22
Xitzun ttzakꞌweꞌn Elifaz aju aj Temán ex tma:2 ¿Chipetzuna ka tuꞌnju at nimxix tnabl xjal at tajben te Dios? 3 ¿Ti tajben te Dios aju at tipumal tuꞌn tbant tcyakil tuꞌn ka aya puro tzꞌaklxix ex mintiꞌ tpaltila?
4 Ka ma cub cawina tuꞌn Dios ex ka ma cub tcastiwoya tuꞌn, a jlu mya tuꞌnju in ajbena te tuj tumelxix,
5 nok oꞌcx tuꞌnju at nimxix mya baꞌn ma tbinchaya ex nimxix tila mintiꞌ bajsbil te.
6 El tkanina prent cye termaniya ex mya iltok tiꞌj; el tiꞌna cyxbalun toc cyiꞌj ex e cyaj tkꞌoꞌna sbikl cyiꞌj.
7 Tej in che txket mintiꞌ xi tkꞌoꞌna cycꞌa aꞌ; tej ttzaj weꞌyaj cyiꞌj mintiꞌ xi tkꞌoꞌna cywa.
8 Tuꞌnju at tipuna ex xoꞌna cyuꞌn xjal, oc tkꞌon tiba te tajaw cytxꞌotxꞌ.
9 Mintiꞌ xi tkꞌoꞌna alcye at tajben cye meba xuꞌj, ex e baj tyajlaꞌna ke cꞌwaꞌl mintiꞌ cyman ex cytxuꞌ.
10 Cyjaꞌtzun txolin tiꞌja jaꞌlo tuꞌn xobajil, ex minaben ma tzaj nim xobajil tiꞌja.
11 Tcyakil klolj taꞌ, mi jun tiꞌxti in tila; niban taj mulkꞌaja tjakꞌ nintz aꞌ.
12 Ate Dios tocx tibajxi cyaꞌj ex in cuꞌtz tqueꞌyin ke cheꞌw mas najchak cyjax.
13 ¿Tzaꞌntzun tten in tmaꞌna mintiꞌ toc tcwent Dios tiꞌj aju in bant cyuꞌn xjal, ex mintiꞌ tumel tuꞌn tcawin cyiꞌj tuꞌn tlaj mintiꞌ in til tuꞌn tlaj kꞌek muj?
14 Makoꞌn twitz tuꞌn muj ex mintiꞌ in til, oꞌcx in bet twitz cyaꞌj, in tzaj tuj jun plaj ex in pon tuj juntl plaj, chiya.
15 ¿Tajpeya tuꞌn tbeta tuj ojtxi be, aju o che bet ke xjal mya baꞌn tuj?
16 Akeju jurat naj e cyim, e jeꞌx ikan tuꞌn nima otok chꞌiy.
17 Che chi te Dios: Paꞌmil tiba kiꞌje. ¿Ti jacu tbincha Dios kiꞌj, aju Dios at tipumal tuꞌn tbant tcyakil tuꞌn? Che chi.
18 (Masque tuꞌn Dios otok noj cyja tuꞌnju nimcu at cye. Miwt pon nximbetze ic tzaꞌn cye ke xjal mya baꞌn.)
19 Tej cyqueꞌyinte ke tzꞌaklxix jlu, e tzalaj tiꞌj; ex keju mintiꞌ cyil xi cytzeꞌn, che chi cyjaꞌ:
20 Ma baj tzꞌeꞌy tuꞌn kꞌakꞌ cykꞌinumabl ke xjal mya baꞌn.
21 Bincham ttena tucꞌil Dios, tuꞌntzun ttena juntl maj tuj txubtxaj.
22 Kꞌonxa ambil tuꞌn ttzaj xnakꞌtzaꞌna tuꞌn, awancuꞌxa tyol tuj tanmiya.
23 Ka ma tzꞌajtz meltzꞌaja tucꞌil Dios aju at tipumal tuꞌn tbant tcyakil tuꞌn, ctela baꞌn ic tzaꞌn nej; ka ma tzꞌex tiꞌna ju mya baꞌn at tuj tjaya,
24 ex ka ma tzꞌoc tkꞌoꞌna kꞌan pwak aju wiꞌyilxix mer ic tzaꞌn kuk ex ic tzaꞌn nok alcyexcu abj at tuj tkꞌab xak,
25 cyjaꞌtzun tten ate Dios cꞌoquel te teya ic tzaꞌn kꞌan pwak ex ic tzaꞌn sak pwak nimxix.
26 Ctzalajela tuꞌn ex jacu yolina tucꞌil mintiꞌ t-xobila.
27 Ka ma cubsana twitz, jacu tzaj biꞌna tuꞌn ex cjapunel tuꞌna aju otok txi ttziyana te.
28 Baꞌn cꞌelel tcyakil aju tajbila tuꞌn tbant; ctel spicꞌun tuj tbeya.
29 Porque nnoꞌc te chꞌin toclen tuꞌn Dios aju xjal in jaw tniman tib, atzunte xjal mans in clet tuꞌn.
30 Oc cletela tuꞌn ka mintiꞌ tila, ka sak taꞌ tuj tanmiya.