Cycyakil xjal in che bin tiꞌj ley tej tjaw t-schꞌiꞌn. 4 Ate Esdras aju xnakꞌtzal tiꞌj ley, waꞌltok tibaj jun waꞌlbil tzꞌlom aju otok cub binchaꞌn tuꞌn tajben tuj kꞌij lu, ex tuj tbankꞌab waꞌlketok Matatías, Sema, Anías, Urías, Hilcías ex Maasías ttxlaj. Atzun tuj tnayaj e cub ten Pedaías, Misael, Malquías, Hasum, Hasbadana, Zacarías ex Mesulam. 5 Cubtzun tjakoꞌn Esdras libro te ley cywitz cycyakil xjal, ex tuꞌnju maꞌ tjaw aju waꞌlbil twitz cyaꞌj, cyjaꞌtzun kꞌanchaꞌl cye cycyakil xjal. Tejtzun tjaket libro, cycyakil xjal e cub weꞌ. 6 Octzun ten Esdras nimsal tbi Kman aju Dios maꞌxix toclen, ex cycyakil xjal jaw cyiꞌn cykꞌab twitz cyaꞌj ex cyma: Icxwitju, icxwitju; e cub ẍmejeꞌ tejxi tpon tacl tibaj cywitz max twitz txꞌotxꞌ ex e oc ten cꞌulul te Kman.

7 Atzun ke aj Leví: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán ex Pelaía, atzun ke jlu e jeꞌx chicꞌbante tley Dios cye xjal, atzun cye xjal ax waꞌlketok tujx cylugar. 8 Jaw cyschꞌiꞌn aj Leví aju in tmaꞌn tuj libro te tley Dios tucꞌil tkꞌajkꞌajel cywiꞌ cyuw, ex xi cychicꞌbaꞌn aju in tmaꞌn tuj libro tuꞌn tel cynicꞌ xjal cabalxix tiꞌj. 9 Cycyakil xjal e oc ten okꞌel tej cybinte aju in tmaꞌn ley, atzunte Nehemías aju gobernador, tucꞌix Esdras aju xnakꞌtzal tiꞌj ley ex pal, cyucꞌix aj Leví, akeju e jeꞌx chicꞌbante ley cye xjal, xi cymaꞌn cye cycyakil tuꞌn miꞌn cybisun ex tuꞌn miꞌn cyokꞌ, porque aju kꞌij lu paꞌmaj tuꞌn tajben te cꞌulbil te Dios, aju Cydios. 10 Ax icx xi tmaꞌn Nehemías cye: Cyaje ex che chyoꞌne tiꞌj tbanil chibj, che cꞌane taꞌl twitz uva chiꞌ ex cykꞌonxe chꞌin cye keju mintiꞌ banimaj cye, porque aju kꞌij lu, jun kꞌij paꞌmaj tuꞌn Kman tuꞌn tajben te cꞌulbil te. Miꞌn che bisune, porque aju tzalajbil tuꞌn Kman in tkꞌoꞌn cyipumale.

11 Ax icx ke aj Leví xi cykꞌukbaꞌn cycꞌuꞌj xjal, xi cymaꞌn cye tuꞌn miꞌn cykꞌajt ex tuꞌn miꞌn cyokꞌ, porque aju kꞌij lu paꞌmaj tuꞌn Kman tuꞌn tajben te cꞌulbil te. 12 Cycyakiltzun xjal e jeꞌx waꞌl ex cꞌal, ex xi cykꞌoꞌn cywa keju mintiꞌ cywa banimaj ex cub cyicꞌsan jun nintz ninkꞌij tuꞌnju cabalxix el cynicꞌ tiꞌj ju otok tzaj xnakꞌtzaꞌn cye.

13 Tuj juntl kꞌij cycyakil ke nejenel cye junjun cꞌloj xjal at cyxilen cyxolx, cyucꞌix ke pal ex ke aj Leví, oc cychmon cyib tucꞌil Esdras aju xnakꞌtzal tiꞌj ley, tuꞌn cyxnakꞌtzan tiꞌj ju in tmaꞌn ley, 14 ex e oc noj tiꞌj jun yol tzꞌiban tuj ley jatum in tmaꞌn aju otok tma Kman te Moisés, ka tuj twukin xjaw il tiꞌj tuꞌn tcub cyicꞌsaꞌn aj Israel ninkꞌij, cykꞌijlalil ke tal ja t-xak tzeꞌyin cywiꞌ ex il tiꞌj tuꞌn cyten cyuj. 15 Extzun tkanil cyuj cycyakil tnam ex tuj Jerusalén, tuꞌn cyxiꞌ xjal tuj cꞌul jyolte t-xak olivo, t-xak kꞌatxab, t-xak xaꞌj ex mastl tzeꞌ polin cyxak, tuꞌn tbaj cybinchaꞌn ke tal ja t-xak tzeꞌyin cywiꞌ, ic tzaꞌn tzꞌibamaj tuj ley. 16 E extzun ke xjal ex e ul meltzꞌaj kꞌiꞌn t-xak tzeꞌ cyuꞌn, tuꞌn cybant tal ja t-xak tzeꞌyin cywiꞌ, twi cyja ex ka ttxaꞌn cypeꞌn teyle junjun, ax icx ttxaꞌn tpeꞌn tja Dios ex tuj plas tcub ttxlaj tpwertil tnam aju toc tbi Tpwertil Aꞌ, ax icx tuj juntl plas tcub ttxlaj tpwertil tnam, aju toc tbi Pwert te Efraín. 17 Cycyakil aj Israel, akeju otok che etz tuj Babilonia ex otok che ul tuj Jerusalén, jaw cybinchaꞌn ke tal ja t-xak tzeꞌyin cywiꞌ, ex axtzun e ten cyuj. Atxix tuj tkꞌijlalil Josué aju tcyꞌajal Nun, bajxtok bant jun maj ic tzaꞌnju o bant tuj kꞌij lu, ex nimxix e tzalaj ke xjal. 18 Tuj enter wuk kꞌij cub cyicꞌsaꞌn ninkꞌij ex tcyakil kꞌij jaw t-schꞌiꞌn Esdras junjun tnej yol in tmaꞌn tuj libro te tley Dios; tzyet tuꞌn tuj tnejel kꞌij ex pon baj tuj mancbil kꞌij, ex tuj tumin kꞌij oc jun buyj tibil cyuꞌn maꞌ t-xilen, ic tzaꞌn tzꞌiban tuj ley.