—Kꞌontza ambil weye tuꞌn tjaw nscꞌoꞌne cablaj mil xinak, ex tujx konicꞌan jaꞌlo chin elexe tuꞌn tcub tiꞌj David wuꞌne. 2 Octzun tbaj tipun ex oc t-sict wen, chin oquel tzokpaje tiꞌj tuꞌn ttzaj t-xobil wuꞌne, ex cycyakiltzun ke xjal ateꞌ tucꞌil che elel ok. Nok oꞌcx te rey David cbel nbyoꞌne, 3 ex biꞌx che tzajel wiꞌne cycyakil xjal tuꞌn cyten tucꞌila. Aju teya tajbil atzun, tuꞌn tcyim oꞌcx jun xinak, tuꞌntzun cycyaj ten cycyakil xjal tuj txubtxaj.

4 Aju t-ximbetz Ahitofel baꞌn ela tuj twitz Absalón ex tuj cywitz cycyakil ke cytijil xjal aj Israel. 5 Pero ax icx xi tmaꞌn Absalón tuꞌn t-xi txocbaj Husai aju aj Arquit, tuꞌntzun tmante jun te tyol tiꞌj jlu. 6 Tejtzun tpon Husai twitz Absalón, xi tmaꞌn Absalón te:

—Aju t-ximbetz Ahitofel atzun jlu, ¿ocpelo cbantel kuꞌn ex ka miꞌn? Kꞌmantz jun teya tyol tiꞌj jlu.

7 Atzunte Husai xi ttzakꞌweꞌn:

—Aju t-ximbetz Ahitofel jaꞌlo mya baꞌn taꞌ, 8 porque baꞌn tuꞌna, aju tmana ex ke t-soldad puro cyuw cycꞌuꞌj tuj kꞌoj, ex pyorlo jaꞌlo malo tzaj nimxix cykꞌoj, ic tzaꞌn in tzaj tkꞌoj jun ttxu oso te tjakꞌ cꞌul oc in che el kꞌiꞌn ke tal. Ax icx tmana jun xinak at nim tnabl tuꞌn tkꞌojin, ex mlay ten cyxol xjal tuj konicꞌan jaꞌlo. 9 Ya malo txi tewan tib tuj jun toyꞌ pic ex ka tuj juntl lugar. Ex ka biꞌx ma che cub junjun teya t-soldad oc ttzyet kꞌoj, ex ka at junjun ma cybi jlu, oclo cyma cyjaꞌ: Ke xjal ma che oc lpeꞌ tiꞌj Absalón ma cub cyiꞌj, che chilo. 10 Cyjaꞌtzun, cyucꞌixpe ke xinak cyuw cycꞌuꞌj tuj kꞌoj ex ke xinak at nim cyipun ic tzaꞌn tipun jun nintz balun, jumajx ctzajel baj cycꞌuꞌj tuꞌn jlu; porque cycyakil ke aj Israel baꞌn cyuꞌn, ate tmana ex ke xinak lepchoꞌc tiꞌj, puro cyuw cycꞌuꞌj tuj kꞌoj. 11 Jaꞌlotzun cxel nkꞌoꞌne jun tconseja: Chmon baja cycyakil xjal aj Israel, ctzajelx keꞌ tuj Dan tuꞌn tpon baj max tuj Beerseba, porque aju cyajlal xjal lu ic tten ic tzaꞌn ttxa tzaꞌn at ttzi mar, ex twitzelcuya cꞌoquel te nejenel cyxol tuj kꞌoj. 12 Jacutzun ko oc tzokpaj tiꞌj tmana nok alcyex lugar jatum taꞌ. Nok minaben ctzyetel kꞌoj kuꞌn cyiꞌj, tuꞌnju nimxix ke kbaj, ex mi jun cyjel ankꞌin kuꞌn, mi tmana ex mi ke soldad ucꞌin tuꞌn. 13 Ka ma pon cyclon cyib tuj jun tnam, kcyakil aj Israel koꞌ cxel kiꞌn ksakbak tiꞌj tnam lu, tuꞌntzun cycuꞌtz jawet ke abj cyoc te muro tiꞌj, ex che xel kjawoꞌn cycyakil abj tuꞌn cypon jawet max tuj tkꞌab xak, ex mi jun abj cyjel ten ma chixin, chi Husai.

14 Atzunte Absalón ex cycyakil aj Israel mojeꞌ cyyol ka aju te Husai tconsej mas baꞌn ela twitzju te Ahitofel. (Porque tuꞌn Kman baj ttzacsaꞌn t-ximbetz Ahitofel aju otok tma tuj tumelxix, tuꞌntzun tcub tzꞌak ju mya baꞌn tibaj Absalón.) 15 Te tibajxi xi tmaꞌn Husai cye pal Sadoc ex Abiatar aju consej otok txi tkꞌoꞌn Ahitofel te Absalón ex cye ke cytijil xjal aj Israel, ax icx aju te tconsej otok txi tmaꞌn. 16 Xi tmaꞌn cye tuꞌn t-xi cymaꞌn naj tkanil te David, tuꞌn miꞌn tcyaj ten David tuj konicꞌan lu cytxlaj xajbil aꞌ tuj lugar mintiꞌ cynajbil xjal tuj, nok oꞌcx tuꞌn ticꞌx jlajxi nima Jordán tuꞌntzun miꞌn cycub byoꞌn, mi a David ex mi ke t-soldad.

17 Atzun ateꞌtok Jonatán tucꞌix Ahimaas jatum in jatz jlet twi aꞌ En-rogel tbi, porque mintiꞌ tumel tuꞌn t-xi cyyecꞌun cyib tuj tnam, cyjaꞌtzun nok jun majen xuꞌj pon kꞌmalte tkanil cye, e jeꞌxtzun naj tuꞌn t-xi cymaꞌn te rey David. 18 Pero e ilwaj tuꞌn jun cuꞌxun, ex xiꞌ naj ju cuꞌxun kꞌmalte te Absalón. Pero ate Jonatán tucꞌix Ahimaas jurat e icꞌ naj ex e pon tja jun xinak at tuj Bahurim, ex e cuꞌx naj tuj jun jul jatum in jatz aꞌ, tcub ttxaꞌn peꞌn. 19 Aju t-xuꞌjil ju xinak lu jurat naj cub tlicꞌun jun xbalun te maksibl ttzi jul, ex cub t-sputun triw bajumaj tibaj ju xbalun tcub ttzi jul. Cyjaꞌtzun mi jun el tnicꞌ tiꞌj. 20 Tejtzun cypon ke xinak otok cheꞌx samaꞌn tuꞌn Absalón, xi cykanin te xuꞌj:

—¿Jatum taꞌ Ahimaas tucꞌix Jonatán?

—Atzun ẍe ex tzalu tuꞌn cypon ttzi nima, chi xuꞌj xi ttzakꞌweꞌn.

Atzun cye xinak e jeꞌx jyol cye, ex tuꞌnju mintiꞌx e cnet cyuꞌn e aj meltzꞌaj juntl maj tuꞌn cypon tuj tnam Jerusalén. 21 Cyajlenxitzun ke xinak lu, e jatz Ahimaas tucꞌix Jonatán tuj jul, ex e jeꞌx ojkelan tuꞌn cypon kꞌolte tkanil te rey David; ex xi cymaꞌn te tuꞌn ticꞌ ex tuꞌn ticꞌx naj tuj nima, porque ate Ahitofel otok baj consejarinte cye xjal tuꞌn cyoc tzokpaj cyiꞌj. 22 Atzunte David cyucꞌix cycyakil xjal ateꞌ tucꞌil e icꞌ naj ex e icꞌx tuj nima Jordán. Ya tej kskix te juntl kꞌij, cycyakil otok che icꞌx tuj nima.

23 Tejtzun tel tnicꞌ Ahitofel tiꞌj ka mintiꞌ otok txi cyniman xjal ju tconsej otok txi tmaꞌn, oc tkꞌoꞌn t-siy tbur ex aj meltzꞌaj tja max tuj ttanmi. Tbajlenxitzun tmaꞌn cye keju ateꞌ tuj tja alcye tuꞌn tbant cyuꞌn, oc tcꞌaloꞌn tkul ex jaw tyoban tib tuꞌn tcyim. Cyjaꞌtzun tten cyim Ahitofel, ex ax cuꞌx makuꞌn jatum otok cuꞌx makuꞌn ktzan tman.

24 Otok pon David tuj tnam Mahanaim tej ticꞌx Absalón tuj nima Jordán cyucꞌix cycyakil aj Israel. 25 Otok tzꞌoc tkꞌoꞌn Absalón ju xjal Amasa tbi te nejenel cye soldad te t-xel Joab. Ate Amasa tcyꞌajal jun xinak aj Israel Itra tbi, aju otok cub tmojban tib tucꞌil ju xuꞌj Abigail tbi, aju tmeꞌjel Nahas ex terman Sarvia aju ttxuꞌ Joab.

26 Ate Absalón cyucꞌix ke aj Israel, atzun e cub ten tuj txꞌotxꞌ Galaad. 27 Tejtzun tpon David tuj tnam Mahanaim, e etz ox xjal canul tiꞌj, ex atzun ke jlu: Sobi aju tcyꞌajal Nahas aju aj Rabá aju taꞌ tuj tcwent Amón; tucꞌix Maquir aju tcyꞌajal Amiel aju aj Lodebar; ex tucꞌix Barzilai aju aj Rogelim aju taꞌ tuj tcwent Galaad. 28 Tzaj cyiꞌn ke pop te cyjakꞌ xjal, cyucꞌix ke palangán ex ke cꞌil; ax icx tzaj cyiꞌn triw, sebad, arin, triw txꞌilsamaj, xcarbans, tucꞌix jun wik chenakꞌ lenteja tbi, 29 tucꞌix taꞌl cab, manteca, cyes, ex cyucꞌix ke ẍneꞌl, tuꞌntzun tajben te tchiꞌ David ex cyucꞌix ke xjal ateꞌ tucꞌil, porque cub cyximan ka otok che sict ex nneꞌl cycꞌuꞌj ex in txket tiꞌj cycꞌuꞌj tuꞌnju otok che tzaj tuj lugar mintiꞌ cynajbil xjal tuj.