3 ¿Tbanilpetzun ke tconseja ex ke t-xnakꞌtzbila in cheꞌx tkꞌoꞌna teju xjal mintiꞌ chꞌin baꞌn tuꞌn?

4 ¿Alcye ma onin teya tuꞌnju ma tzaj tmana ke yol lu? ¿Alcye ma tzaj kꞌmante ke yol lu teya tuꞌnju ma yolina icju?

5 Ke cyimni in che luꞌlun tuꞌn cyxobil cyucꞌix keju najlke max t-xeꞌpun mar.

6 Aju cynajbil cyimni kꞌanchaꞌl twitz Dios ex mintiꞌ tmaksil tcub.

7 Tuꞌn Dios xi tlicꞌpuꞌn cyaꞌj tibaj ju mintiꞌtok at ex jaw tyoban txꞌotxꞌ tibaj ju mintiꞌ at.

8 Tuꞌn Dios chmoꞌn aꞌ tuj muj ex mintiꞌ in tzaj tzꞌak muj tjakꞌ talil;

9 nnoꞌc klolj twitz xjaw tuꞌn, oc nnoꞌc tkꞌoꞌn muj twitz;

10 ttxaꞌnpun mar cub tkꞌoꞌn jun tmojonil tuꞌn tten spicꞌun tuj jun plaj ex tuꞌn tten klolj tuj juntl plaj.

11 Oc in cawin Dios, in che tzaj luꞌlun ke nmak witz tuꞌn cyxobil, jatum kꞌejl cub ju cyaꞌj.

12 Tuꞌn tipumal Dios mayet mar; ex tuꞌnju tnabl cub tiꞌj nintz txcup Rahab tbi.

13 Tuꞌnju t-xew xi t-xupin, el spicꞌeꞌ twitz cyaꞌj; ex tuꞌn tkꞌab cub byoꞌn aju lobaj cyuwxix ojkelan.

14 Aju ma kbi tiꞌj tbinchben nok chꞌin; aju ma kbi tiꞌj tipumal, nok chꞌin. ¿Alcye jun jacu tzꞌel tnicꞌ tiꞌj tkꞌajkꞌajel tipumal in julin wen ic tzaꞌn kꞌancyok?