3 Ten cypasense oc nyoline, ex nbajlenxi yoline, baꞌn cyxmayine wiꞌje ka cyajbile.

4 Mya tucꞌil xjal in chin kꞌojine; cyjaꞌtzun ma baj npasense.

5 Chin cyqueꞌyintze ex che elel secꞌpaje wiꞌje, ex miꞌn che kꞌajte.

6 Ka ma chin ximane wiꞌjxe, in chin el secꞌpaje ex in tzaj luꞌlun nximlale.

7 ¿Tikuꞌn cucx cyten ke xjal mya baꞌn, in che tijin ex in chmet cykꞌinumabl?

8 Nnoꞌc cyqueꞌyin oc in che chꞌiy ke cycꞌwaꞌl ex ke tal cychman, ax cytxlaj in che chꞌiy ex baꞌn ateꞌ.

9 Tuj txubtxaj ateꞌ tuj cyja, mi aꞌl jun in xobtzan cye ex mintiꞌ in cub cycastiw tuꞌn Dios.

10 Ke cytor cucx in che cꞌwaꞌlin; nnoꞌc ten cyal ke ttxu cywacẍ ex mintiꞌ in cub cyal naꞌnxtok tjapun tkꞌijlalil.

11 In che schan ke cycꞌwaꞌl ex in che lipan ic tzaꞌn ke tal ẍneꞌl.

12 In che bitzan tucꞌil tzalajbil ex in che tꞌicpaj tiꞌj t-sonil chnab arpa, tucꞌix tampor ex xux.

13 Tuj tzalajbil in pon baj cychwinklal ex tuj cheba in che cyim.

14 Che chi te Dios: Paꞌmil tiba kiꞌje, miꞌn kajbile tuꞌn kbinteye aju in tmaꞌna tuꞌn tbant kuꞌne.

15 ¿Ti toclen Dios aju at tipumal tuꞌn tbant tcyakil tuꞌn? ¿Ilpetzun tiꞌj tuꞌn kajben te? ¿Ti kganar tiꞌj tuꞌn kcubsan twitz? Che chi.

16 Tcyakilju at cye ke xjal mya baꞌn, mya cyuꞌnx in cnet. Miꞌn waje tuꞌn nximane ic tzaꞌn cye.

17 Mi jun maj in cub yupj cyspicꞌun ke xjal mya baꞌn. Mi jun maj in tzaj mya baꞌn cyibaj. Mi jun maj in jaw kꞌojl Dios cyucꞌil ex mi jun maj in che cꞌixbisanjtz tuꞌn. 18 Mi jun maj in che el sputj ic tzaꞌn in xi ikan ttxa triw tuꞌn xcyakinpaẍ.

19 Ma cymaye, cbel tkꞌoꞌn Dios cycastiw ke cꞌwaꞌl tuꞌn tlaj ju mya baꞌn o cybincha cyman, che chiye. Pero ax te xjal mya baꞌn cxel chjonte ju mya baꞌn o tbincha, tuꞌntzun tel tnicꞌ tiꞌj.

20 Oc ttzaj tkꞌoj Kman aju at tipumal tuꞌn tbant tcyakil tuꞌn, axte xjal mya baꞌn oc cꞌmolte castiw tuꞌn.

21 Oc tcyim, ¿ti toclen tiꞌj aju cbajel cyxol keju ateꞌ tuj tja?

22 (Pero, ¿alcye jun jacu txi tkꞌoꞌn xnakꞌtzbil te Dios, aju Dios in che oc tkꞌoꞌn tuj xjel keju maꞌ cyoclen?)

23 At junjun xjal in che cyim atx nim cyipun, in che tzalaj ex txubtxaj ateꞌ,

24 nimcu at cye ex baꞌn taꞌ cyximlal.

25 Ex at junjuntl, puro tuj cꞌixcꞌoj in che cyim ex mintiꞌ otok che ten chꞌin tuj txubtxaj.

26 Masque icju, pero cycyakil che pol tuj mukbil; cycyakil che bajel chyoꞌn cyuꞌn ẍukꞌ.

27 Baꞌn wuꞌne alcye in cub cyximane wiꞌje ex alcye nabl mya baꞌn kꞌiꞌn cyuꞌne.

28 In baj cykanine cyxolxe: ¿Jatum taꞌ jaꞌlo tja ju xjal mya baꞌn ex puro cyuw tmod? Che chiye.

29 ¿Naꞌnxpetzun cyyoline cyucꞌil ke xjal in che bet cyuj nimcu lugar? ¿Naꞌnxpetzun cybinteye ke yol in cymaꞌn?

30 Oc in tzaj tkꞌoj Dios in tzaj t-samaꞌn jun mya baꞌn cyiꞌj xjal, atzunte xjal mya baꞌn mintiꞌ in baj tiꞌj, che chi.

31 Mi aꞌl jun nnoꞌc kꞌmante te tibaj twitz alcyeju tbinchben, ex mi aꞌl jun in cub kꞌonte tcastiw tiꞌj tbinchben.

32-33 Octzun t-xi kꞌiꞌn tuj mukbil, cycyakil xjal lepch ke tiꞌj, at ke nejni ex at ke lepchix nnoꞌc cyxkꞌukin tuj mukbil, ax icx ju txꞌotxꞌ puro bunin twitz tnaꞌn.

34 Nok gan cyajbile tuꞌn toc cykꞌukbaꞌne ncꞌuꞌje. Puro nicꞌaj yol tcyakilju in cymaꞌne, chi Job.