Tej tpon David tuj cytxꞌotxꞌ aj Filistey
27
Masque icju, in ximantok David tiꞌj cyjaꞌ: Cpol jun kꞌij chin bel byoꞌne tuꞌn Saúl. Cyjaꞌtzun aju mas baꞌn tuꞌn nbinchanteye, chin xel oke tuj cytxꞌotxꞌ aj Filistey tuꞌntzun ntene tuj txubtxaj ex tuꞌntzun t-xi tcolin Saúl tuꞌn tjyon wiꞌje tuj cytxꞌotxꞌ aj Israel. Ka ma nbinchaye icju, chin cletele tuꞌn miꞌn ncub byoꞌne tuꞌn, chi David. 2 Cubtzun be tuꞌn David cyucꞌix kak syent xinak ateꞌ tucꞌil, tuꞌn cypon tuj cytxꞌotxꞌ aj Filistey ex xi cykꞌon cyib tuj tcwent Aquis, aju rey tuj tnam Gat. Ate Aquis tcyꞌajal Maoc. 3 E pontzun bant David najal cyucꞌix ke xinak ateꞌ tucꞌil ex e ten junx tucꞌil Aquis tuj tnam Gat, ex teyle junjun najan junx cyucꞌil keju ateꞌ tuj tja. Xi tiꞌn David keju cabe t-xuꞌjil ex atzun cybi jlu: Ahinoam aju aj Jezreel, ex Abigail aju t-xuꞌjilben ktzan Nabal aju aj Carmel. 4 Tej tbinte Saúl ka otok pon ok David tuj tnam Gat, ya mintiꞌtl xi lpeꞌ tiꞌj.5 Xitzun tmaꞌn David te Aquis:
—Ka tajbila tuꞌn tbinchanteya xtalbil weye tat rey, in chin cubsane twitza tuꞌn ttzaj tmaꞌna weye tuꞌn nxiꞌye najal nok alcyex tnam tuj txꞌotxꞌ lu, porque akine ajbel teya mya baꞌn tuꞌn nnajane junx tucꞌila tzalu tuj tnam jatum in cawina.
6 Ax kꞌij lu xi tkꞌoꞌn Aquis tnam Siclag te David tuꞌn tnajan tuj. Cyjaꞌtzun aju tnam Siclag cucx tcyaj tjakꞌ cycawbil ke rey cye aj Judá jaꞌlo.
7 Jun abkꞌi tucꞌ cyaje xjaw najan David tuj cytxꞌotxꞌ aj Filistey. 8 Tej cyten tuj txꞌotxꞌ lu, ate David cyucꞌix ke xinak ateꞌtok tucꞌil, in che oc tzokpajtok kꞌojlel cyiꞌj aj Gesur, aj Gezer ex aj Amalec, akeju otok tzꞌelxi nim abkꞌi cycublen ten najal tuj txꞌotxꞌ ma chixin, in tzyet-x tuꞌn jatum taꞌ tbeyil Shur ex max in pon baj tuj Ejipt. 9 Oc in che oc tzokpajtok kꞌojlel cyiꞌj, mi jun xinak ex mi jun xuꞌj in cyaj ten cyuꞌn, cycyakil in che cyim cyuꞌn. Ax icx in xi cyiꞌn ke ẍneꞌl, ke wacẍ, ke bur, ke chej camey ex ke xbalun. Octzun t-xi cycolin tuꞌn cyoc tzokpaj, in che ajtz meltzꞌaj jatum taꞌ Aquis, 10 atzunte Aquis in xi tkanintok cye: ¿Alcye tnam ma che oc tzokpaje tiꞌj jaꞌlo? Atzunte David in xi ttzakꞌweꞌn: Ma ko oc tzokpaje cyiꞌj ke tnam tcub tuj tnayaj kꞌij te Judá ex tuj tnayaj kꞌij te Jerameel, ex tuj tnayaj kꞌij te cytxꞌotxꞌ aj Quenit, chi David.
11 Mi jun xinak ex mi jun xuꞌj in cyaj ankꞌintok tuꞌn David, tuꞌntzun mi jun tuꞌn t-xi kꞌmalte tiꞌj jlu tuj tnam Gat. Tuj tcyakil tkꞌijlalil tej tten David tuj cytxꞌotxꞌ aj Filistey iclex o bant tuꞌn. 12 Atzunte Aquis, kꞌukltok tcꞌuꞌj tiꞌj David ex in ximantok tiꞌj cyjaꞌ: Niban toc David te aj kꞌoj cyiꞌj aj Israel akeju t-xjalil, cyjaꞌtzun cucx cꞌajbel weye te jumajx, chi Aquis.