—¿Ti til jlu ma tzaj tiꞌna?

Atzunte Siba xi ttzakꞌweꞌn:

—Ke bur lu atzun cyil, tuꞌn cyjax keju ateꞌ tuj tja rey chejil cyibaj; ke pan ex ke lobj atzun til, tuꞌn txi cywaꞌn ke soldad, ex ju taꞌl twitz uva atzun til, tuꞌn t-xi cycꞌaꞌn keju che sictel tuj lugar mintiꞌ cynajbil xjal tuj.

3 —¿Jatum taꞌ Mefi-boset aju tal tchman ktzan tpatrona Saúl? Chi rey xi tkanin te.

Atzunte Siba xi ttzakꞌweꞌn:

—Ma cyaj ten Mefi-boset tuj Jerusalén, porque ximan tuꞌn ka tuꞌn toc kꞌoꞌn te rey cye aj Israel jaꞌlo, tuꞌnju toctok tchman te rey nej.

4 —Baꞌn, ya jaꞌlo teya tcyakilju at te Mefi-boset, chi rey xi ttzakꞌweꞌn.

—Cucxwit tzaj kꞌakꞌan tcꞌuꞌja wiꞌje Tat Rey, chi Siba xi ttzakꞌweꞌn, ex cub mocꞌeꞌ twitz rey.

5 Tejtzun tpon rey David tuj jun tal tnam Bahurim tbi, etz jun xinak tiyjil Saúl canul tiꞌj. Ate xjal lu Simei tbi, aju tcyꞌajal Gera, ex cyjaꞌtok ttzaj in xmayin tiꞌj David, 6 ex in xoꞌntok abj tiꞌj ex cyiꞌj cycyakil ke xjal at cyoclen ttxlaj; masque ate rey cwentin cyuꞌn cycyakil xjal ex cyuꞌn ke xjal axix cyoc cwentil te, 7 pero ate Simei in yolintok mya baꞌn tiꞌj ex in tmaꞌntok:

—Texa tzalu aya binchal mya baꞌn ex byol xjal. 8 Tuꞌn Kman ma cub tcastiwoya tiꞌj tcyakil mya baꞌn o tbinchaya cyiꞌj ke tiyjil Saúl, tuꞌnju aya cyaj ten te rey te t-xel. Ya jaꞌlo ate Kman ma txi kꞌonte ju cawbil te Absalón aju tcyꞌajala tuꞌn toc te rey, ex ma tzaj jun mya baꞌn tiꞌja tuꞌnju tbinchbena mya baꞌn, porque aya byol xjal, chi Simei.

9 Atzunte Abisai aju tal Sarvia xi tmaꞌn te rey:

—¿Tikuꞌn nnoꞌc ten xjal lu yolil mya baꞌn tiꞌja Tat Rey? Ic tten xjal lu ic tzaꞌn jun txꞌyan cyimni. Biꞌx jaꞌlo cꞌelel ntxꞌemine twiꞌ.

10 Atzunte rey xi ttzakꞌweꞌn:

—A jlu mintiꞌ cyeye cyoclen tiꞌj, akeye tal Sarvia. Ka in yolin xinak lu mya baꞌn wiꞌje, alo Kman ma tzaj kꞌmante te. Ex tuꞌntzun jlu alcye baꞌn tkꞌmante: ¿Tikuꞌn in tbinchaꞌn xinak lu icju?

11 Xi tmaꞌntl rey te Abisai ex cye cycyakil keju at cyoclen ttxlaj:

—Axpe jun ncyꞌajale nnoꞌc tilil tuꞌn ncyime tuꞌn, pyortzunlo jun xinak cyxol ke tiyjil Benjamín. E tten, ex e tyolin mya baꞌn wiꞌje porque alo Kman ma kꞌmante te. 12 Mya yajcu tzaj tqueꞌyin Kman aju yajbil weye, ex jacu tzaj tkꞌoꞌn tcyꞌiwbil wibaje te t-xel ju mya baꞌn in kꞌmanjtz wiꞌje jaꞌlo, chi David.

13 Atzunte David cyucꞌix ke xinak ucꞌin tuꞌn xi cylajoꞌntl cybe; icx te Simei cyjaꞌtok tjax tcꞌuꞌj juntl witz taj jlajxi, ex oc ten juntl maj yolil mya baꞌn tiꞌj David ex tzaj t-xoꞌn abj tiꞌj, ex jaw tchitun tkukil txꞌotxꞌ. 14 Tejtzun tpon rey cyucꞌix cycyakil xjal ateꞌ tucꞌil ttzi nima Jordán, otok che sict wen ex axtzun e cub ten ojlal.

15 Ocxtzun Absalón tuj Jerusalén cyucꞌix cycyakil xinak aj Israel ex tucꞌix Ahitofel. 16 Atzunte Husai aju aj Arquit ex tamiw David, xiꞌ canul tiꞌj Absalón ex xi tmaꞌn te: Baꞌnwit tzꞌel tkꞌija Tat Rey, baꞌnwit tzꞌel tkꞌija. 17 Atzunte Absalón xi tkanin te:

—¿Maj atzun jun baꞌn in tbinchana te tamiwoya icju? ¿Tikuꞌn mintiꞌ xiꞌya tucꞌil tamiwoya?

18 —Mintiꞌ ẍinxe porque il tiꞌj tuꞌn ntene tucꞌil ju rey ma jaw scꞌoꞌn tuꞌn Kman ex cyuꞌn cycyakil xjal aj Israel, chi Husai. 19 Ax icx ka ma chin ajbene te juntl, pero cuchiwt texju tcyꞌajal wamiwoye tuꞌn wajbene. Cyjaꞌtzun akine chin ajbele teya Tat Rey ic tzaꞌn ẍin ajbene te tmana.

20 Te tibajxi xi tkanin Absalón te Ahitofel:

—¿Chi toc cyeye cyuꞌn, alcye cbantel kuꞌn?

21 Atzunte Ahitofel xi ttzakꞌweꞌn:

—Tcub tana cyucꞌil ke mastl t-xuꞌjil tmana, akeju ma che cyaj tkꞌoꞌn te cwentil tja. Cyjaꞌtzun cꞌelel cynicꞌ cycyakil aj Israel tiꞌj ka ma tbinchaya jun icꞌbilxix twitz tmana, ex jacu tzꞌoc mastl cyipun cycyakil keju ateꞌ tucꞌila.

22 Jawtzun cybinchaꞌn jun xbalun ja max twi ja tuꞌn tajben te Absalón, ex atzun cub tan Absalón cyucꞌil mastl t-xuꞌjil tman; cywitz cycyakil aj Israel bant jlu tuꞌn. 23 Tuj tkꞌijlalil lu oc t-xi cykanin jun consej te Ahitofel junx taꞌ ic tzaꞌn te Dios in xi cykanin, porque aju tconsej Ahitofel puro niman tuꞌn David ex tuꞌn Absalón.