2 Attok jun xinak najl tuj lugar Maón, puro kꞌinun, attok ox mil t-ẍneꞌl ex jun mil tchip. Aju tkꞌinumabl atzun taꞌtok tuj lugar Carmel, ex otok pon tuꞌn tel cytzmal ke t-ẍneꞌl. 3 Aju xinak lu Nabal tbi, atzun tzajni jlet tiyjil tiꞌj Caleb. Puro txꞌuꞌj twi Nabal ex mya baꞌn tmod, atzunte Abigail aju t-xuꞌjil, puro baꞌn queꞌyin ex at tnabl.

4 Maxtok taꞌ David tuj lugar mintiꞌ cynajbil xjal tuj tej tbinte ka otok pon Nabal tuj lugar Carmel tuꞌn tel cytzmal ke t-ẍneꞌl, 5 xitzun t-samaꞌn David laj cuꞌxun ex xi tmaꞌn cye tuꞌn t-xi cykꞌoꞌn jun kꞌolbebl te Nabal, 6 ex tuꞌn t-xi cymaꞌn te aju yol lu: Cuchiwt baꞌn taꞌya cyucꞌix keju ateꞌ tuj tjaya ex ke mastl xjal ateꞌ ttxlaja. 7 Ma nbiye in matzona cytzmal ke t-ẍneꞌla. Baꞌn tuꞌna a ateꞌ ke tpastora tzalu kucꞌile tuj Carmel, ex atxix tej cyul, bajx ko oc tene binchal jun mya baꞌn cyiꞌj ex bajx tzꞌel kꞌiꞌn jun tiꞌxti cye. 8 Baꞌn tuꞌn t-xi tkanina jlu cye ke tmajena ex tzul cymaꞌn teya ka ax toc. Cyjaꞌtzun in chin cubsane teya tuꞌn cytzaj t-xtalina ke cuꞌxun lu, porque ma che pon tuj jun kꞌij te tzalajbil, ex tuꞌn ttzaj tkꞌoꞌna cye nok alcye at tucꞌila tuꞌn tajben te cye ex te weye, akine ic tzaꞌn jun tcꞌwaꞌla, che chicuye, chi David.

9 E jeꞌxtzun t-samaꞌn David ke cuꞌxun tucꞌil Nabal ex xi cymaꞌn tcyakil jlu te. Ex ax e cub ten ayol tiꞌj ju ttzakꞌwebl. 10 Atzunte Nabal xi ttzakꞌweꞌn:

—¿Alcye nnoꞌc David? ¿Alcyeju tcyꞌajal Isaí? Tuj tkꞌijlalil jaꞌlo nim majen niban cyel ok tiꞌj cypatrón. 11 ¿Baka ctzajel wiꞌne aju wabj, cꞌabj ex chibj, aju ma bant tten wuꞌne cye nmajene matzol cytzmal nẍneꞌle, tuꞌn t-xi nkꞌoꞌne cye xjal mintiꞌ biꞌn wuꞌne jatum ẍe tzaj?

12 E ajtzun meltzꞌaj ke cuꞌxun otok cheꞌx t-samaꞌn David, ex tej cypon tucꞌil xi cymaꞌn tcyakil aju otok tma Nabal. 13 Xitzun tmaꞌn David cye ke xinak ateꞌ tucꞌil:

—Cycꞌalonque cyspadiye cycꞌuꞌje.

Tzajtzun cyiꞌn ke xinak cyspad ex oc cycꞌaloꞌn cycꞌuꞌj, ax icx te David tbincha icju, e jeꞌxtzun cyaje syent xinak tucꞌil, atzun juntl cabe syent ax e cyaj ten cwentil tcyakilju at cye. 14 At jun tmajen Nabal xiꞌ tucꞌil Abigail aju t-xuꞌjil Nabal kꞌmalte te cyjaꞌ:

—Max tuj lugar mintiꞌ cynajbil xjal tuj, e tzaj t-samaꞌn David junjun t-sanjel kꞌolbelte kpatrone; atzun te cyuw xiꞌ tyol cyiꞌj. 15 Akeju xinak lu puro baꞌn cymod kucꞌile. Tej xko tene junx cyucꞌil tuj cojbil, mintiꞌ jun mya baꞌn o cybincha kiꞌje ex mi jun tiꞌxti el cyiꞌn keye. 16 Nokpe o oc cwentine cyuꞌn cyucꞌix ke ẍneꞌl kꞌijl ex konicꞌan. 17 Pero tuꞌnju puro plojxix tmod tchmila, mlay koꞌx yolin tucꞌil. Ximana tiꞌj alcye cbantel tuꞌna, porque ax toc tzul jun mya baꞌn tiꞌj ex cyiꞌj keju ateꞌ tuj tja, chi majen.

18 Jurat naj tzaj tiꞌn Abigail cabe syent pan, cabe tzꞌuꞌm nojni tuꞌn taꞌl twitz uva, jweꞌ ẍneꞌl txoꞌmaj twitz kꞌakꞌ, jweꞌ arrob tbakꞌ triw txꞌilsaꞌmaj, jun syent lobj binchaꞌmaj tiꞌj twitz uva tzkij tuj piẍun tten, ex cabe syent lobj binchaꞌmaj tiꞌj twitz higo tzkij ax tuj piẍun tten, ex oc tcꞌaloꞌn tiꞌj cycꞌuꞌj ke bur. 19 Ex te tibajxi xi tmaꞌn cye ke tmajen:

—Cycub nej cyeye tuꞌn woc lpeꞌye cyiꞌje.

Mintiꞌtok bin tchmil tiꞌj jlu. 20 Jaxtzun Abigail tibaj jun bur ex tuj ewaj tzyet be tuꞌn, tuꞌn tcuꞌx tcꞌuꞌj witz. Yajxi chꞌintl xi tqueꞌyin cyjaꞌ ttzaj David cyucꞌix ke xinak tucꞌil, xitzun lakꞌeꞌ jatum ateꞌ ke.

21 Atzunte David in ximantok tiꞌj cyjaꞌ: Ax toc nokx gan ma tzꞌoc ncwentine tcyakilju at te Nabal tuj lugar mintiꞌ cynajbil xjal tuj, ex mintiꞌ jun o tzꞌel elkꞌaꞌn tiꞌj tcyakilju at te; weye o nbinchaye baꞌn te, atzun te ma tbincha mya baꞌn wiꞌje. 22 Awt Dios cub kꞌonte ncastiwoye ka naꞌnxtok cycub baj cycyakil ke xinak tiyjil Nabal wuꞌne oc tcub kꞌij nchiꞌj, chi David.

23 Tejtzun tilwaj David tuꞌn Abigail, cuꞌtz naj tibaj bur ex cub ẍmejeꞌ t-xe tkan max tejxi tpon tacl tibaj twitz twitz txꞌotxꞌ, te jun techal te nimbil te, 24 ex xi tmaꞌn te:

—Tat, wibaje kꞌoncuya ju mya baꞌn lu, ex chin cubsale twitza tuꞌn cytzaj tbiꞌna ke nyole aju cxel nmaꞌne teya. 25 Miꞌn tzꞌoc tkꞌoꞌn tcwenta tiꞌj aju in tbinchaꞌn Nabal, porque plojxix tmod ic tzaꞌnx t-xilen ju tbi toc Nabal, ex ax toc mintiꞌ tnabl. Tcyakilju in tbinchaꞌn puro mya baꞌn tuꞌnju mintiꞌ tnabl. Akine ajbel teya mintiꞌ o wile tej cypon t-samaꞌna ke cuꞌxun. 26 masque icju, ax Kman mintiꞌ ma takꞌ ambil teya tuꞌn t-xiꞌya ex tuꞌn cycub tbyoꞌna ke xjal tuꞌn t-xelin tuꞌna tuꞌn texa tajbila. Icwit che oc cycyakil aj kꞌoj tiꞌja tuꞌn Kman ic tzaꞌn te Nabal; ax icx keju cyaj tuꞌn cybinchante mya baꞌn tiꞌja. 27 Jaꞌlo in chin cubsane teya, aju oyaj ma tzul wiꞌne baꞌn tuꞌn tcub sipet cyxol ke xinak in che bet tucꞌila, 28 ex tuꞌn tcub tnajsaꞌna aju wile akine ajbel teya. Cpol jun kꞌij aya cꞌoquel te rey tuꞌn Kman, ex ke tiyjila cucx che cawil te jumajx, porque mya nok tuꞌnxa nneꞌtza kꞌojlel, nok oꞌcx tuꞌn Kman samaꞌna, ex tuj tcyakil tankꞌibla mintiꞌ jun tiꞌxti mya baꞌn cbajel tiꞌja. 29 Ka at jun ma tzꞌoc lpeꞌ tiꞌja ex taj tuꞌn tcub byoꞌna tuꞌn, mlay cuba porque ax Kman aju Tdiosa cwentil teya. Che elex tlajoꞌn Kman ke aj kꞌoj tiꞌja; ic che tembil ic tzaꞌn in xi xoꞌt jun tal abj tuꞌn jun xobl. 30 Cyjaꞌtzun, oc tjapun tcyakilju tyol Kman o tma tiꞌja ex oc toc kꞌoꞌna tuꞌn te rey cyxol aj Israel, 31 mintiꞌ bis tiꞌja, porque mintiꞌ ma che cub ke xjal mintiꞌ cyil tuꞌna ex mintiꞌ ma xelin tuꞌna aju mya baꞌn ma cybincha xjal tiꞌja. Octzun tbinchante Kman aju baꞌn tiꞌja, biꞌx chin tzaj tnaꞌna, akine ajbel teya, chi Abigail.

32 Atzunte David xi ttzakꞌweꞌn:

—Nimanxwit tbi Kman aju Kdios aj Israel koꞌ, aju ma tzaj samante teya jaꞌlo canul wiꞌje, 33 ax icx teya, cyꞌiwlaꞌnxwita tuꞌnju tzꞌaklxix ke tyola, ex tuꞌnju ma chin oc tmayoꞌna tuꞌn miꞌn nxiꞌye byol cye ke xjal, ex tuꞌn tbant jlu wuꞌne tuꞌn wexe wajbile. 34 Pero cxel nmaꞌne jun nyole axix toc twitz Kman aju Kdios aj Israel koꞌ, aju ma chin oc mayoꞌna tuꞌn tuꞌn miꞌn toc nbinchaꞌne jun mya baꞌn tiꞌja, porque nokwit mintiꞌ sul naja canul wiꞌje, ya oc tcub kꞌij nchiꞌj, miwtlo jun xinak itzꞌx, akeju ateꞌ ttxlaj Nabal, chi David.

35 Xitzun tcꞌmoꞌn David aju kꞌiꞌn tuꞌn Abigail ex xi tmaꞌn te:

—Baꞌn tuꞌn taja tjaya ex miꞌn bisuna, porque ma nbiye aju tyola ex ma nbinchaye aju ma tzaj tkanina weye.

36 Tejtzun tpon meltzꞌaj Abigail jatum taꞌtok Nabal, o til lu Nabal in icꞌsante jun nintz waꞌn ic tzaꞌn twa jun rey. Nimtok in tzalaj Nabal ex otok chyoꞌn twiꞌ. Cyjaꞌtzun mintiꞌ xi tmaꞌn Abigail aju otok baj, ex maxitzun xi tmaꞌn te juntl kꞌij. 37 Tej t-skix tuj juntl kꞌij ex tej otok tzꞌel kꞌeꞌn tuj twi Nabal, xi tmaꞌn Abigail te tcyakilju otok baj, ex biꞌx tzaj jun ataque tiꞌj Nabal ex ya mintiꞌtl yucch. 38 Tbajlenxitzun laj kꞌij, cꞌixbisanjtz Nabal tuꞌn Kman ex biꞌx cyim. 39 Tejtzun tbinte David ka otok cyim Nabal tma:

—Nimanxwit tbi Kman, tuꞌnju a ma tzꞌoc kꞌonte t-xel tiꞌj ju mya baꞌn tbincha Nabal wiꞌje, ex ma chin oc mayoꞌne tuꞌn tuꞌn miꞌn nbinchanteye jun mya baꞌn, ex ma tbincha tuꞌn, ax tibajx Nabal tuꞌn tcub tzꞌak aju tbinchben mya baꞌn, chi David.

Te tibajxi e jeꞌx t-samaꞌn David junjun tmajen tuꞌn t-xi cymaꞌn te Abigail ka tajbiltok David tuꞌn toc Abigail te t-xuꞌjil. 40 Tejtzun cypon ke tmajen David tuj Carmel tuꞌn cyyolin tucꞌil Abigail, xi cymaꞌn te:

—Ma ko tzaj samaꞌne tuꞌn David tucꞌila, porque taj tuꞌn toca te t-xuꞌjil.

41 Cubtzun ẍmejeꞌ Abigail max tejxi tpon tacl tibaj twitz twitz txꞌotxꞌ te jun techal te nimbil, ex tma:

—Nok jun ajbel te David kine, ex jacu tzꞌel ntxꞌjoꞌne cykan ke tmajen.

42 Tbajlenxi tmaꞌn jlu, jurat naj baj tbinchaꞌn tten ex jax tibaj jun bur; octzun lpeꞌ cyiꞌj keju otok che tzaj t-samaꞌn David, junx cyucꞌil jweꞌ tmajen xuꞌj; ex cyjaꞌtzun tten o mojeꞌ tucꞌil David.

43 Ax icx otok mojeꞌ David tucꞌil Ahinoam aju aj Jezreel, ex cycabil e oc te t-xuꞌjil. 44 Atzunte Saúl otok txi tkꞌoꞌn ju tmeꞌjel Mical tbi, aju t-xuꞌjil David, te juntl xinak Palti tbi, tcyꞌajal Lais aju aj Galim.