30
Atzun jaꞌlo in che tzeꞌn wiꞌje ke cuꞌxun mas cꞌwaꞌlxix ke nwitze ex mintiꞌwt e cꞌmet ke cyman wuꞌne tuꞌn cyten cyucꞌil ke txꞌyan in che cwentintok ke nẍneꞌle.2 ¿Ti tajben weye aju cyakꞌunben xjal lu? Porque mintiꞌtl cyipun
3 tuꞌnju weꞌyaj nim ex tuꞌnju mintiꞌ at cye. Te konicꞌan el cytxꞌaꞌn tlocꞌ tzeꞌ tzkij tuj tzkij txꞌotxꞌ mintiꞌ cynajbil xjal tuj,
4 in jatz cybakoꞌn ke itzaj puro cꞌa cyxol ke mastl cꞌul, ex tucꞌix tlocꞌ tal tzeꞌ retama tbi in xi cywaꞌn.
5 Icꞌun cywitz cyuꞌn ke xjal ex in che schꞌin ke xjal oc in che oc lpeꞌ cyiꞌj, mer ic tzaꞌn elekꞌ ke;
6 in che najan cyuj ke tkan xak ex cyuj ke toyꞌ pic ex cyuj jul.
7 In che tzanun tjakꞌ cꞌul ic tzaꞌn ke txcup oc toc cychmon cyib tjakꞌ cꞌul.
8 Ke xjal lu mintiꞌx cyajben, mya cyajlal ke tuj tnam, o che etz lajoꞌn cyuꞌn xjal.
9 Atzun jaꞌlo in che xmayin wiꞌje ex in chin oc cykꞌoꞌn te cytzebl.
10 Ma chin el icꞌune cyuꞌn ex in che el lakꞌeꞌ wiꞌje ex nnoꞌc cytzuban tuj nwitze.
11 Jaꞌlo, tuꞌnju ma tzꞌel tiꞌn Dios wipune ex ma chin baj tcꞌixbisaꞌn, cyjaꞌtzun mintiꞌ in che xob nwitze.
12 Nnuꞌl cychmon cyib ntxlaje ex in chin cub tzꞌake cyuꞌn, in che oc tzokpaj wiꞌje ex nnoꞌc tilil cyuꞌn tuꞌn ncub cybyoꞌn.
13 In cub cymakoꞌn tuj nbeye tuꞌntzun ncub cybyoꞌn ex mi aꞌl jun nnoꞌc mayonte cye tiꞌj.
14 Mer ic tzaꞌn oc in che ocx tzokpaj xjal tuj jun toyꞌ muro catl, cyjaꞌxtzun in che tzaj tzokpaj wiꞌje tucꞌil nim cyipun.
15 Ma tzaj nimxix t-xobil wiꞌje, ma tzꞌel woclene ic tzaꞌn cykꞌikꞌ in bet; tcyakilju at weye ma cub naj ic tzaꞌn muj.
16 Miꞌn wajtle tuꞌn wankꞌine; ma chin tzyete tuꞌn cꞌixbisabl.
17 Ma pon taꞌw max cyiꞌj ke nbakile; mintiꞌ jun akꞌbil miwt in chin cꞌixbisanjtze.
18 Tiꞌj nkule ma chin tzaj tzyuꞌne tuꞌn Dios ex tuꞌn tipun ma baj tchitoꞌn nxbalune.
19 Ma chinx t-xoꞌn tuj xokꞌl, mer ic kine ic tzaꞌn kuk ex ic tzaꞌn tzaꞌj.
20 In chin kanine onbil teya Dios, ex mintiꞌ in chin tzaj ttzakꞌweꞌna, in chin cubsane twitza ex mintiꞌ in chin tzaj tbiꞌna.
21 Cyuwxix ma chin baj tcꞌixbisaꞌna ex ma tzꞌoc tzokpaja wiꞌje tucꞌil nim tipumala.
22 In tkꞌoꞌna ambil tuꞌn nxi ikane tuꞌn cykꞌikꞌ, ex tuꞌn nbaj chitoꞌne tuꞌn cykꞌikꞌ jbal.
23 Baꞌn wuꞌne taja tuꞌn ncyime, tuꞌn npone tuj lugar banimaj cye cycyakil xjal.
24 ¿Baka mintiꞌ o chin onine cyiꞌj ke meba ex o che clet wuꞌne tuj cymebayil?
25 ¿Baka mintiꞌ o chin okꞌe tiꞌj xjal nnicꞌx cꞌixcꞌoj tuꞌn, ex baka mintiꞌ o tzaj kꞌakꞌan ncꞌuꞌje tiꞌj xjal mintiꞌ at te?
26 In chin ayontoke tuꞌn ntene tuj tzalajbil, ex te t-xel jlu, tzaj ju mya baꞌn wiꞌje; in chin ayontoke tiꞌj spicꞌun, ex te t-xel jlu ul ju klolj.
27 Aju wanmiye in putin ex mintiꞌ ojlabl te, oꞌcx bis in ayon wiꞌje.
28 Bisbajil atine tuj nchwinklale, mintiꞌ in chin exe tiꞌj tkan kꞌij; in chin kanine onbil cywitz cycyakil xjal.
29 Ma chin oque mer ic tzaꞌn cyerman ke xoꞌj ex ic tzaꞌn cyamiw ke chyuꞌj avestrúz cybi.
30 Aju ttzꞌumal nximlale ma tzꞌoc kꞌek queꞌyin ex nim in julin wiꞌje tuꞌn taꞌw cyak.
31 Aju cykꞌajkꞌajel ke chnab arpa ex xux ma tzꞌoc te weye te cꞌixcꞌoj ex okꞌel.