Aju mancbil tcolbil tib Job
29
Oc ten Job yolil juntl maj ex tma:2 Nokwit baꞌn npone ic tzaꞌn ntene ojtxi, tej cwentintok kine tuꞌn Dios, 3 tej in tzaj tkꞌoꞌntok spicꞌun tuj nbeye, ex tuꞌn jlu in chin bettoke segurxix tuj klolj;
4 tej matok kꞌiꞌn wipune ex cwentin njaye tuꞌn Dios;
5 tej attok Dios wucꞌile, aju at tipumal tuꞌn tbant tcyakil tuꞌn, ex ateꞌ ke ncꞌwaꞌle ntxlaje;
6 tej in cykꞌoꞌntok ke ttxu nwacẍe nim lech, ex tej attok nim chibj aseyt nneꞌl cyiꞌj tzeꞌ awaꞌn cyxol abj,
7 tej in cub keꞌye ttzi tpwertil tnam junx cyucꞌil ke aj sanjelal.
8 Oc in chin ilwaje cyuꞌn ke cuꞌxun, in che el lakꞌeꞌ, atzun ke tij xjal in che jaw weꞌ tuꞌn cyniman weye,
9 icxpe ke xjal at cyoclen, in che cubtok txuleꞌ ex nnoꞌc cyyecꞌun tal cykꞌab cytziꞌ tuꞌn miꞌn cykꞌajt;
10 xi cycolin ke cawil tuꞌn cyyolin ex mer biꞌx nnoꞌcx lacꞌeꞌ cyakꞌ tuj cycꞌoꞌn.
11 Oc in chin ilwaje cyuꞌn xjal ex ka oc cybinte nyole, in chin tzaj kꞌolbeꞌne cyuꞌn ex in che yolin baꞌn wiꞌje,
12 porque in chin colintoke cyiꞌj xjal mintiꞌ cyman ex cytxuꞌ ex cyiꞌj xjal meba, akeju mi aꞌltok jun in onin cyiꞌj.
13 Oc in chin onine cyiꞌj keju chꞌixtok cynaj, in tzaj cykꞌoꞌn chjonte weye ex oc in chin onine cyiꞌj ke meba xuꞌj, nimxix in che tzalaj.
14 Tcyakilju in bant wuꞌne tzꞌaklxix ex tuj tumelxix ex ic tten jlu te weye ic tzaꞌn nxbalune toc wiꞌje tcyakil kꞌij.
15 Mer ic tzaꞌn tbakꞌ witzbaj kine cye ke moẍ ex mer ic tzaꞌn kambaj kine cye ke cox,
16 mer ic tzaꞌn mambaj kine cye keju mintiꞌ at cye, ex colol kine cyiꞌj ke xjal mintiꞌ ojtzkiꞌn cywitz wuꞌne.
17 E naj wuꞌne ke xjal mya baꞌn, ex el wiꞌne cye aju otok tzyet cyuꞌn.
18 Tuj nximbetze ka nimtok tuj nkꞌije tuꞌn tten ic tzaꞌn tajlal ttxa tzaꞌn, ex tuꞌn ncyime otok chin tijine ex ax tuj njaye.
19 Ictok ntene ic tzaꞌn jun wiꞌ tzeꞌ awaꞌn ttzi aꞌ, in che acꞌ tkꞌab tuꞌn tkꞌab cheꞌw konicꞌan.
20 Cucxtok in chin jaw nimsaꞌne cyuꞌn xjal ex mintiꞌtok in baj wipune.
21 Cycyakil xjal xi cybiꞌn ke nyole ex e cub txuleꞌ tuꞌn t-xi cybiꞌn ke nconseje.
22 Nbajlenxi yoline mi aꞌl jun o kꞌajt. Baꞌnxix e ela ke nyole te cye,
23 in che ayontok tiꞌj nyole ic tzaꞌn in che ayon xjal tiꞌj jbal tuj tkꞌijlalil taꞌw cyak.
24 Oc in chin jaw tzeꞌne cyucꞌil, mintiꞌ in xi cyniman ex mintiꞌ nneꞌl cyiꞌn cywitz wiꞌje tuꞌnju in chin tzalaje.
25 In cawine cyibaj ex cub nximane alcye tuꞌn tbant cyuꞌn, ic tzaꞌn jun rey in cub nej cywitz ke t-soldad. Tej in che bisuntok, xi nkꞌukbaꞌne cycꞌuꞌj.