Nimxix t-xilen aju nabl
28
At jul tjakꞌ txꞌotxꞌ jatum in jatz sak pwak, ex at lugar jatum in baj sakset kꞌan pwak.2 Aju ttxꞌotxꞌil cꞌuxbil, a in jatz tuj txꞌotxꞌ ex oc tocx kꞌoꞌn abj tuj kꞌakꞌ in cub ulj ex nnoꞌc te kꞌan cꞌuxbil.
3 Cyuꞌn xjal cnet tumlal tzaꞌn tten tuꞌn tten spicꞌun tuj klolj, in che cuꞌx max t-xeꞌpun txꞌotxꞌ tuj klolj ex atzun ma chixin in che oc ten jyolte ke abj.
4 In che cuꞌx tiꞌj jun sakbak tuj jul ex in cuꞌx cylacuꞌn toyꞌ jul cyuj ke lugar jatum mintiꞌ jun xjal najl, jatum mintiꞌ jun xjal nnicꞌ bet ex puro najchak tiꞌj tnam.
5 Tibaj txꞌotxꞌ in tzaj chꞌiy triw, atzun tujxi, mer ic tzaꞌn nojni tuꞌn kꞌakꞌ.
6 Atzun in che cnet ke tal abj zafiro cybi, tucꞌix kꞌan pwak, t-smon tib tucꞌil txꞌotxꞌ.
7 Mi ke kꞌanjan, mi ke cꞌutz, bajx cyil ka at jun be tjakꞌ txꞌotxꞌ.
8 Ke txcup ateꞌ tjakꞌ cꞌul mintiꞌ in che icꞌ bet tuj, ax icx ke balun.
9 Nneꞌtz cyiꞌn xjal ke abj cyuwxix tuꞌn cykꞌab, ex in baj cylacuꞌn tuj cycꞌuꞌj witz.
10 In che jaket ke toyꞌ pic cyuꞌn, ex tcyakil txcaj kꞌinumabl in cnet cyuꞌn.
11 In che maket ke nima cyuꞌn jatum in che tzaj jlet, ex nneꞌtz cyiꞌn tuj spicꞌun ke tiꞌxti ateꞌ tuj ewaj.
12 Pero ¿Jatum in tzaj aju nabl? ¿Alcye lugar taꞌ aju ojtzkibl?
13 Mintiꞌ baꞌn cyuꞌn xjal jteꞌ twiꞌ ju nabl, ex mlay cnet cyuꞌn tzalu twitz txꞌotxꞌ.
14 Aju nintz mar in tmaꞌn: Mintiꞌ at tzalu, ax icx in tmaꞌn mar: Mintiꞌ at wucꞌile.
15 Mlay chjet tuꞌn kꞌan pwak ex mlay lakꞌet tuꞌn sak pwak.
16 Mlay bant tchjet tuꞌn kꞌan pwak tbanilxix, ex mi cyuꞌn ke tal abj tbanilxix, ke cornalina ex ke zafiro cybi.
17 Mas wiꞌyilxix twitz kꞌan pwak ex twitz ju abj cristal tbi; mlay bant tchꞌexpunjtz cyucꞌil ke macbil kꞌan pwak cytxꞌotxꞌil.
18 Aju nabl mas tbanilxix twitz abj coral tbi, twitz abj cristal tbi ex cywitz ke tal abj perla cybi.
19 Aju abj at tuj Etiopía, topasio tbi, mlay pon ic tzaꞌn nabl, ex mlay bant tchjet tuꞌn kꞌan pwak tbanilxix.
20 ¿Jatumtzun in tzaj aju nabl? ¿Alcye lugar taꞌ ju ojtzkibl?
21 Ewan cywitz ke txcup ateꞌ tjakꞌ cꞌul ex cywitz ke chyuꞌj in che lipan twitz cyaꞌj.
22 Ax icx in cymaꞌn aju cynajbil cyimni ex ju camic: Nok chꞌin tkanil o kbiye tiꞌj jlu.
23 Pero ate Dios tzkilte be jatum taꞌ nabl, oꞌcx te baꞌn tuꞌn jatum in cnet,
24 porque in til Dios max jatum ponin baj ttxaꞌn txꞌotxꞌ ex in til tcyakilju at tjakꞌxi cyaꞌj.
25 Tej t-xi tkꞌoꞌn Dios talil cykꞌikꞌ ex tej tcub tkꞌoꞌn cymojonil ke nintz mar,
26 tej tcyaj bant tuꞌn tzaꞌn tten tuꞌn ttzaj jbal, ex tej tcyaj tkꞌoꞌn tbe kꞌancyok,
27 ax icx o til Dios tzꞌaklxix te nabl tuꞌn tajben, baj tqueꞌyin ex tma: Baꞌn aju nabl.
28 Xi tmaꞌn Dios cye xjal: Aju tuꞌn cynimane weye, atzun nablju; aju tuꞌn tel cypaꞌn cyibe tiꞌj ju mya baꞌn, atzun ojtzkiblju.