4 Ke tiyjil Joel, atzun ke jlu: Ate Joel tman Semaías, atzunte Semaías tman Gog, atzunte Gog tman Simei, 5 atzunte Simei tman Micaía, atzunte Micaía tman Reaía, atzunte Reaía tman Baal, 6 ex atzunte Baal tman Beera. Ate Beera aju nejenel cye aj Rubén xi kꞌiꞌn pres tuꞌn Tiglat-pileser aju rey cye aj Asiria.

7 Ke terman Beera e oc te nejenel cye junjun cꞌloj cyiyjil ex cuꞌx tzꞌiban cybi tuj libro, ex atzun ke jlu: Jeiel, Zacarías, 8 tucꞌix Bela aju tcyꞌajal Azaz ex tal tchman Sema aju tcyꞌajal Joel. Ate Bela o najan tuj tnam Aroer ex aju ttxꞌotxꞌ pon baj max tuj tnam Nebo ex tuj tnam Baal-meón. 9 Ex o najan tuj tumlal tjawitz kꞌij ex pon baj ttxꞌotxꞌ max ttxaꞌnpun tzkij txꞌotxꞌ, aju tzkij txꞌotxꞌ in tzaj keꞌ max ttzi nima Éufrates, porque otok chmet nimxix twacẍ tuj txꞌotxꞌ Galaad.

10 Tuj tkꞌijlalil tej tcawin Saúl oc kꞌoj cyuꞌn ke tiyjil Rubén cyucꞌil aj Agaren, cub cyiꞌj aj Agaren cyuꞌn, ex atzun e cub ten ke tiyjil Rubén tuj tumlal tjawitz kꞌij tuj txꞌotxꞌ Galaad.

11 Ke tiyjil Gad, atzun e najan tuj txꞌotxꞌ Basán, tibaj cytxꞌotxꞌ ke aj Rubén, ex pon baj cytxꞌotxꞌ max tuj tnam Salca. 12 At cyaje nejenel cyxol ex atzun ke jlu: Aju tnejel Joel tbi, ex atzunju mas maꞌ toclen, atzunju tcabin Safán tbi, atzunju toxin Jaanai tbi, ex atzunju tcyajin Safat tbi. 13 Ex atzun ke cyerman jlu: Micael, Mesulam, Seba, Jorai, Jacán, Zía ex Heber. Wuk cybaj tuꞌn tcyakilx ex nejenel ke cye junjun cꞌloj cyiyjil. 14 Atzun ke jlu tcyꞌajal Abihail, ate Abihail tcyꞌajal Huri, atzunte Huri tcyꞌajal Jaroa, atzunte Jaroa tcyꞌajal Galaad, atzunte Galaad tcyꞌajal Micael, atzunte Micael tcyꞌajal Jesisai, atzunte Jesisai tcyꞌajal Jahdo, ex atzunte Jahdo tcyꞌajal Buz. 15 Ate Ahí aju tcyꞌajal Abdiel ex tal tchman Guni oc te nejenel cye ke tiyjil. 16 Cycyakil ke jlu atzun e najan tuj txꞌotxꞌ Galaad, ex tuj txꞌotxꞌ Basán, ex cyuj ke aldey ateꞌ tuj, ex cyuj ke cywabl alumaj tuj lugar Sarón tbi, max jatum ponin baj. 17 Cycyakil ke jlu cuꞌx tzꞌiban cybi tuj libro jatum cuꞌx tzꞌibet cybi cycyakil cꞌloj cyiyjil tuj tkꞌijlalil tej tten Jotam te rey tuj Judá, ex tej tten Jeroboam te rey cyxol aj Israel.

18 Ke xinak tiyjil Rubén ex tiyjil Gad cyucꞌix mij tiyjil Manasés cyuw cycꞌuꞌj tuj kꞌoj, kꞌiꞌmlex ke macbil in che ajben tuj kꞌoj cyuꞌn tucꞌix spad ex xobl plech, ex xnakꞌtzamnixix ke wen tuꞌn cykꞌojin. Attok 44 mil tucꞌil wuk syent tucꞌil 60 xinak otok bant tuꞌn cyxiꞌ tuj kꞌoj. 19 Ex e kꞌojin cyiꞌj aj Agaren, cyiꞌj tiyjil Jetur, cyiꞌj tiyjil Nafis ex cyiꞌj tiyjil Nodab, 20 ex o tzꞌonin Dios cyiꞌj; cub cyiꞌj aj Agaren cyuꞌn, cyucꞌix keju mojl cyyol cyucꞌil e cub tzꞌak ke tuj cykꞌab, porque tej ateꞌtok tuj kꞌoj xi cykanin te Dios tuꞌn cytzaj onin ke tuꞌn. O onin Dios cyiꞌj porque oc keꞌ cycꞌuꞌj tiꞌj. 21 Ex tzaj cyiꞌn cywacẍ ke aj kꞌoj cyiꞌj, tzaj cyiꞌn 50 mil chej camey tucꞌix cab syent 50 mil ẍneꞌl ex cab mil chej bur, ex jun syent mil xjal tzaj cyiꞌn pres. 22 Nimcu aj kꞌoj e cyim, porque ate Dios o onin cyiꞌj tuꞌn toc kꞌoj. Ex axtzun e cyaj ten ke aj Rubén najal cyuj ke lugar lu tejxi tpon tkꞌijlalil tej cyxi kꞌiꞌn tuj juntl txꞌotxꞌ najchak.

23 Ke mij tiyjil Manasés e najan tuj txꞌotxꞌ tzajni tuj Basán ex ponin baj max tuj Baal-hermón, Senir, ex twi witz Hermón, porque nimcu cybaj. 24 Akeju nejenel cye junjun cꞌloj cyiyjil, atzun ke jlu: Efer, Isi, Eliel, Azriel, Jeremías, Hodavías ex Jahdiel. Cycyakil ke xinak lu cyuwxix cycꞌuꞌj tuj kꞌoj, najchak pon baj tkanil cyiꞌj, ex nejenel ke cye junjun cꞌloj cyiyjil. 25 Pero el cypaꞌn cyib tiꞌj Tdios cyxeꞌchel, cyaj cycolin Kman, ex e oc ten cꞌulul cywitz ke cydios tnam xjal otok che naj tuꞌn Dios ex otok che ex tlajoꞌn cywitz. 26 Tuꞌntzun jlu oc ten Cydios aj Israel toꞌyil teju xjal Pul tbi, aju rey te Asiria, ex ax juntl tbi Tiglat-pileser, tuꞌn cyxi tpresin ke aj Rubén ex ke aj Gad, cyucꞌix mij tiyjil Manasés, ex tuꞌn cyxi tiꞌn tuꞌn cypon cyuj ke lugar Halah, Habor, Hara ex ttzi nima Gozán, ex axtzun ateꞌx jaꞌlo.