9 Ex ke aj Leví, atzun ke jlu: Jesúa aju tcyꞌajal Azanías, Binúi aju tiyjil Henadad ex Cadmiel; 10 cyucꞌix ke terman, ex atzun ke jlu: Sebanías, Hodías, Kelita, Pelaías, Hanán, 11 Micaía, Rehob, Hasabías, 12 Zacur, Serebías, Sebanías, 13 Hodías, Bani ex Beninu.

14 Ke nejenel cye tnam xjal, atzun ke jlu: Paros, Pahat-moab, Elam, Zatu, Bani, 15 Buni, Azgad, Bebai, 16 Adonías, Bigvai, Adín, 17 Ater, Ezequías, Azur, 18 Hodías, Hasum, Bezai, 19 Harif, Anatot, Nebai, 20 Magpías, Mesulam, Hezir, 21 Mesezabeel, Sadoc, Jadúa, 22 Pelatías, Hanán, Anaías, 23 Oseas, Hananías, Hasub, 24 Jalohes, Pilha, Sobec, 25 Rehum, Hasabna, Maasías, 26 Ahías, Hanán, Anán, 27 Maluc, Harim ex Baana.

28 Atzun ke mastl xjal, ke pal, ke aj Leví, ke xkꞌukil cytzi tpwertil tnam, ke bitzal, ke ajbel tuj tja Dios ex cycyakil keju otok tzꞌel cypaꞌn cyib cyiꞌj ke xjal tuj lugar lu tuꞌn tjapun tley Dios cyuꞌn, cyucꞌix ke cyxuꞌjil, ke cycyꞌajal ex ke cymeꞌjel, akeju otok tzꞌoc cyximbetz, 29 oc cymojban cyib cyucꞌil keju at cyxilen cyucꞌil ex cyucꞌil ke nejenel cye, tuꞌn t-xi cytziyan jun yol axix toc twitz Dios, tuꞌn cybet ic tzaꞌnx in tmaꞌn ley aju tzaj tkꞌoꞌn Dios te Moisés aju tmajen, ex tuꞌn cyjapunxix cycyakil tmandamyent Kman cyuꞌn, ke orden tuꞌn ex ke tley. 30 Cyjaꞌtzun xi cymaꞌn cyjaꞌ: Mlay cheꞌx kkꞌoꞌne ke kmeꞌjele tuꞌn cymojeꞌ cyucꞌil ke xjal najl tuj txꞌotxꞌ lu ex mlay txi kkꞌoꞌne ambil tuꞌn cymojeꞌ ke cymeꞌjel cyucꞌil ke kcyꞌajale. 31 Ex oc cyul ke xjal te txꞌotxꞌ lu, akeju mya Judiy ke, cꞌayil cycꞌaꞌẍ ex cꞌayil tcyakil txcaj twitz cyawal cyuj kꞌij te ojlabl, mi jun cycꞌaꞌẍ cꞌelel klakꞌoꞌne, mi tuj kꞌij te ojlabl ex mi tuj alcyex juntl ninkꞌij; ax icx tuj twukin abkꞌi cꞌojlal txꞌotxꞌ kuꞌne ex cbel knajsaꞌne cycꞌas keju at cycꞌas kucꞌile.

32 Ax icx bant tiꞌj kuꞌne tuꞌn t-xi kkꞌoꞌne jun tal sak pwak tuj junjun abkꞌi tuꞌn tajben tuj tja Dios, 33 tuꞌn tajben tuꞌn cybant ke pan in che cub ten twitz Dios, cyucꞌix ke oyaj twitz awal tuꞌn tcub ten tcyakil kꞌij, cyucꞌix ke oyaj patun in che cub tcyakil kꞌij, cyucꞌix ke chojbil in cheꞌx kꞌot cyuj kꞌij te ojlabl ex cyuj ninkꞌij oc ttzaj queꞌyin juntl acꞌaj xjaw, ex cyuj junjuntl ninkꞌij maꞌ cyoclen, ex cyiꞌj oyaj xjansaꞌmaj, cyucꞌix ke chojbil te najsbil cyil aj Israel, ex tiꞌj tcyakilju in ajben tuj cꞌulbil tuj tja Dios.

34 Ax icx ke pal, ke aj Leví ex cycyakil tnam xjal, ic tzaꞌnx cyajlal ke junjun cꞌloj at cyxilen cyxolx, jaw kiꞌne swert cyiꞌj alcye cꞌloj cyiyjil tuꞌn cytzaj kꞌinte siꞌ tuj junjun abkꞌi tuj tja Dios tuj kꞌij banin tiꞌj, tuꞌn tajben te patbil chojbil twi altar te Kman aju Kdiose, ic tzaꞌnx tzꞌibamaj tuj ley. 35 Ax icx bant tiꞌj kuꞌne tuꞌn t-xi kiꞌne tcyakil abkꞌi tuj tja Kman, ke tnejel cywitz awal nneꞌl tuj kcojbile, tucꞌix cywitz cycyakil awal baꞌn tloꞌnjtz twitz, 36 ax icx tuꞌn cyxi kiꞌne tuj tja Kman Dios, cywitz ke pal in che ajben tuj tja, ke nej kcyꞌajale ex ke tnejel cyal ke kwacẍe ex ke tnejel cyal ke kẍneꞌle, ic tzaꞌnx tzꞌiban tuj ley. 37 Ax icx bant tiꞌj kuꞌne tuꞌn t-xi kiꞌne tuj cꞌubl twitz awal tuj tja Dios, aju tnejel arin in bant kuꞌne ex tnejel cywitz cycyakil tzeꞌ baꞌn tloꞌnjtz cywitz, ex tnejel taꞌl twitz uva ex tnejel chibj aseyt in bant kuꞌne, tuꞌntzun tajben cye ke pal. Ax icx tuꞌn t-xi kiꞌne tlajiꞌn tiꞌj twitz awal in jaw tuj kcojbile, tuꞌn tajben cye aj Leví, tuꞌnju ake at cyoclen tuꞌn cycꞌmonte tlajiꞌn twitz kawale.

38 Ex octzun cyxiꞌ aj Leví kꞌilte tlajiꞌn tiꞌj twitz awal, aju banin te cye, cxel cyucꞌin jun pal tiyjil Aarón cyucꞌil. Atzun cye aj Leví cꞌelel cypaꞌn tlajiꞌn tiꞌj tlajiꞌn otok cycꞌam, ex cxel cyiꞌn tuj cꞌubl twitz awal tuj tja Dios. 39 porque ke aj Israel ex ke aj Leví in xi cyiꞌn oyaj tiꞌj twitz triw, taꞌl twitz uva ex chibj aseyt tuj lugar jatum cꞌuꞌn ke macbil xjan ex jatum ateꞌ ke pal in che ajben tuj tja Dios ex jatum ateꞌ ke xkꞌukil ttzi tja Dios ex ke bitzal. Ex xi ktziyane tuꞌn miꞌn tcyaj kcoline tja Dios.