te oc ttzaj tkanin weye tiꞌj ju nbinchbene?

15 Axte Dios o binchante keye tuj talbil ktxuꞌye; tzaꞌnx o txi tkꞌoꞌn cychwinklal ke nmajene, icx weye o tzaj tkꞌoꞌn.

16 Mintiꞌ cub nxcꞌayine tuꞌn t-xi nkꞌoꞌne aju at tajben cye meba, ex mintiꞌ wakꞌe ambil tuꞌn ticꞌx weꞌyaj cyuꞌn ke meba xuꞌj.

17 Mintiꞌ in cub tene waꞌl tiꞌj nwaye junx weye, ax icx xi nsipane cye meba cꞌwaꞌl.

18 Atxix tej cꞌwaꞌl kine o nbinchaye baꞌn cye meba cꞌwaꞌl, ic tzaꞌn akine cyman, ex cucx in coline cyiꞌj ke meba xuꞌj.

19 Tej toc nqueꞌyine ka at jun cyjaꞌtok tcyim tuꞌn tlaj mintiꞌ t-xbalun ex ka at jun meba mintiꞌ txaybil te,

20 ax cylan ke nẍneꞌle xi nkꞌoꞌne te cyxbalun tuꞌn cymekꞌt ex o tzaj cykꞌoꞌn chjonte weye tiꞌj jlu.

21 Misicyer oc nkꞌoꞌne nkꞌabe tiꞌj jun meba nok tuꞌnju wamiw wibe cyucꞌil ke jwes.

22 Ex katzun mya ax toc jlu, entons baꞌn tuꞌn cybaj tokj ke nkꞌabe ex e cyel tzꞌak cyiꞌj ke nsemile.

23 Nokwit mintiꞌ in xobe twitz ju castiw tuꞌn Dios, mintiꞌwtlo ẍin weꞌye twitz, tuꞌnju maꞌ toclen.

24 Mya tiꞌj kꞌan pwak o keꞌ ncꞌuꞌje ex mintiꞌ cub nximane tuꞌn ntene segur tuꞌn.

25 Aju tzalajbil at weye, mya tuꞌnju at nim nkꞌinumable ex mya tuꞌnju at nim pwak wucꞌile.

26 Tej twile aju kꞌij in cꞌant ex aju xjaw in bet tbanilxix che queꞌyin,

27 mintiꞌ ma chin cꞌulune cye tuj ewaj ex mintiꞌ ma tzꞌel ntzꞌubane tuj nkꞌabe tuꞌn nkꞌolbene cye.

28 Nokwit ma bant jlu wuꞌne, mas baꞌnwitlo tuꞌn tcub ncastiwoye, porque ka in chin cꞌulune cye, entons in cub wewane aju Dios at tuj cyaꞌj.

29 Mintiꞌ o chin tzalaje tiꞌj mya baꞌn o tzaj cyiꞌj ke aj kꞌoj wiꞌje ex mintiꞌ o chin tzalaje tej ttzaj jun bis cyiꞌj.

30 Misicyer o tzaj nkanine jun castiw cyibaj, ex mintiꞌ o wajbeye tuꞌn ttzaj camic cyiꞌj.

31 Ka at jun cyxol keju e ten wucꞌile o tajbe tuꞌn tbinchante jun mya baꞌn tiꞌj jun stranjer xjal,

32 mintiꞌ jun stranjer xjal cyaj nkꞌoꞌne tuj cay te konicꞌan. Xi nkꞌoꞌne cyposad ke betin xjal.

33 Misicyer ma cub wewane npaltile, ic tzaꞌn in cybinchaꞌn junjun xjal, ex mintiꞌ ma nbinchaye tuꞌn tten jlu wuꞌne tuj ewaj

34 nok tuꞌn tlaj nxobile cywitz xjal. Mintiꞌ ma tzꞌocx nlamon wibe t-xe ja tuꞌn miꞌn nkꞌajte nok tuꞌn miꞌn wel icꞌune cyuꞌn keju at nxilene cyucꞌil.

35 ¿Mintiꞌpe jun xjal in bin tiꞌj nyole? Aju in xi nmaꞌne, axix toc tcyakil jlu. Jaꞌlo baꞌn tuꞌn ttzaj ttzakꞌweꞌn Dios ju nyole, aju Dios at tipumal tuꞌn tbant tcyakil tuꞌn. Aju aj kꞌoj wiꞌje baꞌnwt tcub ttzꞌiban alcye wile tuj twitz,

36 ex jaculo txi wiꞌne tuꞌn tcyakil ncꞌuꞌje ex jaculo tzꞌoc te weye ic tzaꞌn jun coron in ajben te jun techal te nimbil oc cjawix tuj nwiꞌye.

37 Jaculo txi nkꞌoꞌne tajlal tcyakil nbinchbene twitz Dios ex jaculo chin pon lakꞌeꞌye ttxlaj mintiꞌ nchꞌixwiye.

38 Ka in tmaꞌn ntxꞌotxꞌe ka at jun mya baꞌn o nbinchaye tiꞌj, ex ka in che okꞌ ke surc tuꞌnju in che bisun;

39 ex ka atcu jun o tzꞌel welkꞌane twitz tawal, ex ka o che cub nyajlaꞌne ke akꞌnal twitz txꞌotxꞌ,

40 entons baꞌn tuꞌn ttzaj tpokꞌsaꞌn ntxꞌotxꞌe chꞌiꞌx cꞌul te t-xel triw ex ju cꞌul mya baꞌn te t-xel sebad, chi Job.