2 Cubtzun be tuꞌn Saúl cyucꞌix ox mil soldad mas at cynabl tuj kꞌoj cyxol aj Israel, ex e jeꞌx jyolte David tuj lugar Zif aju mintiꞌ cynajbil xjal tuj. 3 Atzun e cub ten ttxlaj jun be twi witz Haquila aju tcub tuj tjawitz kꞌij teju lugar mintiꞌ cynajbil xjal tuj. Atzun taꞌtok David tuj lugar mintiꞌ cynajbil xjal tuj, ex el tnicꞌ tiꞌj ka otok pon Saúl jyolte te; 4 cyjaꞌtzun xi t-samaꞌn junjun sanjel queꞌyilte jatum otok cub ten Saúl. 5 Te tibajxi xiꞌ David jatum otok cub ten Saúl, ex o til ju lugar jatum in che cub tantok Saúl tucꞌix Abner aju nejenel cye t-soldad Saúl ex tcyꞌajal Ner. Ax in tantok Saúl cyxol ke t-soldad tuj campament. 6 Octzun ten David yolil tucꞌil Ahimelec aju aj Hetey, ex tucꞌil Abisai aju tal Sarvia ex terman Joab, ex xi tkanin cye:

—¿Alcye jun cyeye jacu txiꞌ wucꞌile tuꞌn kpon max jatum taꞌ Saúl tuj campament cye t-soldad?

—Jacu chinx weye tucꞌila, chi Abisai xi ttzakꞌweꞌn.

7 Tujx konicꞌan lu xiꞌ David tucꞌix Abisai jatum otok che cub ten Saúl cyucꞌix ke t-soldad. Ax in tantok Saúl campament, ex aju tlans ax tcub ttxlaj twiꞌ, awaꞌn tuj txꞌotxꞌ. Atzunte Abner ex ke mastl soldad in che tantok ttxlaj Saúl. 8 Xitzun tmaꞌn Abisai te David:

—Ax Dios ma tzaj kꞌonte aj kꞌoj tiꞌja tuj tkꞌaba. Kꞌontza ambil weye jaꞌlo tuꞌn t-xi nxayuꞌne lans tuj tcꞌuꞌj ex biꞌx cyjel kꞌeꞌt tuj txꞌotxꞌ, junx cxel ntzokpiꞌne tiꞌj, ex tuꞌn jlu biꞌx cymel, chi Abisai.

9 Atzunte David xi ttzakꞌweꞌn:

—Miꞌn cub tbyoꞌna, porque aju ma cub byonte teju rey scꞌoꞌmaj tuꞌn Kman cbel tcastiw. 10 Cxel nmaꞌne jun nyole axix toc twitz Kman; tuꞌnxte Kman cnajel, tuꞌnju otok pon or te ex ka tuj kꞌoj tuꞌn tcyim. 11 Miwt takꞌ Kman ambil weye tuꞌn tcub nbyoꞌne aju rey jaw t-scꞌoꞌn. Cyjaꞌtzun oꞌcx kꞌintza tlans tcub ttxlaj twiꞌ, tucꞌix xar tcubil aꞌ, ex koꞌ, chi David.

12 Xitzun tiꞌn David aju lans tucꞌix xar tcubil aꞌ ex e aj meltzꞌaj. Mi jun o queꞌyinte cye ex mi jun o binte; ax icx mi jun ul tnabl tuꞌnju cycyakil in che tantok, ex tuꞌnju ax Kman otok tzaj kꞌonte nim watl tuj cywitz. 13 Te tibajxi icꞌx David jlajxi chkꞌajlaj cyxol witz ex cub ten twiꞌ jun witz, pero najchak cyxol. 14 Tzajtzun schꞌin David tiꞌj Abner ex cyiꞌj ke soldad ex tma:

—Aya Abner, chin ttzakꞌwentza.

Atzunte Abner xi ttzakꞌweꞌn:

—¿Alcyeya tuꞌnju in tzaj schꞌina tiꞌj rey?

15 Xitzun tmaꞌn David te:

—¿Myapetzun xinaka? ¿Alcye juntl jacu pon ic tzaꞌn teya cyxol cycyakil aj Israel? ¿Tikuꞌntzun mintiꞌ nnoꞌc tcwentina tpatrona aju rey? At jun xjal ma tzꞌocx aj cyxole ex ma tajbe tuꞌn tcub byoꞌn tpatrona tuꞌn, aju rey. 16 Mya baꞌn aju ma tbinchaya. Cxel nmaꞌne jun nyole axix toc twitz Kman, mas baꞌn tuꞌn cycyime porque mintiꞌ nnoꞌc cycwentine aju cyreye scꞌoꞌmaj tuꞌn Kman. Jyoma aju tlans rey ex aju xar tcubil aꞌ, akeju tcubtok ttxlaj twiꞌ, chi David.

17 Tejtzun tel tnicꞌ Saúl tiꞌj ka a David in yolintok, tma:

—¿Apeya in yolin wucꞌile, ncyꞌajal David?

Atzunte David xi ttzakꞌweꞌn:

—Akine in chin yoline Tat Rey. 18 Pero Tat Rey, ¿tikuꞌn nnoꞌc lpeꞌya wiꞌje tuꞌn ncub tbyoꞌna akine ajbel teya? ¿Ti o nbinchaye? ¿Alcye mya baꞌn o bant wuꞌne? 19 In chin cubsane teya Tat Rey tuꞌn t-xi tbiꞌna ke nyole akine ajbel teya: Ka tuꞌn Kman ma tzꞌoc kꞌoꞌna te aj kꞌoj wiꞌje, cuchiwt txi tcꞌmoꞌn Kman jun oyaj cxel nkꞌoꞌne te; katzun cyuꞌn xjal in cymaꞌn teya tuꞌn toc tena kꞌojlel wiꞌje, cuchiwt tzaj jun mya baꞌn cyibaj tuꞌn Kman. Porque ma chin etz cylajoꞌn tuj txꞌotxꞌ etzan tuꞌn Kman, ex cyaj tuꞌn wajbene cye junxitl dios. 20 Miꞌn waje tuꞌn ncyime tuj junxitl txꞌotxꞌ mya ttxꞌotxꞌ Kman, pero aya Tat Rey ma tzꞌetza jyolte weye; akine ic ntene ic tzaꞌn jun cyꞌak, ex ma tzꞌoc lpeꞌya wiꞌje cywiꞌ ke witz ic tzaꞌn tiꞌj jun tzꞌuchin, chi David.

21 Xitzun ttzakꞌweꞌn Saúl:

—Aya ncyꞌajal David, baꞌn wuꞌne ma chin binchane il. Ic ntene ic tzaꞌn jun xjal mintiꞌ tnabl ex jumajx ma tzpet nnable. Pero tajtz meltzꞌaja, porque ya miꞌn tzꞌoc nbinchaꞌne jun mya baꞌn tiꞌja tuꞌnju ma tzaj kꞌakꞌan tcꞌuꞌja juntl maj wiꞌje ex mintiꞌ ma chin cub tbyoꞌna, chi Saúl.

22 Atzunte David xi ttzakꞌweꞌn:

—Lu tlansa lu, aya Tat Rey. E ttzaj jun tmajena kꞌilte te, 23 ex awt Kman kꞌonte t-xel teyle junjun ic tzaꞌnx tbinchben. Masque a Kman ma tzaj kꞌonte teya tuj nkꞌabe jaꞌlo, pero mintiꞌ xwajbeye tuꞌn tcub nbyoꞌne, aya rey scꞌoꞌmaj tuꞌn. 24 Ic tzaꞌn weye Tat Rey, maꞌ toclen tchwinklala ma tzꞌeꞌla tuj nwitze, icxwittzun tzꞌeꞌla ju weye nchwinklal tuj twitz Kman, ex tzꞌelxwit tiꞌn tcyakil bis wiꞌje, chi David.

25 Xitzun tmaꞌntl Saúl cyjaꞌ:

—Awt Dios cyꞌiwlaꞌn teya ncyꞌajal David. Tcyakilju cbantel tuꞌna puro baꞌn cꞌelel.

Tbajlenxi jlu aj meltzꞌaj Saúl tja, atzunte David xi tlajoꞌntl tbe.