27
Cucx yolin Job ex tma:2 Cxel nmaꞌne jun yol axix toc twitz Dios aju at tipumal tuꞌn tbant tcyakil tuꞌn, aju tcꞌiꞌ txi tbinchaꞌn wiꞌje ex ma tzaj tkꞌoꞌn nimxix bis wiꞌje.
3 Acux in tzaj tkꞌoꞌn wipune tuꞌn wankꞌin chꞌintle,
4 mlay chin nicꞌane yol ex mlay cheꞌx nmaꞌne ke yol mya ax toc.
5 Acux itzꞌx kine, cucx cxel nmaꞌne mintiꞌ wile; mlay txi nnimane ka at ttxolil cyyole.
6 Mlay txi ncoline tuꞌn t-xi nmaꞌne ka tzꞌaklxix kine, porque in tmaꞌn wanmiye mintiꞌ wile.
7 Aju nnoꞌc tkꞌon tib te aj kꞌoj wiꞌje, tzajxwit tcastiw ic tzaꞌn cycastiw xjal mya baꞌn ex mya tzꞌakl.
8 Aju xjal aj il mintiꞌ jatum tuꞌn toc keꞌ tcꞌuꞌj oc tel kꞌiꞌn tchwinklal tuꞌn Dios.
9 Oc ttzaj xitbil tiꞌj, mlay cheꞌx tbiꞌn Dios ke tcubsbil.
10 Porque mya taꞌ ttzalajbil tiꞌj Dios aju at tipumal tuꞌn tbant tcyakil tuꞌn, ex mi jun maj in cubsan twitz.
11 Cxel nyecꞌune cyeye aju nimxix tipumal Dios ex alcye ke t-ximbetz Dios, aju at tipumal tuꞌn tbant tcyakil tuꞌn.
12 Ex katzun cycyakile o cyile, ¿tikuꞌntzun in tzaj cymaꞌne ke yol mintiꞌ cyajben?
13 Ke xjal jawni ex mya baꞌn, banin cycastiw tuꞌn Dios aju at tipumal tuꞌn tbant tcyakil tuꞌn;
14 masque nimcu cybaj cycꞌwaꞌl, che cymel tuj kꞌoj ex miꞌn cnet cywa.
15 Keju che cyjel ankꞌin che cymel tuꞌn txꞌuꞌj yabil ex mlay che okꞌ cyxuꞌjil cyiꞌj.
16 Aju xjal mya baꞌn, masque baj tchmoꞌn nimxix sak pwak ic tzaꞌn txꞌotxꞌ, ex masque ten nimxix t-xbalun,
17 pero jun xjal baꞌn tmod cꞌoquel xbaluminte cye ke xbalun lu, ex ju sak pwak lu cꞌajbel tuꞌn jun xjal baꞌn tmod.
18 Aju tja ju xjal mya baꞌn jacu cub xitj, mer ic tzaꞌn tkꞌuꞌ jun chyuꞌj ex mer ic tzaꞌn tpach jun xjal cwentil awal.
19 At tkꞌinumabl oc tcub coẍeꞌ mancbil maj, pero oc tel twatl mintiꞌtl at te.
20 Ctzajel nimxix t-xobil tiꞌj, ic tzaꞌn t-xobil oc in chꞌiy aꞌ, atzun te konicꞌan cxel kꞌiꞌn tuꞌn nintz cykꞌikꞌ.
21 Cꞌeletz jawoꞌn tuj tja tuꞌn nintz cykꞌikꞌ in tzaj tuj tjawitz kꞌij;
22 Cꞌoquel juban tuꞌn nintz cykꞌikꞌ ex mlay tzaj kꞌakꞌan tcꞌuꞌj Dios tiꞌj, masque jyon tumel tuꞌn ttzokpaj.
23 Che tzalajel xjal tuꞌnju otok tzaj mya baꞌn tiꞌj, che oquel ten xjal xmayil tiꞌj oc tetz ok tuj tja.