6 E octzun ten aj Israel naꞌl Dios cyjaꞌ: Aya Kmane ex mintiꞌ juntl, aya binchante cyaꞌj ex aju at max tibajxi cyaꞌj, cyucꞌix cycyakil ke cheꞌw ateꞌc twitz; aya binchante txꞌotxꞌ tucꞌix tcyakilju at twitz; aya binchante cye mar tucꞌix tcyakilju at cyuj. Aya in tkꞌoꞌna cychwinklal cycyakil; cyjaꞌtzun, cycyakil keju ateꞌ tuj cyaꞌj nim cyajlal in che cꞌulun twitza.

7 Aya Nman Dios jaw t-scꞌona Abram, aya etz kꞌinte te tuj Ur aju cytanmi aj Caldey, ex aya oc kꞌonte juntl tbi Abraham. 8 El tnicꞌa tiꞌj ka aju xinak lu kꞌukl tcꞌuꞌj tiꞌja, ex cyaj bant tiꞌj jun tyola tucꞌil tuꞌn t-xi tkꞌoꞌna cytxꞌotxꞌ aj Canaán cye tiyjil, tucꞌix cytxꞌotxꞌ aj Hetey, aj Amorrey, aj Ferezey aj Jebusey ex aj Gergesey, ex ma japun tyola porque tzꞌaklxixa. 9 O tila aju cꞌixbisabl icꞌx cyuꞌn ke kxeꞌchele tuj Ejipt ex o tbiya tej cyjaw ayayan ttzi Mar Cyak Queꞌyin. 10 O tbinchaya ke binchben nim cyipumal tiꞌj rey Faraón, cyiꞌj cycyakil ke tmajen ex cyiꞌj cycyakil ke xjal ateꞌtok tuj ttanmi, porque o tila tej cyoc puro jawni cyiꞌj aj Israel. Cyjaꞌtzun cyaj xeꞌt tkanil tiꞌja ka nim tipumala, ex cucx tten jaꞌlo. 11 Cub tpaꞌna mar cywitz, ex atzun e icꞌx aj Israel tuj tmij mar tuj tzkij, atzun ke aj kꞌoj cyiꞌj, e cyaj tmulkꞌiꞌna max t-xeꞌpun mar, mer ic tzaꞌn jun abj in cuꞌx tzꞌak max t-xeꞌpun nim aꞌ. 12 Te kꞌijl cub neja cywitz tuj muj, ex te konicꞌan cub neja cywitz tuj tkan kꞌakꞌ tuꞌn t-spicꞌbanteya tuj cybe jatum tuꞌn cybet.

13 O cubila twi witz Sinaí ex max twitz cyaꞌj tzaj yolina cyucꞌil; tzaj tmaꞌna cye ke yol tzꞌaklxix te cawbil, ke xnakꞌtzbil axix toc, ke ley ex ke mandamyent baꞌnxix. 14 Ax icx xi t-xnakꞌtzaꞌna cye tuꞌn cyajben ke kꞌij te ojlabl cyuꞌn te cꞌulbil teya, ex tzaj tkꞌoꞌna ke mandamyent cye, cyucꞌix ke ley ex ke xnakꞌtzbil, aju tzaj tmaꞌna te tmajena Moisés. 15 Ax icx xi tkꞌoꞌna cywa, aju wabj tzaj tuj cyaꞌj, tuꞌn tel weꞌyaj cyiꞌj ex tzaj tkꞌoꞌna cycꞌa aꞌ etz tuj pic, tuꞌn tel txketleꞌn cyiꞌj. Ex xi tmaꞌna cye tuꞌn cyoc te tajwil txꞌotxꞌ aju otok txi ttziyana cye.

16 Atzun ke kxeꞌchele jaw cyniman cyib, e oc miban che bin ex mintiꞌ xi cyniman ke tmandamyenta. 17 Mintiꞌ xi cyniman tyola ex mintiꞌ tzaj cynaꞌn aju binchben nim tipumal otok bant tuꞌna te colbil cye. E oc miban che bin ex jaw cyscꞌoꞌn jun nejenel cyxol tuꞌn cyaj kꞌiꞌn juntl maj tuꞌn tuj yajbil cye tuj Ejipt. Pero aya jun Dios in cub tnajsaꞌna cyil xjal, at xtalbil tucꞌila, in kꞌakꞌan tcꞌuꞌja cyiꞌj xjal, yaj in tzaj tkꞌoja ex nim tcꞌujlalila; cyjaꞌtzun mintiꞌ e cyaj tcolina. 18 Masque cub cybinchaꞌn jun tilbilal tal wacẍ binchaꞌmaj tiꞌj cꞌuxbil in cub ulj oc tocx kꞌoꞌn tuj kꞌakꞌ, ex cyma ka atzun dios jlu otok tzꞌetz kꞌinte cye tuj Ejipt, ex cybincha mastl nintz il twitza; 19 pero mintiꞌ e cyaj tcolina tuj lugar tzkij txꞌotxꞌ, porque tzaj kꞌakꞌan tcꞌuꞌja cyiꞌj. Aju muj cub ten cyibaj kꞌijl te yecꞌul cybe mintiꞌ el tpaꞌn tib cyiꞌj, ax icx tkan kꞌakꞌ cub ten cyibaj te konicꞌan tuꞌn t-spicꞌbante tuj cybe mintiꞌ el tpaꞌn tib cyiꞌj. 20 Ax icx xi tkꞌoꞌna T-xewa baꞌn te xnakꞌtzalte cye. Cabal o canun wabj maná tzaj tkꞌoꞌna cye, ex xi tkꞌoꞌna aꞌ te cycꞌa tuꞌn tel txketleꞌn cyiꞌj. 21 Tuj 40 abkꞌi e oc tcꞌaꞌchana tuj lugar tzkij txꞌotxꞌ ex cabal o canun tcyakil cye; mintiꞌ o baj cyxbalun ex mintiꞌ xi mal cykan.

22 Xi tkꞌoꞌna ke cawbil ex ke mastl nasyon cye; xi t-sipana te cyetzbil, e oc te tajwil txꞌotxꞌ Hesbón jatum in cawintok rey Sehón, ex e oc te tajwil txꞌotxꞌ Basán jatum in cawintok rey Og. 23 Tuꞌna chmet nim cybaj ke cycꞌwaꞌl, ic tzaꞌn cyajlal ke cheꞌw ateꞌ twitz cyaꞌj, ex e pon tiꞌna tuꞌn cycꞌmonte ju txꞌotxꞌ te cyetzbil, aju otok txi ttziyana tuꞌn t-xi tkꞌoꞌna te cyetzbil ktzan cyman. 24 E ocxtzun ke cycꞌwaꞌl ex cub cyiꞌj ke xjal aj Canaán cyuꞌn, ex cycyakil ke xjal najlke tuj txꞌotxꞌ lu e cyaj tkꞌoꞌna tjakꞌ cycawbil; atzun ke cyrey cyucꞌix ke mastl xjal ax najlke, e jeꞌx tkꞌoꞌna tuj cykꞌab tuꞌn cybinchante cyiꞌj nok alcye cyajbil. 25 E oc te cyajwil ke tnam toc muro cyiꞌj ex tbanil txꞌotxꞌ, cyucꞌix ke ja nojni cyuj cyuꞌn ke tiꞌxti tbanilxix, ex ke xoch, ke tkan uva, ke tkan olivo ex mastl txcaj tzeꞌ baꞌn tloꞌnjtz cywitz, e waꞌn tejxi tnoj cycꞌuꞌj wen, e gordyix ex e achin tiꞌj t-xtalbila nimxix.

26 Pero e oc miban che bin, el cypaꞌn cyib tiꞌja ex el cyicꞌun tleya. E cub cybyoꞌn ke t-sanjela tuꞌnju xi cychicꞌbaꞌn cyil ke xjal, ex tuꞌnju xi cymaꞌn cye tuꞌn cyajtz meltzꞌaj juntl maj tucꞌila, ex nimxix mya baꞌn cybincha twitza. 27 Cyjaꞌtzun e jeꞌx tkꞌoꞌna tuꞌn cycub tzꞌak tuj cykꞌab aj kꞌoj cyiꞌj, ex e baj yajlaꞌn cyuꞌn. Te tibajxi, tej cynaꞌnte taꞌw yajbil cye, e octzun ten kanil onbil teya, atzun teya, tuꞌnju at nim tkꞌakꞌbil tcꞌuꞌja, e tzaj tbiꞌna max tuj cyaꞌj ex e jaw buyj ke xinak te colol cyiꞌj tuj cykꞌab ke aj kꞌoj.

28 Pero tej cynaꞌnte ateꞌtok chꞌin tuj txubtxaj, in che oc ten juntl maj binchal mya baꞌn twitza; cyjaꞌtzun e cyaj tkꞌoꞌna tuꞌn cycub tzꞌak tuj cykꞌab aj kꞌoj cyiꞌj ex e yajlanjtz cyuꞌn. Tuꞌn jlu e oc ten juntl maj kanil onbil teya, ex atzun teya, tuꞌnju at nimxix tkꞌakꞌbil tcꞌuꞌja, e tzaj tbiꞌntla max tuj cyaꞌj, ex nimcu maj e clet tuꞌna tuj yajbil cye. 29 Xi tmaꞌna cye tuꞌn tjapun juntl maj tleya cyuꞌn, atzun cye jaw cyniman cyib twitza ex mintiꞌ xi cyniman tmandamyenta, e icꞌ tibaj tcawbila aju in tkꞌoꞌn chwinklal teju xjal in japun tuꞌn, e oc miban che bin ex txꞌuꞌj cywiꞌ, ex mintiꞌ xi cyniman tyola. 30 Nim abkꞌi o ten tpasensa cyiꞌj ex xi tchicꞌbaꞌna cye tuꞌn tten cycwent cyiꞌj, xi tmaꞌna cye tuꞌn T-xewa Xjan ex tuꞌn cyyol ke t-sanjela, pero mintiꞌ xi cybiꞌn, cyjaꞌtzun e cyaj tkꞌoꞌna tjakꞌ cycawbil mastl nasyon twitz txꞌotxꞌ. 31 Masque icju, pero tuꞌnju at nim tkꞌakꞌbil tcꞌuꞌja, mintiꞌ e naj tuꞌna te jumajx ex mintiꞌ e cyaj tcolina; porque aya jun Dios at xtalbil tucꞌila ex at nim tkꞌakꞌbil tcꞌuꞌja.

32 Cyjaꞌtzun Kman Dios, aya Dios maꞌxix toclena, at nim tipumala ex xobajilxixa, in japun tyola aju in cyaj bant tiꞌj tuꞌna ex aju tcꞌujlalila nimxix cucx in ten, miꞌn tzꞌoc tkꞌoꞌna te chꞌin tcyakilju nintz castiw ma tzaj cyibaj kreye, cyibaj ke nejenel kxole, cyibaj ke pal ateꞌ kxole, cyibaj ke t-sanjela ateꞌ kxole, cyibaj ke kxeꞌchele ex cyibaj cycyakil xjal aj Israel; max tzaj xeꞌt jlu tuj tkꞌijlalil tej cyten ke rey te Asiria ex cucx tten jaꞌlo. 33 Pero mya aya at til tiꞌj tcyakilju mya baꞌn ma tzaj kiꞌje; porque tuj tumelxix aju ma tbinchaya, atzun keye ma kbinchaye mya baꞌn. 34 Tzaꞌnx ke kreye, ax icx ke nejenel ateꞌ kxole, ke pal ateꞌ kxole, ex ke kxeꞌchele, mintiꞌ o japun tleya cyuꞌn; mintiꞌ xi cyniman ke tmandamyenta ex mintiꞌ xi cyniman aju xi tmaꞌna cye. 35 Tej cyten tuj cyex cycawbil ex tej ttzaj tkꞌoꞌna nim tiꞌxti cye tuj txꞌotxꞌ lu, aju nim ex tbanilxix, mintiꞌ e cꞌulun teya ex mintiꞌ cyaj cycolin cybinchben mya baꞌn.

36 Ko tqueꞌyintza jaꞌlo, ma ko oque te majen tujx txꞌotxꞌ tzaj tkꞌoꞌna cye kxeꞌchele tuꞌn cywaꞌn tiꞌj tcyakil twitz awal in tzaj tkꞌoꞌn ex tiꞌj kꞌinumabl at tuj. 37 Aju twitz awal nimxix in tzaj tkꞌoꞌn txꞌotxꞌ, atzun in xi kꞌoꞌn cye ke rey, akeju ma che oc tkꞌoꞌna te cawil kibaje tuꞌn tlaj kile, ex in cybinchaꞌn kiꞌje nok alcye cyajbil ex cyiꞌj ke kalune. Cyjaꞌtzun puro bis atoꞌye, che chi aj Israel tuj cynaꞌj Dios.

38 Tuꞌn tcyakil jlu a koꞌye ma txi ktziyane jun yol axix toc ex ma cub ktzꞌibane twitz jun uꞌj, ex aju uꞌj ma tzꞌoc cyseyarin ke nejenel keye, cyucꞌix ke aj Leví ex ke pal, ex ma che pirmarin tiꞌj.