2 Juntl maj cxel nmaꞌne aju nbise nimxix, porque nimxix ma chin cꞌixbisanjtze tuꞌn Dios.

3 Nokwit baꞌn nbinteye jatum jacu cnet wuꞌne ex tzaꞌn tten tuꞌn npone jatum najl.

4 Jacwitlo tecu tzꞌoc nmaꞌne aju nyole, porque nimcu yol at wucꞌile te colbil wibe.

5 Jaculo tzꞌel nnicꞌe tiꞌj alcye yol ctzajel ttzakꞌweꞌn weye, ex jaculo tzꞌel nnicꞌe tiꞌj alcye ctzajel tmaꞌn weye.

6 Pero mlaylo yolin cyuw wucꞌile tuꞌnju at tipumal, nok oꞌcx jaculo chin cub tbiꞌn,

7 ex jaculo tzꞌel tnicꞌ tiꞌj ka at ttxolil nyole, jaculo tma weye ka mintiꞌ wile ex jaculo chin cyaj ttzokpiꞌn te jumajx.

8 In chin jyone tiꞌj Dios tuj tjawitz kꞌij pero mi aꞌl at, in chin jyone tiꞌj tuj telex kꞌij ex mintiꞌ in cnet wuꞌne.

9 In chinxe jyolte tuj tbankꞌab kꞌij, pero mintiꞌ in wile; in chinxe tuj tnayaj kꞌij, ax mintiꞌ in tzaj tyecꞌun tib weye.

10 Atzun te baꞌn tuꞌn jatum in chin bete; oc woque tuj malbil tuꞌn, chin elele mintiꞌ wile.

11 Cucx lepch kine tiꞌj ex mintiꞌ in chin el tzpete tiꞌj be ma cyaj tyecꞌun weye.

12 Cucx in che japun ke tley wuꞌne ax icx ke tmandamyent, ex mya aju wexe wajbil.

13 Oc in cub t-ximan tuꞌn tbant jun tiꞌxti tuꞌn, in bant tuꞌn ex mi aꞌl jun jacu mayonte te.

14 Aju ma cub t-ximan tuꞌn tbinchante wiꞌje, atzunju oc cbantel tuꞌn, ex at mastl ximamaj tuꞌn ic tzaꞌnx jlu.

15 Cyjaꞌtzun in chin xobe twitz, nok oꞌcx oc woc tene ximal tiꞌj in tzaj nim t-xobil wiꞌje.

16 Ate Dios aju at tipumal tuꞌn tbant tcyakil tuꞌn, ma tzaj baj ncꞌuꞌje tuꞌn, ex ma tzaj t-xobil wiꞌje.

17 Nokwit baꞌn ncub naje tuꞌn klolj konicꞌan ex tuꞌn nxi ewane tuꞌn.