3 Ma tzꞌel nchꞌixwiye tuꞌn tyola, pero baꞌn wuꞌne alcye cxel ntzakꞌweꞌne teya.

4 ¿Mintiꞌpetzun baꞌn tuꞌna icxix ttenju atxix tej tcub ten xjal twitz txꞌotxꞌ:

5 Aju ttzalajbil xjal mya baꞌn nok chꞌin in ten; aju tachbil nok chꞌin tuj in ten?

6 Masque japun baj tnimbil tib twitz cyaꞌj, ex masque pon tacl twiꞌ jatum taꞌ muj,

7 cnajel ic tzaꞌn ttxa alumaj, ex mlay cybi ke tamiw jatum otok pon.

8 Cbel naj ic tzaꞌn jun witzicꞌ, ex ic tzaꞌn jun in tzaj yecꞌun te xjal konicꞌan mer ic tzaꞌn tuj witzicꞌ, ex mi aꞌl jun jacu cnet xjal lu tuꞌn.

9 Keju e ten junx tucꞌil ex oc cyqueꞌyin twitz, mlay tzꞌoc cyqueꞌyin twitz juntl maj.

10 Cꞌajel cykꞌoꞌn tcꞌwaꞌl juntl maj aju otok tzꞌel telkꞌaꞌn cyman cye ke meba.

11 Atxtok tipun ex cuꞌxunxtok oc tcyim ex oc t-xi kꞌiꞌn tuj mukbil.

12 Aju mya baꞌn puro chiꞌ nneꞌla te te, ex in baj tlekꞌan takꞌ aju ttxubtxajal;

13 ax in cub tcꞌuꞌn ju ttxubtxajal tuj ttziꞌ ex cheba in txubt tcꞌoꞌn tiꞌj.

14 Octzun tcuꞌpun tuj tcꞌuꞌj nnoꞌc ic tzaꞌn tvenen lobaj. 15 In jatz t-xaꞌn aju kꞌinumabl otok txi tbalkꞌuꞌn; in jatz tiꞌn Dios tuꞌntzun mi cucx tten tuj tcꞌuꞌj.

16 In tzꞌubantok tiꞌj tvenen lobaj, ex atzun venen lu cbel byonte te.

17 Mlay achin tiꞌj lech ex ka taꞌl cab aju nimxix ic tzaꞌn nima.

18 Tcyakil aju otok tcamba cꞌajel tkꞌoꞌn juntl maj; mlay tzꞌoc te tajwil ex mlay achin tiꞌj tkꞌinumabl.

19 Porque e cub tyajlaꞌn ke meba ex e cyaj tcolin; oc tkꞌon tib te tajwil ke ja, akeju mya tuꞌn otok che jaw tbinchaꞌn.

20 Mintiꞌ in cyaj conporm tiꞌj nimcu at te, ex tcyakilju in pon tcꞌuꞌj tiꞌj in cnet tuꞌn.

21 mintiꞌ jun tiꞌxti in cyaj ten tuꞌn tuꞌn mi t-xi tchyoꞌn. Cyjaꞌtzun mlay ten baꞌn nim kꞌij.

22 Ka mas nimxix at te, mas tbis in tzaj; ctzajel nimcu mya baꞌn tiꞌj.

23 Oc toc ten nojsalte tcꞌuꞌj, ctzajel nim tkꞌoj Dios tiꞌj: ex ctzajel nim ttxꞌuꞌjil Dios tiꞌj.

24 Ka ma tzꞌel ok twitz byolte te tuꞌn spad, jacu tzaꞌw tuꞌn jun plech kꞌan cꞌuxbil.

25 Aju plech cꞌoquex xuypaj tuj t-ximlal, atzun twi plech cꞌelex tuj ttxꞌotxꞌ. Ctzajel nimxix xobajil tiꞌj.

26 Txolin tiꞌj tuꞌn nim klolj. Cbel tzꞌeꞌy tuꞌn kꞌakꞌ tucꞌix tcyakil tja. Aju kꞌakꞌ lu mya il tiꞌj jun xupilte tuꞌn tjaw cꞌant.

27 Tuj cyaꞌj cꞌelel til tuj kꞌanchaꞌl, ex aju txꞌotxꞌ ckꞌmalte alcye til.

28 Oc ttzaj nim tkꞌoj Dios tibaj, cnajel tcyakil tkꞌinumabl tuꞌn.

29 Atzun jlu banimaj tuꞌn Dios teju xjal mya baꞌn, atzun jlu ctzajel kꞌoꞌn te tuꞌn Dios.