Jaw tiꞌn tib Absalón tuꞌn tkꞌojin tiꞌj David
15
Tej tel chꞌintl kꞌij, cnet jun carwaj tuꞌn Absalón, aju in ajben tuj kꞌoj, cyucꞌix ke chej, ex bant cyten 50 xinak tuꞌn cycub nej twitz. 2 Primx in jaw weꞌ Absalón tuꞌn t-xiꞌ webil ttzi be ttzi tpwertil tnam, ex oc tpon jun xjal tuꞌn tbant tiꞌj jun tkꞌoj tuꞌn rey, in xi txcoꞌn tuꞌn Absalón ex in xi kanin te alcye tnam otok tzaj. Katzun ma tma xjal: Ax cyiyjil jun cꞌloj aj Israel we kin, ka chi, 3 entons in xi tmaꞌn Absalón te: Ax toc, aju in tbinchaꞌna puro baꞌn ex tuj ttxolil taꞌ, pero mi jun jacu tzaj binchante tiꞌja tucꞌil rey. 4 Ex in xi tmaꞌntl: Nokwit akine jwes te tnam lu tuꞌn cyul wucꞌile cycyakil keju at cykꞌoj, jacu txi nbinchaꞌne cyiꞌj. 5 Ax icx, oc in pon lakꞌeꞌ jun xjal kꞌolbelte, in xi tnukpiꞌn tkꞌab, ex in tzaj tchleꞌn ex nneꞌl ttzꞌuban twitz ju xjal. 6 Ictzun tten o tbincha Absalón cyucꞌil cycyakil xjal aj Israel in cheꞌx tucꞌil rey tuꞌn ttzaj binchaꞌn cyiꞌj tuꞌn, ex cyjaꞌtzun tten cub tiꞌj cynabl aj Israel tuꞌn Absalón tuꞌn cyoc lpeꞌ tiꞌj.7 Tbajlenxi cyaje abkꞌi, xi tmaꞌn Absalón te rey:
—In chin cubsane twitza Tat Rey, tuꞌn ttzaj tkꞌoꞌna ambil weye tuꞌn nxiꞌye tuj tnam Hebrón, tuꞌntzun tjapun wuꞌne aju xi ntziyane te Kman. 8 Tej najltok kine tuj tnam Gesur tuj txꞌotxꞌ Siria, xi ntziyane te Kman cyjaꞌ: Ka ma chin aj kꞌiꞌne tuꞌn Kman tuꞌn npone juntl maj tuj tnam Jerusalén, octzun chin cꞌulule te tuj tnam Hebrón, nchiye xi nmaꞌne.
9 —Baꞌn tuꞌn t-xiꞌya tucꞌil tzalajbil, chi rey xi ttzakꞌweꞌn.
Xiꞌtzun Absalón tuj tnam Hebrón. 10 Pero ax tyemp lu, xi t-samaꞌn Absalón junjun t-sanjel cyxol cycyakil cꞌloj cyiyjil aj Israel tuꞌn t-xi cymaꞌn cye: Oc cybinteye oc tkꞌajt chun, biꞌx cymaye cyjaꞌ: Ma tzꞌoc kꞌoꞌn Absalón te rey tuj tnam Hebrón, che chicuye. 11 Ax icx tzaj ttxcoꞌn Absalón cab syent xinak aj Jerusalén, pero ke xinak lu e jeꞌx nok yalnix tiꞌj cyximbetz, ex mintiꞌtok baꞌn cyuꞌn aju t-ximbetz Absalón. 12 Tej cyxi tkꞌoꞌn Absalón ke chojbil, xi tmaꞌn tuꞌn t-xi txocbaj Ahitofel aju aj Gilo; aju xjal lu a jun cyucꞌil keju in che kꞌon tconsej David. O ttxoc Absalón ju xjal lu tuꞌn tten te tucꞌil. Cyjaꞌtzun tten ocxix tipun t-ximbetz Absalón tuꞌn tel kꞌiꞌn David te rey, ex in chmet-xi cybaj keju e oc lpeꞌ tiꞌj.
Ex ok David tuj Jerusalén
13 Pon jun sanjel kꞌmalte te David ka otok txi cykꞌon cyib aj Israel tuj tcwent Absalón. 14 Xitzun tmaꞌn David cye cycyakil keju at cyoclen ttxlaj ex ateꞌtok tucꞌil tuj tnam Jerusalén:
—Ko el ok biꞌx jaꞌlo, porque ka miꞌn xko el ok, mlay ko tzokpaj twitz Absalón. Koꞌ, chux keꞌye, mya yaj jacu ko ul cnet tuꞌn tzalu, ex jacu ko baj cꞌixbisaꞌn tuꞌn, ax icx jacu che baj naj cycyakil xjal ateꞌ tuj tnam tuꞌn, tuꞌn spad, chi David.
15 Atzun cye xi cytzakꞌweꞌn te rey:
—Bay keye Tat Rey, nok banin ktene tuꞌn kbinchanteye nok alcyex ctzajel tmaꞌna keye. 16 Cyjaꞌtzun tten ex rey tuj tnam, cyucꞌix cycyakil keju ateꞌ tuj tja, nok oꞌcx e cyaj tkꞌoꞌn laj t-xuꞌjil tuꞌn cycwentin tja. 17 Texlenxi rey cyucꞌix cycyakil ke xjal e jeꞌx lpeꞌ tiꞌj, ax e cub weꞌ tuj jun ja tcub max ttxaꞌn tnam. 18 Cycyakil keju at cyoclen tuj tcawbil e cub ten ttxlaj, atzun ke aj Seretey ex ke aj Peletey, akeju otok che oc kꞌoꞌn te xkꞌukil tja rey, e cub nej twitz cyucꞌix kak syent aj Getey otok che tzaj lpeꞌ tiꞌj max tuj tnam Gat. 19 Ex xi tmaꞌn rey te Itai aju aj Gat:
—¿Tikuꞌn tucꞌixa ma tzaj kucꞌile? Mas baꞌn tuꞌn taj meltzꞌaja ex tuꞌn tcyaj tena tucꞌil ju acꞌaj rey, porque aya jun stranjer xjal kxole, nok etz oka tuj ttanmiya tej tula tzalu. 20 Malpe ew tzula, ¿tzaꞌntzun tten tuꞌn t-xi nmaꞌne teya tuꞌn t-xiꞌya wucꞌile? Weye mintiꞌ baꞌn wuꞌne jatum chin xeꞌle. Mas baꞌn tuꞌn taj meltzꞌaja ex tuꞌn cyxi tiꞌna ke t-xjalila tucꞌila. Awt Kman cyꞌiwlante teya ex cucxwit ten tucꞌila te jumajx.
21 Atzunte Itai xi ttzakꞌweꞌn te rey:
—Akine ajbel teya cxel nmaꞌne jun yol axix toc twitz Kman ex twitza, aya Tat Rey, nok jaꞌx jatum ctela, ax icx weye axtzun chin tele, ka tuꞌn kankꞌin ex ka tuꞌn kcyim.
22 —Entons koꞌ kucꞌile, chi David xi ttzakꞌweꞌn.
Cyjaꞌtzun tten xiꞌ Itai tucꞌil David, junx cyucꞌil cycyakil ke xinak in che bet tucꞌil, ex cyucꞌix keju ateꞌ tuj tja. 23 Cycyakil ke xjal e cyaj ten tuj tnam, nimxix o che okꞌ tej cyqueꞌyinte cyjaꞌ cyicꞌx tuj tkan xak Cedrón ke xjal ateꞌ tucꞌil David, ex tucꞌix te rey icꞌx tuj; ex cycyakil xjal e cub nej twitz rey tuꞌn cyxiꞌ tuj be in pon tuj lugar mintiꞌ cynajbil xjal tuj. 24 Tucꞌix Sadoc ex cyucꞌix ke aj Leví kꞌilte cax cꞌubl tley Dios e oc lpeꞌ, ex cub cykꞌoꞌn ju cax twitz txꞌotxꞌ. Tejtzun cyetz baj cycyakil xjal tuj tnam, tucꞌix te Abiatar xiꞌ cyucꞌil. 25 Atzunte rey xi tmaꞌn te Sadoc:
—Kꞌiꞌn aja juntl maj tuj tnam aju cax cꞌubl tley Dios. Ka ma ncambaye xtalbil te Kman, oclo chin ajetz meltzꞌaje juntl maj, ex oclo wilaꞌye ju cax ex ju lugar jatum tcubsaꞌn. 26 Katzun ma tma Kman: Mintiꞌ in chin tzalaje tiꞌja, ka chi, pwes lu kine lu, baꞌn tuꞌn tbinchante wiꞌje nok alcye baꞌn tuj twitz.
27 Ax icx xi tmaꞌn rey te pal Sadoc:
—Aya cꞌoquel queꞌyinte ti cbajel. Baꞌn tuꞌn cyaj meltzꞌaje tuj txubtxaj tuj tnam tucꞌix Abiatar ex cyucꞌix cabe cycyꞌajale; aya Sadoc tucꞌix ju tcyꞌajala Ahimaas, ex Abiatar tucꞌix Jonatán aju tcyꞌajal. 28 Atzun weye ax chin cyjel tene cytxlaj ke xajbil aꞌ tuj lugar mintiꞌ cynajbil xjal tuj, max ocxi tpon jun tkanil cyuꞌne wucꞌile, chi David.
29 Atzunte Sadoc tucꞌix Abiatar ajtz cyiꞌn ju cax cꞌubl tley Dios tuꞌn tpon juntl maj tuj Jerusalén, ex ax e cyaj ten. 30 Atzunte David cyjaꞌ jax twi witz Olivos mintiꞌ t-xajab toc ex in okꞌ, ex potzin tiꞌj twiꞌ te jun yecꞌbil tiꞌj tbis. Ax icx cycyakil ke xjal ateꞌ tucꞌil, potzin tiꞌj cywiꞌ ex in che okꞌ ke tej cyjax. 31 Tej tpon tkanil tucꞌil David ka a jun Ahitofel cyxol keju otok mojeꞌ cyyol tucꞌil Absalón tuꞌn tel kꞌiꞌn David te rey, oc ten David cubsal twitz Kman tuꞌn tbaj ttzacsan t-ximbetz Ahitofel.
32 Tejtzun tjapun David max twi witz jatum in cheꞌx aj xjal cꞌulul te Dios, etz jun xjal canul tiꞌj, Husai tbi ex cyiyjil aj Arquit; sbitꞌumaj t-xbalun toc tiꞌj, ex tjax txꞌotxꞌ tuj twiꞌ te jun techal tiꞌj tbis.
33 Xitzun tmaꞌn David te:
—Ka ma txiꞌya wucꞌile, cꞌoquela mer ic tzaꞌn jun iktz te weye. 34 Katzun ma tzꞌaj meltzꞌaja juntl maj tuj Jerusalén tuꞌn t-xi tmaꞌna te Absalón cyjaꞌ: Tat Rey, akine tmajena jacu chin ajbene teya, ic tzaꞌn ẍin ajbene te tmana nej, ka chiya, jacutzun tzꞌonina wiꞌje tuꞌn tbaj tzacset t-ximbetz Ahitofel. 35 Porque lu ke pal Sadoc ex Abiatar jacu che onin tucꞌila. Cyjaꞌtzun kꞌmanxa cye tcyakilju cꞌoquel tbiꞌna tuj tja rey. 36 Lu Ahimaas aju tcyꞌajal pal Sadoc, tucꞌix Jonatán aju tcyꞌajal pal Abiatar, a jun ke ateꞌ ma chixin, cyjaꞌtzun samantza ke xjal lu tuꞌn nbinteye cye tiꞌj tcyakil tkanil oc cybiye, chi David te Husai.
37 Atzunte Husai aju tamiw David, pon tuj Jerusalén tuj or tej matok nnoꞌcx Absalón tuj tnam.