24
¿Tikuꞌn mintiꞌ in tzaj tmaꞌn Dios aju at tipumal tuꞌn tbant tcyakil tuꞌn jtoj tuꞌn t-xi tbinchaꞌn cyiꞌj xjal, tuꞌntzun toc cyqueꞌyin keju in che niman te?2 Ke xjal mya baꞌn in baj cychꞌexpuꞌn cymojonil txꞌotxꞌ, in xi cyelkꞌaꞌn cyẍneꞌl xjal tuꞌntzun tchmet cybaj ke cyẍneꞌl;
3 nneꞌl cyiꞌn cybur ke cꞌwaꞌl mintiꞌ cyman ex cytxuꞌ ex nneꞌl cyiꞌn cywacẍ ke meba xuꞌj te prent.
4 Nneꞌl cylajoꞌn ke meba xjal tuj be, ex tuꞌn jlu in xi cyewan cyib ke meba xjal cywitz.
5 Ke meba ic cyten ic tzaꞌn ke bur te tjakꞌ cꞌul ateꞌ tuj tzkij txꞌotxꞌ, nim in che akꞌnan tuꞌn tcnet cywa, ex atzun tuj tzkij txꞌotxꞌ in cnet cywa cycꞌwaꞌl.
6 In cheꞌx sucwil triw tuj cycojbil xjal, ex sucwil twitz uva tuj cytxꞌotxꞌ xjal mya baꞌn.
7 Nneꞌx akꞌbil cyuꞌn mintiꞌ jun cyxbalun toc te txaybil cyiꞌj; cucx in cub cyapaꞌn cheꞌw. 8 In che acꞌ tuꞌn jbal in cub twi witz, ex in cheꞌx xmujil t-xe pic.
9 Ke xjal mya baꞌn in xi cyiꞌn ke tal neꞌ cucx cychꞌuꞌn, cyal ke meba xuꞌj, ex nneꞌl cyiꞌn cycꞌwaꞌl ke xjal meba tuꞌn tlaj mintiꞌ in chjet cycꞌas.
10 Ke xjal meba in che bet mintiꞌ cyxbalun toc. Oꞌcx in che ikan cytriw xjal, atzun cye nim weꞌyaj nnicꞌx cyuꞌn.
11 In che cheꞌn tiꞌj twitz olivo tuꞌn tbant aseyt cyuꞌn; in che waban tiꞌj twitz uva tuꞌn tbant cycꞌa xjal vin, ex atzun cye nim txketleꞌn nnicꞌx cyuꞌn.
12 Tuj tnam in che okꞌ ex in che ayin cyuwxix wen akeju chꞌix cycyim, atzunte Dios mintiꞌ in tzaj tbiꞌn cynaꞌj Dios.
13 At junjun xjal nneꞌl cyicꞌun aju spicꞌun ex tuj tcyakil cybe nneꞌl cypaꞌn cyib tiꞌj.
14 Atx kwitz in jaw weꞌ aju byol xjal tuꞌn tcub tbyoꞌn ju meba, ex oc ttzaj klolj nnoꞌc ten elkꞌal.
15 Aju xjal aj pajil nok yoꞌn tuꞌn oc toc kax ex octzun nnoꞌc tmaksiꞌn twitz, tuj t-ximbetz ka mi aꞌl jun jacu tzꞌel tnicꞌ tiꞌj.
16 Ke elekꞌ nnoꞌcx cylacuꞌn t-xe cyja xjal konicꞌan. Cycyakil jlu cyewan cyib kꞌijl; cycꞌiꞌ tuꞌn cyten tuj spicꞌun.
17 Aju t-spicꞌumal kꞌij ic tten te cye ic tzaꞌn klolj nimxix; mas baꞌn tuj cywitz tuꞌn cybet konicꞌan, porque mintiꞌ t-xobil cyiꞌj.
18 Aju xjal mya baꞌn in xi ikan tuꞌn aꞌ in bet cyuw wen. Aju ttxꞌotxꞌ in tzaj kanin mya baꞌn tibaj, ex mi aꞌl in akꞌnan tiꞌj tkan t-uva.
19 Ic tzaꞌn in cub ulj ttxa cheꞌw tuꞌn taꞌw cyak; cyjaꞌxtzun in cub naj xjal aj il tuj mukbil.
20 Cꞌicꞌel tnaꞌnjtz tuꞌn ttxuꞌ; ex cbajel waꞌn cyuꞌn ẍukꞌ, ex mi aꞌl jun ctzajel naꞌnte te. Aju xjal mya baꞌn cnajel ic tzaꞌn jun tzeꞌ oc nnicꞌ txꞌemin.
21 O cꞌixbisan cyiꞌj ke xuꞌj miban che alin ex cyiꞌj ke meba xuꞌj; ex mintiꞌ onin cyiꞌj.
22 Atzunte Dios, tuꞌn tipumal in che cub t-xitun ke xjal at nimxix cyipun; oc tcawin Dios cyibaj mi aꞌl jun xjal segur taꞌ tchwinklal twitz.
23 In xi tkꞌoꞌn Dios ambil cye tuꞌn cyankꞌin tuj txubtxaj, pero toc tcwent tiꞌj tzaꞌn in che bet twitz.
24 Aju xjal in jaw tniman tib nok chꞌin tuj in ten, jurat in cub naj. Ic tten ic tzaꞌn cꞌul in tzkij oc in jatz bakoꞌn, ex ic tzaꞌn twi triw in cub paktzꞌuꞌn.
25 Ex katzun mya ic ttenju, ¿alcye jun jacu tma weye ka nok tten wuꞌne, ex tuꞌn ttzaj tmaꞌn ka ma chin tzpete tiꞌj?