—¿Ti nbaj cye aj Hebrey tzalu?

Atzunte Aquis xi ttzakꞌweꞌn:

—A David jlu aju o ten ttxlaj Saúl aju rey cye aj Israel. Pero ma bant-xi elaꞌ kꞌij ax taꞌ wucꞌile, ex atxix tuj kꞌij tej tpon wucꞌile ax icx jaꞌlo mintiꞌ jun tbinchben mya baꞌn o wile, chi Aquis.

4 Tzajtzun cykꞌoj ke nejenel cye aj Filistey tiꞌj Aquis ex xi cymaꞌn te:

—Kꞌmanxa te tuꞌn taj meltzꞌaj tuj lugar o txi tkꞌoꞌna te ex tuꞌn miꞌn ttzaj kucꞌil tuj kꞌoj, porque jacu bant ax tzꞌoc te aj kꞌoj kiꞌj oc kkꞌojin, porque ka ma che cub tbyoꞌn ke ksoldad, jaculo mojeꞌ juntl maj tyol tucꞌil Saúl. 5 Baka mya a David jlu, aju in che bitzantok xjal tiꞌj ex in che bixantok tiꞌj ex in cymaꞌntok: Jun mil xinak ma che cub tuꞌn Saúl, atzunte David laj mil, che chi ke nejenel. 6 Tzajtzun txcoꞌn David tuꞌn Aquis ex xi tmaꞌn te:

—Cxel nmaꞌne jun yol teya axix toc twitz Kman, aya jun xinak tzꞌaklxix ex nim in chin tzalaje tiꞌj tbinchbena cyxol ke soldad. Mi jun tbinchbena mya baꞌn o wile atxix tej tpona wucꞌile. Pero mintiꞌ in che tzalaj ke nejenel cye aj Filistey tiꞌja, 7 cyjaꞌtzun taj meltzꞌaja ex miꞌn bisuna, tuꞌntzun miꞌn tbinchanteya aju mintiꞌ in che tzalaj aj Filistey tiꞌj, chi Aquis.

8 Atzunte David xi ttzakꞌweꞌn:

—Pero, ¿ti ma nbinchaye? ¿Alcye mya baꞌn o nbinchaye twitza tat rey atxix tej npone tucꞌila, tuꞌnju miꞌn taja tuꞌn nxiꞌye kꞌojlel cyiꞌj aj kꞌoj tiꞌja?

9 Xitzun tmaꞌn Aquis te:

—Baꞌn wuꞌne ic ttena ic tzaꞌn jun t-anjel Dios tuꞌnju baꞌn tbinchbena, pero ke nejenel cye aj Filistey ma cyma tuꞌn miꞌn t-xiꞌya kꞌojlel kucꞌile. 10 Cyjaꞌtzun, primx weꞌctza nchiꞌj cyucꞌix ke xinak ma che tzaj tucꞌila, tuꞌn cyaj meltzꞌaje, chi Aquis.

11 Te juntl kꞌij primx jaw weꞌ David cyucꞌix ke xinak ateꞌ tucꞌil ex e aj meltzꞌaj tuj cytxꞌotxꞌ aj Filistey; atzun ke aj Filistey xi cylajoꞌn cybe tuꞌn cypon max tuj lugar Jezreel.