3 Ke tcyꞌajal Etam, atzun ke jlu: Jezreel, Isma, ex Idbas, ex attok jun cyanb ke jlu, Haze-lelponi tbi. 4 Ate Penuel cyxeꞌchel aj Gedor, ex atzunte Ezer cyxeꞌchel aj Husa. Atzun ke jlu tiyjil Hur aju nej tal Efrata, aju cyxeꞌchel ke aj Belén.

5 Ate Asur aju tman Tecoa o ten cabe t-xuꞌjil, Hela tbi jun, ex Naara tbi juntl. 6 Ate Naara cytxuꞌ Ahuzam, Hefer, Temeni ex Ahastari. Atzun ke jlu tal Naara. 7 Ke tal Hela, atzun ke jlu: Zeret, Jezoar ex Etnán.

8 Ate Cos tman Anub ex Zobeba ex ax cyxeꞌchel ke tiyjil Aharhel, aju tcyꞌajal Harum.

9 Ate Jabes mas maꞌ toclen cywitz ke mastl terman. Jabes tbi oc tkꞌoꞌn ttxuꞌ porque tma: Ax toc tucꞌil nim cꞌixcꞌoj ma tzul itzꞌj. 10 Oc ten Jabes naꞌl Dios, aju Cydios aj Israel, ex tma: In chin cubsane twitza, Nman, tuꞌn ttzaj tkꞌoꞌna tcyꞌiwbila wibaje ex jun ntxꞌotxꞌe maꞌxix; chin tonintza ex chin tcloma teju mya baꞌn, tuꞌntzun miꞌn ncꞌisbisanjtze, chi Jabes. Ex tzaj tkꞌoꞌn Dios tcyakil aju otok txi tkanin.

11 Ate Quelub aju terman Súa tman Mehir; atzunte Mehir tman Estón; 12 atzunte Estón cyman Bet-rafa, Paseah ex Tehina, aju cub kꞌonte ju tnam Nahas. Atzun ke jlu najlke tuj tnam Reca.

13 Ke tcyꞌajal Cenaz, atzun ke jlu: Otoniel ex Seraías. Ke tcyꞌajal Otoniel, atzun ke jlu: Hatat 14 ex Meonotai aju tman Ofra. Ate Seraías tman Joab aju cyxeꞌchel ke xjal najlke tuj chkꞌajlaj Carisim; atzun tbi chkꞌajlaj oc cykꞌoꞌn tuꞌnju at cynabl tuꞌn cybinchante tcyakil txcaj akꞌuntl tbanilxix.

15 Ke tcyꞌajal Caleb aju tcyꞌajal Jefone, atzun ke jlu: Iru, Ela ex Naam. Ate Ela tman Cenaz.

16 Ke tcyꞌajal Jahalel, atzun ke jlu: Zif, Zifa, Tirías ex Asareel. 17-18 Ke tcyꞌajal Esdras, atzun ke jlu: Jeter, Mered, Efer ex Jalón. Ate Mered o mojeꞌ tucꞌil Bitia aju tmeꞌjel Rey Faraón, ex atzun ke cycꞌwaꞌl jlu: María, Samai ex Isba. Ate Isba tman Estemoa. Ax icx cnet juntl t-xuꞌjil Mered cyxol ke tiyjil Judá, ex atzun ttxuꞌ Jared aju tman Gedor, ex ax ttxuꞌ Heber aju tman Soco ex ax ttxuꞌ Jecutiel aju tman Zanoa.

19 Ke tal t-xuꞌjil Hodías aju tanb Naham, aju tman Keila, atzun ke jlu: Dalia aju aj Garmit, ex Estemoa aju aj Maacatey.

20 Ke tcyꞌajal Simón, atzun ke jlu: Amnón, Rina, Ben-hanán ex Tilón.

Ke tcyꞌajal Isi, atzun ke jlu: Zohet ex Benzohet.

21 Ke tiyjil Sela aju tcyꞌajal Judá, atzun ke jlu: Er tbi jun, aju tman Leca, ex Laada tbi juntl, aju tman Maresa, cyucꞌix junjuntl cꞌloj tiyjil in che akꞌnan tiꞌj xbalun lino tuj Bet-asbea, 22 Joacim tbi juntl ex akeju najlketok tuj Cozeba; Joás tbi juntl ex Saraf tbi juntl, akeju e jaw mojeꞌ cyucꞌil ke xuꞌj aj Moab ex e pon meltzꞌaj juntl maj tuj Belén, ic tzaꞌn in tmaꞌn tuj ojtxi txꞌolbaben tiꞌj. 23 Atzun ke jlu binchal xar ke; najlketok tuj Netaim ex tuj Gedera, ex in che ajbentok te rey.

24 Ke tcyꞌajal Simeón atzun ke jlu: Nemuel, Jamín, Jarib, Zera ex Saúl. 25 Ate Saúl tman Salum; atzunte Salum tman Mibsam, ex atzunte Mibsam tman Misma.

26 Ate Misma tman Hamuel, atzunte Hamuel tman Zacur, ex atzunte Zacur tman Simei. 27 Ate Simei o tzaj kaklaj tcyꞌajal ex kak tmeꞌjel, atzun ke mastl terman mya nim cycꞌwaꞌl o tzaj, cyjaꞌtzun ke tiyjil Simeón mintiꞌ e chmet-xix ic tzaꞌn ke tiyjil Judá. 28 Atzun najlketok cyuj ke tnam Beerseba, Molada, Hazar-sual, 29 Bilha, Ezem, Tolad, 30 Betuel, Horma, Siclag, 31 Bet-marcabot, Hazar-susim, Bet-birai ex Saaraim. Atzun ke tnam lu etzanx cyuꞌn tej ttzyet tcawin David. 32 Ex attok jweꞌtl tnam tzyuꞌn cyuꞌn, atzun ke jlu: Etam, Aín, Rimón, Toquén ex Asán, 33 cyucꞌix ke aldey ateꞌ cyiꞌjele, ex ponin baj max tuj tnam Baalat. Atzun ke lugar lu jatum e najan ex atzun cybi ke cyxeꞌchel.

34 Atzun cybi junjun nejenel jlu: Mesobab, Jamlec, Josías aju tcyꞌajal Amasías, 35 tucꞌix Joel ex Jehú aju tcyꞌajal Josibías, (ate Josibías tcyꞌajal Seraías, ex atzunte Seraías tcyꞌajal Asiel;) 36 tucꞌix Elioenai, Jaacoba, Jesohaía, Asaías, Adiel, Jesimiel, Benaía, 37 ex Ziza. (Ate Ziza tcyꞌajal Sifi, atzunte Sifi tcyꞌajal Alón, atzunte Alón tcyꞌajal Jedaías, atzunte Jedaías, tcyꞌajal Simri, atzunte Simri tcyꞌajal Semaías.) 38 Akeju ma jaw cybi lu, atzun ke nejenel cye junjun cꞌloj cyiyjil. Como o chmet nimxix cyiyjil, 39 cyjaꞌtzun e pon jyolte cywa cyẍneꞌl max ttxaꞌn tnam Gedor, tuj tumlal tjawitz kꞌij te chkꞌajlaj, 40 ex atzun cnet tbanil cꞌul cyuꞌn ma chixin, puro chaꞌx ex at nim, ex matij twitz txꞌotxꞌ, segur taꞌ, ex puro baꞌn tten. Ex atzun e najan ke tiyjil Cam ojtxi ma chixin. 41 Pero tuj tkꞌijlalil tej tten Ezequías te rey tuj Judá, e ul keju ma jaw cybi ex cub cybyoꞌn ke tiyjil Cam ex cub cyxitun ke cyja, ex atzun ke e cyaj ten najal tuj cylugar, porque attok cywa ke cyẍneꞌl tuj. 42 Ax icx attok jweꞌ syentl xinak ax tiyjil Simeón ke, e jeꞌx tuj tiwitz txꞌotxꞌ Seir, ex atzun ke nejenel cye jlu: Pelatías, Nearías, Refaías ex Uziel, tcyꞌajal Isi ke, 43 ex cub cybyoꞌn ke tiyjil Amalec, akeju otok che cyaj ankꞌin. Atxixtzun cyponlen najal ma chixin ex ax ateꞌx jaꞌlo.