42
Xitzun ttzakꞌweꞌn Job te Kman:2 Baꞌn wuꞌne tcyakil in bant tuꞌna, ex misicyer jun mlaywit bant tuꞌna.
3 ¿Titzun we nxilen tuꞌnju o nmaye ka mya baꞌn aju in cub t-ximana ex aju in bant tuꞌna? In chin yolintoke tiꞌj aju mintiꞌ nneꞌl nnicꞌe tiꞌj, ex aju maꞌ t-xilen, aju mlayx tzꞌel nnicꞌe tiꞌj.
4 Chitzuna tmaya weye: Bintza, porque waje tuꞌn nyoline tucꞌila ex tzakꞌwentza ke nxjele lu, chitzuna.
5 Nej nok jun tkanil o nbiye tiꞌja, atzun jaꞌlo acu kine in chin queꞌyin teya.
6 Cyjaꞌtzun ma tzaj nbise tuꞌnju yol xi nmaꞌne ex nnuꞌl tilil wuꞌne, ex lu kine kꞌukl tuj kuk ex tuj tzaꞌj, chi Job.
Tzaj tkꞌoꞌn Dios t-xel tcyakilju otok naj te Job
7 Tbajlenxi tmaꞌn Kman tcyakil jlu te Job, ax icx xi tmaꞌn te Elifaz: Nimxix nkꞌoje tiꞌja ex cyiꞌj ke cabe tamiwoya, porque mya tuj tumel o che yoline wiꞌje, ic tzaꞌn te nmajene Job. 8 Cyiꞌntze wuk tor ex wuk tman ẍneꞌl, cyxiꞌye ma tucꞌil nmajene Job ex cypatun cube ke alumaj lu te chojbil cyile, ex atzunte nmajene Job cnaꞌl Dios cyiꞌje ex ctzajel nbiꞌne tnaꞌj Dios, tuꞌntzun miꞌn nbinchanteye jun mya baꞌn cyiꞌje, masque iltok tiꞌj tuꞌn ttzaj nkꞌoꞌne mya baꞌn cyiꞌje tuꞌnju mintiꞌ e yoline tuj tumel wiꞌje, ic tzaꞌn te nmajene Job o yolin tuj tumel, chi Dios.
9 E jeꞌxtzun Elifaz tucꞌix Bildad ex Zofar ex cybincha aju tzaj tmaꞌn Kman cye, ex tzaj tbiꞌn Kman aju tnaꞌj Dios Job.
10 Tbajlenxi naꞌn Job Dios cyiꞌj ke tamiw, tzaj tkꞌoꞌn Dios cab maj t-xel aju attok te Job nej. 11 E pontzun ke terman Job visitaril te, cyucꞌix ke tanb ex ke tamiw ex cycyakil xjal ojtzkiꞌmaj twitz cyuꞌn, ex cub cyicꞌsaꞌn jun nintz waꞌn cyucꞌil cycyakil keju otok che pon tja. Cycyakil e bisun junx tucꞌil Job ex e oc ten kꞌukbal tcꞌuꞌj tuꞌn tlaj tcyakilju yajbil otok tzaj t-samaꞌn Kman tiꞌj, ex teyle junjun cye xi cykꞌoꞌn chꞌin pwak te Job ex jun xmulkꞌabaj kꞌan pwak ttxꞌotxꞌil.
12 Cubtzun cyꞌiwlaꞌn Job tuꞌn Dios cyuj mancbil tabkꞌiyil mas nimxix ic tzaꞌn nej. Cyajlaj mil japun cybaj ke t-ẍneꞌl ex kak mil tcamey ex jun mil moj tboys ex jun mil cytxuꞌ tbur. 13 Ax icx tzaj wuktl tcyꞌajal ex oxtl tmeꞌjel. 14 Aju tnejel tmeꞌjel, Jemima tbi oc tkꞌoꞌn, aju tcabin, Cesia oc tbi ex aju toxin, Keren-hapuc oc tbi. 15 Tuj tcyakil twitz txꞌotxꞌ mintiꞌ juntl xuꞌj o pon queꞌyin ic tzaꞌn ke tmeꞌjel Job. Xi kꞌoꞌn cyetzbil tuꞌn cyman tiꞌj ju tkꞌinumabl, junx cyucꞌil ke cyxiban.