3 Elaꞌ majxi chin oc cyicꞌleꞌne; ¿mintiꞌpe in tzaj cychꞌixwiye tuꞌnju in cybinchaꞌne wiꞌje icju?

4 Ex masque at wile, pero oꞌcx weye cbel ncastiwoye tuꞌn tlaj.

5 Atzun cyeye nnoꞌc cykꞌon cyibe mas baꞌn nwitze, ex nnoꞌc cymaꞌne tibaj nwitze aju yajbil weye.

6 Tzꞌelx cynicꞌe tiꞌj, ate Dios ma tzaj kꞌonte yajbil wiꞌje, ex tuꞌn Dios ma chin ocx kꞌoꞌne tuj cꞌobil.

7 Masque in chin jaw schꞌine: At jun nnoꞌc tzokpaj wiꞌje, nchiye, pero mi aꞌl in tzaj tzakꞌwente weye; in chin kanine onbil ex mi aꞌl in xi binchante wiꞌje.

8 Ma baj makoꞌn nbeye tuꞌn Dios tuꞌn miꞌn wexe; ex cyuj ke tkꞌab nbeye puro klolj ma tzꞌoc tuꞌn.

9 Ma tzꞌel tiꞌn tcyakil nkꞌinumable, ex ma tzꞌel tiꞌn woclene.

10 Biꞌx ma chin naje tuꞌn, ic tzaꞌn jun ja in cub xitj. Ic ma chin oque tuꞌn, ic tzaꞌn jun tzeꞌ in jatz lacut tlocꞌ; mintiꞌ jatum tuꞌn toc keꞌ ncꞌuꞌje.

11 Ma tzaj nim tkꞌoj wiꞌje ex ma chin oc kꞌoꞌne tuꞌn ic tzaꞌn jun aj kꞌoj.

12 Ma che tzaj tlajoꞌn cycyakil t-soldad wiꞌje; ma che cub ten tiꞌjele njaye ex ma bant cyten tuꞌn cyoc tzokpaj wiꞌje.

13 Tuꞌn Dios ma che el tlakꞌbaꞌn ke wermaniye ex ke wamiwoye wiꞌje, ex ma chin oc cykꞌoꞌn ic tzaꞌn mintiꞌ ojtzkiꞌn kine cyuꞌn.

14 Ke xjal at nxilene cyucꞌil ma chin cyaj coline cyuꞌn, ex ke wamiwoye ma tzicꞌ nnaꞌnjtze cyuꞌn.

15 Keju najl tuj njaye cyucꞌix ke nmajene xuꞌj, mer ic tzaꞌn mintiꞌ ojtzkiꞌn nwitze cyuꞌn, mer mintiꞌtl nneꞌl cynicꞌ wiꞌje.

16 Ka ma tzaj ntxcoꞌne jun nmajene xinak, mintiꞌtl in chin tzaj ttzakꞌweꞌn masque ma chin cubsane twitz.

17 In chin el icꞌune tuꞌn nxuꞌjile tuꞌn tlaj nim t-xew nxewe tuj ntziꞌye; ex mintiꞌ in che ul lakꞌeꞌ ke wermaniye ntxlaje tuꞌn tlaj nyabile.

18 Ax icx ke tal kꞌa in chin el icꞌune cyuꞌn; ex matok in chin jaw weꞌye, lu ke in che xmayin wiꞌje.

19 Ke xjal merxix wamiwoye ma chin el icꞌune cyuꞌn; ex keju cꞌujlaꞌnxix wuꞌne ma jaw cyiꞌn cyib wiꞌje.

20 Ma chin oc tzkije wen, mintiꞌ nchibjale, oꞌcx nbakile at ex pen ma chin cyaj ankꞌine.

21 Tzaj tzꞌeꞌy cycꞌuꞌje wiꞌje, akeye wamiw, porque tuꞌn Dios ma chin cꞌixbisanjtze.

22 ¿Tikuꞌn in che yajlane wiꞌje ic tzaꞌn in tbinchaꞌn Dios? ¿Bajxpetzun jatz cyganiye tuꞌn cyyajlane wiꞌje; baka nok jun majxi jlu?

23 Nokwit at jun cub tzꞌibante nyole ex tuꞌn tcyaj tzꞌibet tuj jun libro.

24 Nokwit at jun cub tzꞌibante twitz plom ex ka twitz abj tuꞌn jun tal cꞌuxbil tzꞌuꞌp twiꞌ, tuꞌn tcyaj ten te jumajx.

25 Baꞌn wuꞌne aju colol wiꞌje itzꞌte, ex ccolil wiꞌje tzalu twitz txꞌotxꞌ.

26 Ex masque ma naj nchibjale, pero acuwe kin chin queꞌyil twitz Dios.

27 Acu kine chin queꞌyilte cyuꞌn ke tbakꞌ nwitze, ex mya junxitl. Nimxix waje tuꞌn toc nqueꞌyine.

28 Ex ka ma cymaye: ¿Alcye tumel tuꞌn tcub tiꞌj tnabl kuꞌn? Tuꞌnx til Job ma tzaj ju yajbil tiꞌj, ka che chiye.

29 Tuꞌntzun jlu che xobe twitz spad, porque aju spad lu atzun in ajben tuꞌn Dios tuꞌn tcub tcastiw xjal mya baꞌn. Tzꞌelx cynicꞌe tiꞌj ka at jun jwes tuꞌn t-xi binchante wiꞌje.