—Baꞌn tuꞌna il tiꞌj tuꞌn texa wucꞌile tuj kꞌoj cyucꞌix ke xinak ateꞌ tucꞌila.

2 Atzunte David xi ttzakꞌweꞌn:

—Baꞌn, tat rey. Jaꞌlo cꞌelel tnicꞌa tiꞌj alcye jacu bant wuꞌne, akine tmajena.

Atzunte Aquis xi tmaꞌntl te David:

—Cꞌoquel nkꞌoꞌne te nejenel te jumajx cyxol ke soldad xkꞌukil weye.

3 Ya otok cyim Samuel ex otok che baj okꞌ cycyakil aj Israel tiꞌj, ex otok cuꞌx makuꞌn ax tuj ttanmi, tuj tnam Ramá. Atzunte Saúl otok che ex tlajoꞌn ke aj kꞌij cyucꞌix keju in tzaj cytxcoꞌn cyanmi cyimni.

4 Oc cychmon cyib aj Filistey ex cub be cyuꞌn tuꞌn cycub ten tuj lugar Sunem, ex atzunte Saúl e oc tchmoꞌn cycyakil aj Israel ex atzun e cub ten twi witz Gilboa; 5 pero tej ttil Saúl cycampament aj Filistey, tzaj nim t-xobil ex biꞌx naj tnabl. 6 Xitzun tkanin Saúl te Kman alcye tuꞌn tbant tuꞌn, pero mintiꞌ tzaj tzakꞌweꞌn tuꞌn Kman, mi tuj witzicꞌ, mi tuꞌn swert ex mi cyuꞌn ke t-sanjel Dios. 7 Tuꞌntzun jlu xi tmaꞌn Saúl cye ke nejenel cyxol t-soldad:

—Cyjyontze jun xuꞌj baꞌn txocon cyiꞌj cyanmi cyimni, tuꞌntzun t-xi nkanin jun nxjele te.

—At jun xuꞌj tuj lugar Endor baꞌn txocon cyiꞌj cyanmi cyimni, che chi ke nejenel cye soldad, xi cytzakꞌweꞌn.

8 Eltzun tchꞌexpuꞌn Saúl t-xbalun tuꞌn miꞌn tel nicꞌbaj tiꞌj ex junxitl t-xbalun oc tkꞌoꞌn; xiꞌ tucꞌil xuꞌj te konicꞌan ex xi tucꞌin cabe xinak tuꞌn cyxiꞌ tucꞌil. Xitzun tmaꞌn te xuꞌj:

—In chin cubsane twitza tuꞌn tjaw tiꞌna jun nswerte ex tuꞌn tul tanmi jun cyimni tuꞌna, aju cxel nmaꞌne teya.

9 Atzunte xuꞌj tzaj ttzakꞌweꞌn:

—Baꞌn tuꞌna aju o tbincha Saúl, o che etz tlajoꞌn ke aj kꞌij tuj tnam, cyucꞌix keju in tzaj cytxcoꞌn cyanmi cyimni. ¿Tikuꞌn in chin ocx tkꞌoꞌna tuj jun xobajil tuꞌn ncyime?

10 Pero xi tmaꞌn Saúl jun tyol axix toc twitz Kman te xuꞌj cyjaꞌ:

—Cxel nmaꞌne jun yol axix toc twitz Kman, mlay cub tcastiwoya tuꞌn tlaj jlu, chi Saúl.

11 ¿Alcyetzun taja tuꞌn ttzaj ntxcoꞌne? Chi xuꞌj xi tkanin.

—Txconctza Samuel, chi Saúl.

12 Minaben o til xuꞌj Samuel ex biꞌx jaw schꞌin; xitzun tmaꞌn te Saúl:

—¿Tikuꞌn ma chin cub t-sbuꞌna? Aya Saúl.

13 Atzunte rey xi tmaꞌn te:

—Miꞌn xoba. ¿Ti ma tila?

—Ma wile tanmi jun cyimni cyjaꞌ tjatz tuj txꞌotxꞌ, chi xuꞌj.

14 ¿Tzaꞌn queꞌyin? Chi Saúl, xi tkanin.

—Jun xinak tij xjal, tocsaꞌn jun t-ẍjoꞌw, chi xuꞌj.

Eltzun tnicꞌ Saúl tiꞌj ka a Samuel, ex cub ẍmejeꞌ ex max pon tacl tibaj twitz twitz txꞌotxꞌ. 15 Xitzun tmaꞌn Samuel te Saúl:

—¿Tikuꞌn ma labta wiꞌje tuꞌn ntzaj ttxcoꞌna?

Xi ttzakꞌweꞌn Saúl:

—Tuꞌnju ma tzaj nimxix nbise, porque ma che oc tzokpaj aj Filistey tuꞌn cykꞌojin wiꞌje ex ma chin cyaj coline tuꞌn Dios. Mintiꞌ in chin tzaj tzakꞌweꞌne tuꞌn, mi cyuꞌn ke t-sanjel ex mi tuj witzicꞌ. Cyjaꞌtzun ma tzaj ntxcoꞌne tuꞌn ttzaj tmaꞌna weye alcye tuꞌn nbinchanteye.

16 Atzunte Samuel tzaj ttzakꞌweꞌn:

—¿Tikuꞌn in tzaj tkanina weye ka ma cyaj colina tuꞌn Kman ex ka ma tzꞌoc te aj kꞌoj tiꞌja? 17 Ma tbincha Kman tiꞌja aju tzaj tmaꞌn weye. Ma tzꞌel tiꞌn toclena te rey ex ma txi tkꞌoꞌn te David aju tucꞌila. 18 Tuꞌnju mintiꞌ xi tnimana aju tyol tzaj tmaꞌn teya tuꞌn cynaj aj Amalec tuꞌna, cyjaꞌtzun ma bant jlu tuꞌn Kman tiꞌja. 19 Ex mya oꞌcx jlu, ax icx che xel kꞌoꞌn aj Israel tucꞌix aya tuꞌn Kman tuj cykꞌab aj Filistey, ex nchiꞌj cpola wucꞌile cyucꞌix ke tcyꞌajala. Icx cxel tkꞌoꞌn Kman cycyakil soldad aj Israel tuj cykꞌab aj Filistey, chi Samuel.

20 Biꞌx cub tzꞌak Saúl twitz txꞌotxꞌ ex cub txꞌileꞌ. Nimxix t-xobil tzaj tuꞌn tyol Samuel ex otok baj tipun tuꞌn tlaj naꞌnxtok twaꞌn tuj enter kꞌij ex enter konicꞌan. 21 Tejtzun toc tqueꞌyin xuꞌj otok naj tnabl Saúl, pon lakꞌeꞌ ttxlaj ex xi tmaꞌn te:

—Akine tmajena ma txi nnimane aju xtkaniya, ex ma wakꞌ wibe tuꞌn ncyime nok tuꞌn t-xi nnimane aju saj tmaꞌna weye. 22 Jaꞌlo in chin cubsane twitza tuꞌn nxi tnimana: Cxel nkꞌoꞌne chꞌin twaya tuꞌn toc tipuna ex tuꞌn tcub be tuꞌna.

23 Mintiꞌ cub tuj twitz Saúl tuꞌn twaꞌn, pero akeju nejenel cye t-soldad ateꞌ tucꞌil ex ju xuꞌj e oc ten lajwersilte maxi tej t-xi tniman tuꞌn twaꞌn. Jawtzun weꞌ twitz txꞌotxꞌ ex cub keꞌ twiꞌ jun watbil. 24 Atzunte xuꞌj cub tbyoꞌn jun tal tor ulni tnabl almiꞌn tuꞌn tja, ex baj t-xyokꞌin chꞌin arin mintiꞌ t-samel tuj tuꞌn tjaw mal tcꞌuꞌj tuꞌn tocx ttxoꞌn. 25 Xitzun tiꞌn jlu te Saúl tucꞌix cye ke nejenel cye t-soldad, ex tej cybaj waꞌn, baj cykꞌolben cyib ex cub be cyuꞌn ax konicꞌan lu.